Ni rau veidokai na veiwatini, erau na veilomani tiko ga ke rau sega mada ga ni duavata ena so na ka. E kaya na ivola Ten Lessons to Transform Your Marriage: “Erau na sega ni dre ga nodrau mua na veiwatini ni basika eso na ituvaki. Erau na veivosakitaka na ka kece erau sega ni duavata kina. Erau na doka na kedrau isa ni rau rogoca nona rai, qai vaqara e dua na iwali ni leqa rau duavata ruarua kina.”

IVAKAVUVULI VAKAIVOLATABU: “Na loloma . . . e sega ni kauaitaka ga na ka e baleti koya.”—1 Korinica 13:4, 5.

“Keu dokai watiqu, au na vakamareqeti koya, au na sega ni cakava e dua na ka ena vakaleqai koya se na neirau vakawati.”—Micah.

Ke sega na veidokai, rau rawa ni veivakalewai, veivakalialiai, se veibeci na veiwatini ni rau veivosaki. Era kaya na dauvakadidike ni itovo qori e ivakatakilakila ni nodrau rawa ni veisere na veiwatini.

“E rawa ni beci koya o watimu, sega ni nuitaki iko, qai vakaleqa nomu vakawati ke o dau vakalewai koya, vakaucacataki koya, se veiwalitaki koya.”—Brian.

ESO NA TARO MO VAKASAMATAKA

Dikeva nomu ivakarau ni veivosaki kei na ka o cakava ena loma ni dua na macawa. Oti qai taroga:

• ‘Au vakalewai watiqu vakavica? Au vakacaucautaki koya vakavica?’

• ‘Cava soti au cakava meu vakaraitaka kina niu dokai kequ isa?’

VEIVOSAKITAKA KEI WATIMU

• O rawa ni vakaraitaka vakacava ena ka o cakava se tukuna ni o dokai watimu?

• O rawa ni vakaraitaka vakacava ena ka o cakava se tukuna ni o sega ni dokai watimu?

VAKATUTU

• Vola e tolu na sala o vinakata me vakaraitaka kina o watimu ni dokai iko. Me cakava tale ga qori o kemu isa. Drau dui raica na ka e vola o kemudrau isa, drau qai saga mo drau vakaraitaka na veidokai ena sala sa volai toka.

• Vola na itovo o taleitaka me baleti kemu isa. Tukuna sara vua ni o taleitaka vakalevu na nona itovo qori.

“Keu dokai watiqu, au na vakaraitaka ena ka au cakava niu vakamareqeti koya, niu vinakata tale ga me marau. Sega ni tukuni me veivakadrukai sara na ka au cakava. Levu na gauna e kila o watiqu niu dokai koya dina, niu tukuna se cakava eso na ka e nanumi ni sega na betena.”—Megan.

E sega ni bibi mo vaqaqa o dau veidokai se sega, e bibi cake mo vaqaqa e vakila o watimu ni dau dokai se sega.

IVAKAVUVULI VAKAIVOLATABU: “Moni vakaisulu ena yalo ni veikauaitaki dina, yalololoma, yalomalumalumu, yalomalua, kei na vosovoso.”—Kolosa 3:12.