“Sai au ko Jiova na Nomu Kalou, Ka’u na Taura na Ligamu i Matau”
Toro Voleka Vua na Kalou
“Sai au ko Jiova na Nomu Kalou, Ka’u na Taura na Ligamu i Matau”
NI RAU vakarau takosova e dua na gaunisala osooso, e kaya e dua na tama vei luvena tagane lailai: “Taura na ligaqu.” Ni qumia vinaka na ligai luvena o tama, e vakila o gone ni taqomaki, e sega kina ni rere. O vinakata tale ga me dua e tubera na ligamu qai vukei iko ena dredre ni bula eda donuya tu nikua? Ke vaka kina, ena rairai vakacegui iko na vosa a vola o Aisea.—Wilika Aisea 41:10, 13.
A volavola tiko o Aisea vei ira na Isireli. E okata na matanitu qo na Kalou me nona “[i]yau talei,” ia era bula maliwai ira tu na meca. (Lako Yani 19:5) Mera rere beka na Isireli? A vakayagataki Aisea o Jiova me vakasavuya e dua na itukutuku veivakayaloqaqataki. Nida dikeva na itukutuku qori, meda nanuma tiko ni vakaibalebale tale ga vei ira na dausokaloutaki Jiova nikua.—Roma 15:4.
E veiuqeti o Jiova: “Kakua ni ko rere.” (Tikina e 10) E sega ni vosa wale qori. A vakamacalataka o Jiova na vuna mera kua kina ni rere: “Ni’u sa tiko vata kei iko.” E sega ni tu mai vakayawa se yalataka me veivuke ga ke gadrevi. E vinakata mera kila na nona tamata ni tiko vata kei ira—vaka sara ga e tu e yasadra qai tu vakarau me vukei ira. E veivakacegui dina qori.
Sa qai vakadeitaka vei ira na nona dauveiqaravi o Jiova: “Kakua ni ko taqaya.” (Tikina e 10) Na vosa vakaIperiu e vakayagataki tiko eke e rawa ni vakaibalebaletaki ira era “veiraiyaki mera raica na ka e rawa ni vakaleqai ira.” A vakamacalataka o Jiova na vuna mera kua ni taqaya kina na nona tamata: “Ni’u sa nomu Kalou.” Era na nuidei sara ga nira rogoca qori. O Jiova e “Cecere sara,” e “Kaukaua” Duadua. (Same 91:1) Ni kaukaua duadua o Jiova na nodra Kalou, na cava mera rerevaka na Isireli?
Na cava ena cakava o Jiova vei ira era sokaloutaki koya? E yalataka: “Ka’u na tokoni iko e na ligaqu i matau sa daudina.” (Tikina e 10) E tukuna tale ga: “Sai au ko Jiova na nomu Kalou, ka’u na taura na ligamu i matau.” (Tikina e 13) Na cava o vakasamataka ni o rogoca na vosa qori? E vakamacalataka e dua na ivola: “Ni laurai vata e rua na tikinivolatabu qo eda raitayaloyalotaka kina e dua na itubutubu kei na luvena. E sega ni tu vakarau ga [o tama] me veitaqomaki, ia e tu sara ga e yasai gone; se mani cava e yaco ena sega vakadua ni yali mai yasana o luvena.” Raitayaloyalotaka mada—ena sega ni biuti ira na nona tamata o Jiova se vakanadakui ira se mani vakacava na dredre ni bula.—Iperiu 13:5, 6.
E veivakacegui dina vei ira na dausokaloutaki Jiova nikua na vosa i Aisea. Ni “vakilai . . . e levu na ka dredre” ena gauna qo, ena rairai vakayalolailaitaki keda na lomaocaocataki ni bula. (2 Timoci 3:1) Ia eda na sega ni valuta duadua na leqa qori. E tu vakarau me dodoka o Jiova na ligana qai qumia na ligada. Me vaka na gone e nuitaka na tamana, eda rawa tale ga ni qumia na ligana qaqa da qai nuidei ni na tuberi keda ena sala dodonu, ena vukei keda tale ga nida sotava na leqa.—Same 63:7, 8.
Wili iVolatabu e Vakatututaki ena Janueri:
