E Rawa Vakacava Meda Daulotu, Qai Nuitaki?

NA CAVA e rua na ka e kilai kina na cakacaka vakaitalatala i Jisu? Kena imatai, e vinakata o Jisu me uqeta na lomadra na tamata mera veisau, sega ni veika vakapolitiki. Kena ivakaraitaki, dikeva na ka e vakabibitaka ena nona iVunau ena Ulunivanua. Ni bera ni vakamacalataka na bibi ni noda vaka na masima kei na rarama, e tukuna vei ira na vakarorogo nira na vakila ga na marau dina o ira era “kila nira gadreva na Kalou.” E tomana: “Era marau na yalomalua, . . . na yalosavasava, . . . [kei ira] era guta na bula veiyaloni.” (Maciu 5:1-11) E vukei ira nona imuri o Jisu mera raica ni bibi mera veisautaka nodra rai me salavata kei na ivakatagedegede ni Kalou ena ka vinaka kei na ka ca, e bibi tale ga mera qarava na Kalou mai vu ni lomadra.

Kena ikarua, ni raici ira na rarawa o Jisu, e uqeti koya na loloma me vakacegui ira. Ia e sega ni nona inaki me vakaotia kece na rarawa. (Maciu 20:30-34) E vakabulai ira na tauvimate, ia e sega ga ni oti na tauvimate. (Luke 6:17-19) E vakacegui ira na vakalolomataki, ia e vakavuna tiko ga na rarawa na ivakarau ca. E vakani ira na via kana, ia e levu era se vakila tiko ga na leqa ni kakana.​—Marika 6:41-44.

Veiuqeti Mera Veisau Qai Vakacegui Ira na Rarawa

Na cava e bibi kina vei Jisu me uqeta na lomadra na vakarorogo mera veisau qai vakacegui ira na rarawa, ia e sega ni veisautaka na veika vakapolitiki se vakaotia na rarawa? E kila o Jisu ni na qai vakayagataka na Kalou na nona Matanitu ena gauna se bera mai me vakarusai ira kece na matanitu vakatamata, me vakaotia tale ga na rarawa kece. (Luke 4:43; 8:1) Ni ratou kerei Jisu na nona tisaipeli me vakayagataka e levu na gauna ena nodra vakabulai na tauvimate, a tukuna vei ratou o Jisu: “Tou lako ina dua tale na vanua, ina veikoro voleka meu lai vunau tale ga kina, qo na vu ni noqu lako mai.” (Marika 1:32-38) O Jisu e vakaceguya e levu era vakararawataki tu, ia e bibi ga vua me vunautaka qai vakavulica na vosa ni Kalou.

Era dau saga na iVakadinadina i Jiova nikua mera vakatotomuri Jisu ena nodra cakacaka vakavunau. Era vinakata mera vakacegui ira na rarawa ena nodra dau veivuke ena gauna e gadrevi kina. Ia era sega ni saga na iVakadinadina mera vakaotia na ivakarau ca e vuravura. Era vakabauta ni Matanitu ni Kalou ena vakaotia na ka kece e vakavuna tiko na rarawa. (Maciu 6:10) Me vakataki Jisu ga, era saga mera uqeta na lomadra e levu mera veisau, sega ni veika vakapolitiki. E ka vakayalomatua mera cakava qori baleta na noda itovo e vu ni noda leqa na kawatamata, sega ni veika vakapolitiki.

Nuitaki

Era vakabauta tale ga na iVakadinadina i Jiova ni nodra itavi vaKarisito mera lewenivanua vinaka. Qori na vuna era doka qai rokova kina na veiliutaki ni matanitu. Era veiuqeti ena nodra ivola kei na nodra cakacaka vakavunau me muri na lawa. Ia era na sega ni talairawarawa ina matanitu ke lavaka na ka e veisaqasaqa kei na ivakaro ni Kalou. Era na “talairawarawa ga vua na Kalou, sega  vua na tamata.”​—Cakacaka 5:29; Roma 13:1-7.

Era dau sikova na itikotiko kece na iVakadinadina i Jiova mera veisureti ena kena vulici wale na iVolatabu. Na veivakavulici qori sa veisautaka rawa na nodra bula e milioni. Era vukei e veiyabaki e drau vakaudolu mera muduka na veika e rawa ni vakaleqa nodra bula me vaka na vakatavako, mateni, vakayagataki vakasivia ni wainimategaga, veimauilavo, kei na veiyacovi vakaveitalia. Nira bulataka na ivakavuvuli vakaivolatabu, e vinaka kina na nodra itovo ra qai nuitaki.—Raica na ulutaga “E Veisautaka na Bula na iVolatabu” ena tabana e 18 ni mekesini qo.

Na veivakavulici ena iVolatabu e vukei ira tale ga na lewenivuvale mera veidokai vakalevu, qai vakavinakataka na ivakarau ni nodra veivosaki. Na veivosaki va qori ena dei kina na nodra veiwekani na lewenivuvale. Ni dei na vuvale, ena dei tale ga na itikotiko.

Ni railesuvi na veika sa veivosakitaki oti mai ena vica na ulutaga sa oti, na cava o nanuma: E vakadonuya na iVolatabu na nodra bosoka vata eso na lotu kei na politiki? E matata na kena isau, e sega ni vakaivolatabu qori. Ia vakacava, e dodonu mera nuitaki na lotu vaKarisito dina? Io. Era na cakava vakacava qori? Nira muria na ivakaro i Jisu mera vaka na masima kei na rarama kei vuravura.

O ira era saga mera muria na idusidusi yaga i Karisito ena vinaka nodra bula, nodra vuvale, kei na nodra itikotiko. Era na marau na iVakadinadina i Jiova ena nomu itikotiko mera vakamacalataka vei iko eso tale na ka me baleta na cakacaka ni veivakavulici ena iVolatabu sa vakayacori tiko ena gauna qo. *

[iVakamacala e ra]

[Tikina bibi ena tabana e 10]

A saga o Jisu me uqeta na lomadra na tamata mera veisau, sega ni veika vakapolitiki

[Tikina bibi ena tabana e 11]

Era vakabauta na iVakadinadina i Jiova ni nodra itavi mera lewenivanua vinaka