VEI IRA NA ITUBUTUBU
8: iVakaraitaki
CAVA E OKATI KINA?
Era cakava na ka era vakavulica na itubutubu ivakaraitaki vinaka. Kaya mada ke qiri mai e dua o sega ni via vosa vua. Ke rogoca o luvemu ni o lasutaka ni o sega ni tiko e vale, kua ni kurabuitaka ni na cakava tale ga qori ena dua na gauna.
“Levu era dau kaya ‘Muria ga na noqu vosa, kua ni muria na noqu itovo.’ Ia e veicalati toka na vakasama qori nida vakasamataki ira na gone. Era vaka na sipadi (sponge) e domica na ka kece e biu volekata, nira dau vakatotomuria na gone na ka kece eda kaya se cakava. Era na tukuna tale ga vei keda ke sega ni salavata na noda ivakaraitaki kei na ka eda vakavulica.”—David.
IVAKAVUVULI VAKAIVOLATABU: “O iko, o vunautaka tiko, ‘Kua ni butako,’ o butako tiko?”—Roma 2:21.
VUNA E BIBI KINA NA IVAKARAITAKI
Era dau kauaitaka vakalevu na gone kei na itabagone nodra ivakaraitaki na itubutubu, sega soti na nodra icaba. Kena ibalebale na itubutubu ga e rawa ni vakavulica vinaka na luvena, ia e bibi me cakava na ka e vakavulica.
“E rawa nida cavuta vakaduanadrau e dua na ka da qai veinanuyaka ke sa rogoca o gone. Ia na dua wale ga na gauna eda sega ni cakava kina na ka eda tukuna, ena tukuna vei keda ena gauna vata ga ya. Era raica vinaka tu na gone na ka eda cakava, eso mada ga na ka qori eda nanuma nira sega ni raica.”—Nicole.
IVAKAVUVULI VAKAIVOLATABU: “Na vuku mai cake . . . e sega ni . . . veivakaisini.”—Jemesa 3:17.
KA O RAWA NI CAKAVA
Dikevi iko kei na nomu ivakarau ni bula. Na ka ni veivakamarautaki vakacava o dau digia? E dau vinaka se ca nomu ivakarau vei watimu kei ratou na gone? O cei era nomu itokani? O dau veinanumi? O na rawa ni kila ena vica na taro qori ke o sa kotora tiko e dua na ivakaraitaki vinaka vei ratou na luvemu.
“Keirau sega ni namaka vakaveiwatini me ratou muria na gone na ivakarau keirau sega mada ga ni muria.”—Christine.
Kere veivosoti ni o cala. Eratou sa kila rawa tiko na luvemu ni o sega ni uasivi. Ke o dau ‘kere veivosoti’ vei watimu se ratou na gone ni o cala, o sa kotora e dua na ivakaraitaki vinaka ni daudina kei na yalomalumalumu.
“E bibi mera rogoca na luveda nida vakadinata eda cala dina da qai kere veivosoti ena cala eda cakava. Ke sega, era na cakitaka se sega ni vakaraitaka vakadodonu nira cala.”—Robin.
“E bibi duadua vei ira na luveda na noda ivakaraitaki na itubutubu, e sala vinaka duadua ni veivakavulici na noda ivakaraitaki baleta era raica e veigauna. E vaka ga era vakavulici e veigauna na gone ena noda ivakarau ni bula na itubutubu.”—Wendell.
