Vukei Ira na Vakaloloma
“O koya sa mata lomasoli ena kalougata; Ni sa solia na nona madrai me kedra na dravudravua.”—VOSA VAKAIBALEBALE 22:9.
Vuna era solevutaka kina eso na Kirisimasi.
Eso era via vakatotomuri Jisu ena nona dau vukei ira na dravudravua, tauvimate, kei ira na vakaloloma. Era nanuma ni Kirisimasi e gauna vinaka me caka kina qori, nira dau saga kina eso na isoqosoqo ni veivukei mera kumuna na cau.
Na cava e dredre kina me caka qori?
Ena gauna ni Kirisimasi e levu era dau ogaoga ena volivoli, lasa, sikovi ira na nodra itokani kei ira na nodra vuvale. Na ka kece qori e sega ni levu kina na nodra gauna, kaukaua se nodra ilavo mera vukei ira kina na dravudravua kei ira na vakaloloma, era na rairai sega ni rawa tale ga ni cau ena isoqosoqo ni veivukei.
Na ivakavuvuli vakaivolatabu cava e rawa ni vukei iko?
“Mo kakua ni bureitaka na ka vinaka vei ira e dodonu me nodra, ni sa rawa vei iko mo cakava.” (Vosa Vakaibalebale 3:27) Era sega ni sotava ga na leqa na dravudravua, o ira na via kana kei ira na vakaloloma ena gauna ni Kirisimasi. Ke o raica ni dua e gadreva tu na veivuke qai “rawa vei iko mo cakava” e dua na ka, na cava mo waraka sara kina na Kirisimasi mo qai cakava qori? O na vakalougatataki ni o vakaraitaka na veikauaitaki kei na yalololoma.
“Ena imatai ni siga kece e veimacawa, moni biuta vakatikitiki ena nomuni vale eso na ka me salavata kei na ka oni taukena. (1 Korinica 16:2) Qori na nona ivakasala na yapositolo o Paula vei ira na lotu vaKarisito taumada era via vukei ira na dravudravua. Vakacava mo ‘biuta vakatikitiki’ se maroroya eso na ilavo o rawa ni solia wasoma vei ira era gadreva na veivuke, se isoqosoqo ni veivuke e dau vakayagataka vakavuku na kena ilavo? Ni o cakava qori, o sa vakaraitaka sara tiko ga ni o kauaitaki ira na vakaloloma, o solia tale ga na ka o rawata.
“Moni kua tale ga ni guilecava na caka vinaka kei na nomuni wasea vei ira tale na so na ka e tu vei kemuni, ni taleitaka na Kalou na isoro va qori.” (Iperiu 13:16) Nanuma tiko ni sega wale ga ni dodonu meda ‘wasea vei ira eso tale na ka e tu vei keda,’ e dodonu tale ga meda “caka vinaka,” se veivuke. Kena ivakaraitaki, na itubutubu e yalomatua ena vakavulici luvedra mera vukei ira na itabaqase ena nodra cakacaka ni veisiga; mera vakayaloqaqataki ira na tauvimate ena nodra vola e dua na kad, veisiko, se qiriti ira; mera kauaitaki ira tale ga na gone era dravudravua se vakaleqai na ituvaki ni yagodra. Qori era na vulica kina na gone mera dau yalololoma qai veikauaitaki e veigauna.
Na itubutubu e yalomatua ena vakavulici luvedra mera vukei ira na itabaqase, na tauvimate, kei ira na gone e vakaleqai na ituvaki ni yagodra. Qori era na vulica kina na gone mera dau yalololoma qai veikauaitaki e veigauna
