Ni Dauveibuli qai kaukaua na Kalou o Jiova, levu era beitaki koya ena veika ca e yaco tiko e vuravura. Ia dikeva mada na ka e tukuna na iVolatabu me baleti koya na Kalou dina:

•  “Sa dodonu ko Jiova e na nonai valavala kecega.”—Same 145:17.

• “Sa dodonu na nonai valavala kecega: A Kalou vosa dina, ka sega ni ca, sa yalododonu ka daucaka dodonu.”—Vakarua 32:4.

• ‘O Jiova e dau yalololoma qai dau veinanumi.’—Jemesa 5:11.

Io, e sega ni vakavuna na Kalou na veika ca. Ia e vakauqeta beka e dua me caka ca? Sega! E tukuna na iVolatabu: “Ena gauna e vakatovolei kina e dua me kua ni kaya: ‘E vakatovolei au na Kalou.’” Na vuna? Ni “sega ni rawa ni vakatovolei na Kalou ena ka ca, e sega tale ga ni vakatovolea e dua ena ka ca.” (Jemesa 1:13) Io, na Kalou e sega ni vakatovolea se vakauqeta e dua me vakayacora na veika ca. Ia o cei e dodonu me beitaki? Se na cava e rawa ni tukuni ni vu ni veika ca?

E vakaraitaka na iVolatabu e dua na vuna eda rarawa kina: ‘Ni dau yacovi keda kece na gauna kei na ka e sega ni namaki.’ (Dauvunau 9:11) Ni yaco na leqa sega ni namaki se vakacalaka, nona vakaleqai e dua e vakatau ena nona tiko ena vanua se gauna e yaco kina qori. A tukuna o Jisu Karisito e dua na vakacalaka a yaco ena 2 na udolu na yabaki sa oti, era mate kina e le 18 ni lutumi ira e dua na vale cecere. (Luke 13:1-5) E sega ni vu ni nodra mate ni ca nodra ivakarau ni bula, ia nira tu e kea ena gauna e lutu kina na vale cecere qori. Ena Janueri 2010, a vakacaca ena vanua o Haiti e dua na uneune, qai ripotetaka na matanitu e kea nira mate e sivia e le 300 na udolu. Na vakacaca qori e sega ni wasea e dua. E rawa tale ga ni va qori ni tauvimate e dua.

Era na rairai taroga eso: ‘E rawa beka vua na Kalou me tarova na veika ca? Vakacava e rawa ni taqomaki ira na tamata vinaka mai na veika ca?’ Ke me tarova na Kalou na veika ca, e vakaraitaka ni sa na kila rawa tu na veika qori ni bera nira yaco. E rawa vua na Kalou me kila na veika se bera ni yaco, ia na taro meda taroga: Vakacava e vakayagataka e veigauna na nona kaukaua me kila kina?—Aisea 42:9.

E tukuna na iVolatabu: “Na noda Kalou sa tiko mai lomalagi: Sa cakava oti na ka kecega sa vinakata ko koya.” (Same 115:3) Ena sega ni yavala o Jiova baleta wale ga ni tu vua na kaukaua, ia ena yavala ke raica ni veiganiti. Qori tale ga na ka e dau cakava ni vakatulewataka me raica e dua na ka se bera ni yaco. Kena ivakaraitaki, na  gauna e torosobu kina na ivalavala ca ni koro o Sotoma kei Komora, e tukuna na Kalou vua na peteriaki o Eparama: “Au na lako sobu mada, ka raica se ra sa cakava me vaka sara na kenai tukutuku, sa yacovi au; ia kevaka e segai, ka’u na qai kila.” (Vakatekivu 18:20, 21) A vakatulewataka o Jiova me kua ni raica e liu na torosobu ni valavala ena koro ruarua qori. Koya gona, e vakatau vei Jiova me raica se sega na veika se bera ni yaco. (Vakatekivu 22:12) E sega ni kena ibalebale qori ni malumalumu se lekata e dua na ka. Ni ‘uasivi na Kalou ena nona cakacaka,’ e raica o koya me veiraurau na nona raica na veika se bera ni yaco me salavata kei na nona inaki, e sega tale ga ni vakasaurarataka e dua me muria e dua na ivakarau ni bula. * (Vakarua 32:4) Koya gona, na cava eda sa mai kila? Oya ni vakatau vua na Kalou na ka me raica, ena veiraurau tale ga nona cakava qori.

