Me vaka e vakamacalataki ena iVolatabu, na “vakabauta” e okati kina na nomu nuitaka dei e dua na ka e tiko na kena ivakadinadina matata. Ni dua e vakabauta na Kalou, ena nuidei ni na vakayacora na Kalou na ka kece e yalataka.

E laurai ena ivakarau ni bula i Mosese ni vakabauta na ka e yalataka na Kalou. (Vakatekivu 22:​15-18) A rawa sara ga ni marautaka na ivakarau ni bula vutuniyau e Ijipita, ia a vakanadakuya qori qai “digia ga me vakacacani vata kei ira na tamata ni Kalou, e sega ni vinakata me marautaka na ivalavala ca e lekaleka wale na kena kamica.” (Iperiu 11:25) A vakatulewa beka vakariri o Mosese qai veivutunitaka emuri? Sega, ni tukuna na iVolatabu ni o Mosese e “dei tu ga, e vaka ga e raici koya tiko e tawarairai.” (Iperiu 11:27) E sega vakadua ni veivutunitaka o Mosese na vakatulewa a cakava, ni yavutaki na nona vakabauta ena vosa ni yalayala ni Kalou.

A vukea eso tale o Mosese me dei na nodra vakabauta na Kalou. Kena ivakaraitaki, dikeva na ka a yaco ena gauna era tu kina na Isireli ena kedra maliwa na mataivalu i Fero kei na Wasa Damudamu, ra qai nanuma nira na sega ni dro bula rawa. Nira domobula na Isireli ena ka sa na vakarau yaco, era mani tagici Jiova kei Mosese. Na cava a qai cakava o Mosese?

De dua a sega ni kila o Mosese ni na vakarau wasea rua na Kalou na Wasa Damudamu, mera dro rawa kina na Isireli. Ia, a nuidei o Mosese ni na vakayacora na Kalou e dua na ka me taqomaki ira kina na nona tamata. E vinakata o Mosese mera nuidei tale ga na Isireli. Eda wilika: “A sa kaya vei ira na tamata ko Mosese, Mo ni kakua ni rere, ni tu vakadua, ka raica na veivakabulai i Jiova ena cakava vei kemuni edaidai.” (Lako Yani 14:13) Vakacava a vukei ira dina na Isireli o Mosese me dei na nodra vakabauta? Io, ni tukuna na iVolatabu me baleti ira na Isireli, wili kina o Mosese: “Ena vakabauta era takosova kina na Wasa Damudamu nira taubale ena qele mamaca.” (Iperiu 11:29) Na ivakaraitaki ni vakabauta i Mosese e sega ni yaga wale ga vua, e yaga tale ga vei ira era vakatotomuria.

Eda rawa ni vakatotomuri Mosese ke laurai sara ga ena noda bula nida vakabauta na veika e yalataka na Kalou. Kena ivakaraitaki, e yalataka na Kalou ni na vakarautaka na veika eda gadreva vakayago ke da vakaliuca ena noda bula na noda sokaloutaki koya. (Maciu 6:33) Ena rairai dredre meda kua ni vakaliuca na veika vakayago, baleta qori na ka era vakaliuca tu e levu nikua. Ia eda rawa ni vakadeitaka ni o Jiova ena vakarautaka na veika kece eda gadreva ke da saga meda bula rawarawa ga, da qai sega ni vakalaiva e dua na ka me vakalatilati ena noda sokaloutaki koya. E yalataka na Kalou: “Au na sega sara ni biuti iko se vakanadakui iko.”​—Iperiu 13:5.

Eda saga tale ga meda vukei ira eso tale me dei na nodra vakabauta. Kena ivakaraitaki, era kila na itubutubu yalomatua na itavi bibi era lesi kina mera vukei ira na luvedra me dei na nodra vakabauta na Kalou. Nira tubu cake, e gadrevi mera vakavulici na gone ni bula tiko na Kalou, ni o koya ga e vakavulici keda meda kila na ka e vinakata kei na ka e cata. Ena gadrevi tale ga mera vakadeitaka na gone ni vinaka duadua na nodra muria na ivakatagedegede i Jiova. (Aisea 48:​17, 18) Nira vukei ira na gone na itubutubu mera vakabauta ni “bula dina” na Kalou qai “vakaicovitaki ira era vakasaqarai koya ena yalogu,” era sa solia sara tiko ga vei luvedra e dua na isolisoli talei.​—Iperiu 11:​6, Holy Bible​—Easy-to-Read Version.