iVola Mai Kirisi

Vunau ena iYalayala ni Vanua ena Ceva kei Urope

A TEKIVU yali tiko yani vakamalua na Ulunivanua totoka o Levká ena yanuyanu o Kiriti ni sa mua tiko na neitou waqa ina dua na yanuyanu e coka tu ina Mediterranean na kena ucunivanua. Keitou le 13 na gole tiko ena ilakolako qo, keitou qai vakanamata tu na vunau ina yanuyanu o Gavdos. Ke laurai na yanuyanu qori ena mape ena vaka ga e dua na digo, e vakaraitaka na yalayala ni vanua ena ceva kei Urope.

A nanumi ni na maravu na neimami soko ena siga katakata qo. Ia a qai liwa vakasauri e dua na cagi kaukaua, vakavuna me veisuayaki na waqa. Au lomaloma ca, au lai nanuma lesu na kena italanoa na yapositolo o Paula ena iVolatabu, a sotava tale ga na draki ca ena wasawasa vata ga qo ena vica na senitiuri sa oti​—a kilai tu ena gauna ya o Gavdos me o Kuta. (Cakacaka 27:13-17) Au diva ga me keitou yaco bula i Gavdos.

Sa qai votu mai na vanua keitou gole tiko kina, e levu kina na barivatu qai coka tu i wasawasa. E raraba na delana, e rauta ni 300 na mita na kena cere. Era tubu qai tete vakalevu ekea na vunipaini kei na veikau lalai e rauta ni 26 na kilomita vakarivirivi na vanua e robota. Ena so tale na yasa ni yanuyanu qo, e tete vakalevu kina na vuni zunipa me yaco i matasawa.

Ena dua na gauna era lewe 8,000 na tiko ena yanuyanu qo. Ia nikua e sega ni sivia na 40 na kedra iwiliwili na vakaitikotiko tudei ekea. Kena irairai ni sega ni vakatorocaketaki na yanuyanu qori. Dina ga ni dau soko ravita na kena baravi na waqa ni usa iyaya kei na waqa ni usa waiwai, ia e dua ga na waqa e dau veivakaleleci i Kiriti, e dau gole vakavudua ena vuku ni draki ca.

Keitou gole i Gavdos me keitou lai wasea vei ira na lewenivanua ekea e dua na itukutuku totoka qai veivakayaloqaqataki​—na inuinui ena yaco dina me baleta na gauna vinaka se bera mai kei na inuinui ni bula uasivi me tawamudu. Ni sa voleka ni kele na waqa, dua na ka na neitou nanamaki me keitou lai wasea na itukutuku vinaka qori.

Voleka ni va na aua na neitou suaigelegele voli qai laurai e matai keitou ni voravora na soko i ­Gavdos. Ia ni keitou vakacegu vakalailai, yadua na bilo kofi, keitou bulabula tale kina. Keitou raica vakalekaleka na itukutuku ni nona ilakolako na yapositolo o Paula ena iVolatabu salavata kei na neitou masu vagumatua. Oti keitou sa vakarau sara me keitou lai vunau.

Dua na ka na nodra yalovinaka qai veikauaitaki ekea. Era sureti keitou ena nodra vale, era vakarautaka tale ga eso na ka me keitou kania se gunuva. Keitou sega wale ga ni wasea vei ira na itukutuku vinaka mai na iVolatabu, keitou vukei ira tale ga ena so na ka me keitou vakavinavinakataka kina na nodra veikauaitaki. Dua keitou gole vata e daunilivaliva, ena gauna e vosa tiko kina vua e dua na marama, e raica ni leqa tu e dua na nona iyaya vakalivaliva mani tukuna sara vua na marama qori ni rawa ni vakavinakataka. Qori e uqeti koya sara ga, mani ciqoma na ivola vakaivolatabu keitou veisoliyaka, e vakavinavinakataki keitou tale ga kei na neitou cakacaka vakavunau. E dua tale na marama e vakavinavinakataki keitou qai tukuna: “Na nomudou cakacaka e vu vakalou, sega ni tamata, qai vakadinadinataki qori ena nomudou gole mai ena yanuyanu tu yawa qo mo dou mai vunau kina.”