Io, na tamata e dodonu me beitaki ena so na ca e yaco. Dikeva na ka e tukuna na iVolatabu ni vakavuna meda caka ca. “E vakatovolei na tamata yadua ni bacani koya qai siwati koya na nona gagadre ca. Ni sa matua na nona gagadre ca, sa qai vakasucuma na nona ivalavala ca; ni sa votu na nona ivalavala ca, qo ena vakavuna nona mate.” (Jemesa 1:14, 15) Nida vakatulewataka gona meda vakaceguya na noda gagadre ca eda na sotava ga na revurevu ni vakatulewa qori. (Roma 7:21-23) E laurai ena ivolatukutuku ni kawatamata ni dau vakararawataki ira eso tale na noda vakayacora eso na ca lelevu. Kena ikuri, na nodra veivakamuai na tamata ca era lai ca kina eso tale, lai tete kina na veika ca.—Vosa Vakaibalebale 1:10-16.

E dodonu beka vua na Kalou me tarovi keda mai na noda caka ca? Dikeva mada na sala eda buli kina. E tukuna na iVolatabu ni buli keda na Kalou meda ucui koya. E rawa gona nida vakaitovotaka na itovo ni Kalou. (Vakatekivu 1:26) E solia vei keda o koya na galala ni vakatulewa, kena ibalebale noda lomana se cakava na veika e vinakata ena vakatau vei keda. (Vakarua 30:19, 20) Ke vakasaurarataki keda na Kalou meda muria e dua na ivakarau ni bula, sega beka ni sa vakatanitaka tiko na galala ni vakatulewa e solia vei keda? Ke yaco qori, eda na vaka na misini e cakava ga na ka e porokaramutaki kina. Ena dina tale ga qori ke sa lewai rawa tu na ka ena yaco ena noda bula. Ia eda marau ni dokai keda na Kalou ena nona vakalaiva meda digitaka ga na ivakarau ni bula eda vinakata! E sega ni kena ibalebale qori nida sa na vakatulewa cala tu ga, se caka ca tu ga.

Ke o taroga e dua e lotu Idu se Buda ena ulutaga ni vola qo, era na rairai tukuna: “Era sotava na veika ca na tamata vinaka baleta na veika ca era vakayacora ena bula sa oti, qori na lawa ni Karma. E lauti ira na sui ni kedra.” *

Me baleta na ivakavuvuli ni Karma, e vinaka meda dikeva mada na veika e tukuna na iVolatabu me baleta na mate. E tukuna na Dauveibuli vua na imatai ni tamata o Atama ena were o Iteni, na vanua erau tiko kina na vuda: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” (Vakatekivu 2:16, 17) Ke sega ni talaidredre o Atama ke bula tiko ga me tawamudu. A mani mate ni talaidredre ina vakaro ni Kalou. Ena gauna eda sucu kina e “dewa na mate vei [keda] kece.” (Roma 5:12) Qori na vuna e tukuni kina, na “isau ni ivalavala ca na mate.” (Roma 6:23) E tukuna tale ga na iVolatabu: “O koya e mate e sa bokoci na nona ivalavala ca.” (Roma 6:7) Se da rawa ni kaya, ena sega tale ni qai saumi vei keda na isau ni noda ivalavala ca ena gauna eda sa mate kina.

E le milioni nikua era vakabauta ni Karma e vu ni noda rarawa na kawatamata. Kena ibalebale, o koya e vakabauta na ivakavuvuli qori ena ciqoma na veika rarawa cava ga e sotava. Ia na vakabauta qori e sega kina na inuinui ni na oti na veika ca. Era vakabauta e levu ni na wali ga ke vinaka na nodra itovo ra qai sega ni sucu tale, me tiko tale ga vei ira e dua na mataqali kilaka. Ia na ivakavuvuli qori e sega ni salavata kei na ka e kaya na iVolatabu. *

O Setani na Tevoro e vu levu duadua ni veika ca, sega ni tamata. A dua tu na agilosi yalodina ni Kalou, ia a “sega ni dei ena dina” vakavuna mera valavala ca na kai vuravura. (Joni 8:44) A vakavuna o koya na talaidredre ena were o Iteni. (Vakatekivu 3:1-5) E vakatokai koya o Jisu Karisito me “Vunica” e “lewa tiko na . . . vuravura taucoko.” (Maciu 6:13; Joni 14:30) Era sa muria tiko na kawatamata nikua na veiuqeti i Setani mera kua ni muria na sala vinaka i Jiova. (1 Joni 2:15, 16) E tukuna na 1 Joni 5:19: “E lewa tiko na Vunica na vuravura taucoko.” Era tiko tale ga eso na kabula vakayalo era imuri i Setani. E kaya na iVolatabu ni o Setani kei ira na nona timoni era “vakacala tiko na vuravura taucoko,” vakavuna me “rarawa na vuravura.” (Vakatakila 12:9, 12) Koya gona, e dodonu me beitaki o Setani na Tevoro ni vu ni veika ca e vuravura.

E matata gona ni sega ni vakavuna na Kalou na veika ca eda sotava; e sega tale ga ni vakavuna meda rarawa. Ena yasana adua, e yalataka o koya ni na vakaotia na veika ca, ena qai vakamacalataki qori ena ulutaga tarava.