VAKASAMATAKA mada ke cakava na nomu itokani nuitaki e dua na ka o sega sara ga ni vakabauta. So era vakalewa na ka a cakava kei na nona inaki, ra qai tukuna ni dau veivakalolomataki. Vakacava o na vakabauta na ka era tukuna, se o na rogoci koya mada? Vakacava ke sega ni tiko, o sa na vakalewa ga na ka e cakava qai sega ni waraki koya me tukuna na ka e yaco?

Ni bera ni o sauma na taro qori, ena rairai gadrevi mo kila eso tale na ka. O rawa ni taroga: ‘Au kilai noqu itokani vinaka? Na cava au dau taleitaki koya kina?’ Qori eso na taro veiganiti dina. Vakacava o rawa ni cakava tale ga qori mo kila kina se dau veivakalolomataki dina na Kalou se sega?

Rairai o dau vakataroga na vuna e cakava kina na Kalou eso na ka, se dau vakalaiva me yaco. E levu era na tukuna vei iko ni dau veivakalolomataki na Kalou ra qai uqeti iko mo vakalewa na ka e cakava. Vakacava ena totolo ga nomu vakalewai koya se o na saga mo kila e levu tale na ka me baleti koya? Na nomu isaunitaro e vakatau ena nomu kilai koya vinaka na Kalou. E vinaka mo taroga, ‘E vakacava sara mada na noqu veitokani kei na Kalou?’

O na rairai tukuna ni sega ni nomu itokani na Kalou ke o sotava tiko na veika dredre. Ia vakasamataka mada qo. E vakavuna tiko na Kalou na veika dredre o sotava se na veika vinaka? Eda sa raica mai ni o Setani e “turaga ni vuravura qo” sega ni o Jiova. (Joni 12:31) O Setani ga e vakavuna tiko e levu na rarawa kei na veika tawadodonu e vuravura. Vakacava na veika tawanamaki e dau yaco kei na noda sega ni uasivi, e rawa tale ga ni vakavuna qori na veika dredre eda sotava?

Ena yasana adua, na cava e sa bau cakava na Kalou? E tukuna na iVolatabu: E “buli lomalagi kei vuravura” na Kalou; okati kina na ‘veivakurabuitaki’ ni keda ibulibuli. E vakatokai Jiova mada ga me “Kalou, sa tiko e ligana na nomuni cegu.” (Same 124:8; 139:14; Taniela 5:23) Na cava e vakaibalebaletaka qori?

E kena ibalebale ni dodonu meda dolea lesu vua na Dauveibuli na noda vakavinavinaka, ni vakatau vua na noda bula. (Cakacaka 17:28) E isolisoli ni Kalou na bula, totoka ni ka e tu wavoliti keda, na noda veilomani kei na noda veitokani, noda taleitaka na ka eda kania, ka eda vakila, ka eda rogoca, kei na ka eda boica. (Jemesa 1:17) Me vaka ni vakarautaka na Kalou na isolisoli kece qori, e veiganiti meda okati koya me noda iTokani nuitaki da qai dokai koya.

So na gauna ena dredre mo nuitaka na Kalou. De dua o sega ga ni kilai koya vinaka. Ia kua ni yalolailai. E sega ni rawa ni vakamacalataki kece ena ulutaga sa oti na vuna era tukuna kina eso ni dau veivakalolomataki na Kalou. Vakacava ena yaga ke o saga mo kilai koya vinaka na Kalou? * Ke o cakava qori o na kila na ka dina me baleti koya. O na kila tale ga ni sega ni dau veivakalolomataki, “ni Kalou ga na loloma.”​—1 Joni 4:8.