E vaka mera taleitaka sara vakalevu na lewenivanua ekea na ivola vakaivolatabu keitou a kauta yani. E dua na turaga e ciqoma na mekesini Na Vale ni Vakatawa kei na Yadra! qai vinakata me wilika e levu tale na mekesini ena vulaililiwa. E dua tale na turaga e sega ni vinakata wale ga me so na nona mekesini, ia e vinakata tale ga me biu eso na mekesini ena nona sitoa mera wilika o ira na lai volivoli ena nona sitoa. E solia vei keitou na nona katonimeli me dau vakau kina na nona mekesini e veivula. Dua na ka nodratou kurabui e dua na vuvale ni keitou vakaraitaka ni cavuti tiko ena iVolatabu na yanuyanu lailai eratou tiko kina. Eratou taleitaka tale ga meratou taura na mekesini.

E veivakauqeti na nodra tataleitaki na lewenivanua, ia e vakaciriloloma dina na ilakolako qo ni so vei keitou era vakananuma lesu na ituvaki rarawataki a yaco ena yanuyanu qo ena gauna sa oti. E tiko voleka na toba o Sarakíniko e dua na vale era dau vesu tu kina o ira na saqata na ka vakapolitiki. Dua vei ira o Emmanuel Lionoudakis, e dua na iVakadinadina i Jiova, a kau vakavesu ekea ena icavacava ni 1930 ena vuku ni nona cakacaka vakavunau. * A kilai tu o Gavdos ena gauna oya me dua “na yanuyanu lala era kune ga kina na batibasaga, na vanua era . . . mate kina e levu ena walokai, vakararawataki kei na matedewa, oya na vuna e vakatokai kina me yanuyanu ni mate.” O Lionoudakis e ivakadinadina duadua ena vanua qo, e dau ogaoga ena vunau vei ira na vesu yani ekea, ia ena gauna vata qori e dau siwa me rawata kina na kena. Ni raica o luvena yalewa, vugona kei na makubuna yalewa na vanua a bula tu kina o Lionoudakis ena rauta na 70 na yabaki sa oti, e tarai ratou sara ga. E uqeti keitou dina na nona ivakaraitaki me keitou yalodina tiko ga qai gumatua ena cakacaka vakaitalatala.

O Gavdos e sega ni vanua taleitaki vei ira na tu vakavesu ekea. Ia ena muanimacawa qo, dua na ka na neitou marautaka na cakacaka vakavunau ekea, keitou solia rawa e 46 na mekesini kei na 9 na brochure vei ira na tamata yalovinaka ekea. Dua na ka na neitou rai vakanamata tu me keitou raici ira tale na neitou itokani vou oya!

Sa yaco mai na gauna me keitou sa na vakarau biubiu. Ia keitou se baci sotava tale na draki ca e vakavuna me keitou sega ni biubiu kina ena 5 ena yakavi. Keitou vodo i waqa ena 12 na bogilevu, ia keitou kila ni na dua tale na soko voravora. Sa qai biubiu na waqa ena tolu ena mataka, rauta ni lima na aua keitou vakila voli kina na voravora ni wasawasa, oti keitou sa qai yaco i Kiriti. Dua na ka na neitou wawale ena gauna keitou yaco kina e vanua, ia keitou marautaka ga ni sa bau vakatakilai na yaca i Jiova ena yanuyanu o Gavdos. (Aisea 42:12) Keitou duavata kece ni yaga dina na neitou ilakolako. Ena totolo ga na kena seavu na ituvaki dredre keitou sotava, ia keitou vakadeitaka ni na guiguilecavi dredre dina na neitou ilakolako qori.

[iVakamacala e ra]

[iYaloyalo ena tabana e 24]

O Trypití Cape, na iyalayala ni vanua ena ceva kei Urope

 [iYaloyalo ena tabana e 25]

Na toba o Sarakíniko, na valeniveivesu kei na vatu ceuti me kedra ivakananumi na kaivesu

[Credit Line]

Courtesy of Hellenic Post