Taro Na Dauwiliwili . . .

Na cava na Amaketoni?

▪ Nira rogoca e levu na vosa “Amaketoni,” e votu mai na nodra vakasama na kena vakarusai na ka kece, na ivalu vakaniukilia, na leqa tubukoso ena kena ivakatagedegede ca duadua. Ia qori e sega ni ibalebale ni Amaketoni e tukuna na iVolatabu. Na cava ga na Amaketoni?

Na vosa “Amaketoni” e volai ena Vakatakila. Qori e dua na ivalu duatani sara, na “ivalu ni siga levu ni Kalou Kaukaua Duadua” era na soqoni vata kina “na tui ni vanua tawani kece kei vuravura” ena iotioti ni nodra vala kei na Kalou. E levu tale na tikinivolatabu e cavuti kina na ivalu qori.—Vakatakila 16:14-16; Isikeli 38:22, 23; Joeli 3:12-14; Luke 21:34, 35; 2 Pita 3:11, 12.

Na cava ena yaco ena ivalu qori? E tukuna vakaivakatakarakara vei keda na Vakatakila: “[Era] na soqoni yani . . . na tui kei vuravura, kei na nodra mataivalu mera vala kei koya e vodo ose tiko kei na nona mataivalu.” O “koya e vodo ose tiko” o Jisu Karisito na Luve ni Kalou, e lesi me liutaki ira na mataivalu agilosi mera vakarusai ira na meca ni Kalou. (Vakatakila 19:11-16, 19-21) E vakamacalataki ena Jeremaia 25:33 na iwiliwili ni tamata era na vakarusai nira sega ni qarava na Kalou: “Ia na vuetaki kei Jiova era na davo tu yani e na siga ko ya mai nai yalayala kei vuravura e dua ki nai yalayala kei vuravura kadua.”

Na cava me yaco kina na Amaketoni? Era sega ni vakamalumalumu na veimatanitu ina veiliutaki ni Kalou, ra via veiliutaki ga. (Same 24:1) E vakamacalataki na nodra veivorati ena Same 2:2: “Era sa tuvai valu na tui kei vuravura, a ra sa bose vata ko ira na kena turaga, me ra veivala kei Jiova, kei koya ka lumuta ko koya.”

O ira na dauveivorati qori era vakataki ira na yalokaukaua era dau tawana vakailoa na itikotiko ra qai vakarusa na veika e tu kina. Era vakacacana tale tiko ga nikua na vuravura na veimatanitu ra benuca tale ga na veika e tu wavoliti keda. Sa tukuna makawa tu mai na Vosa ni Kalou me baleta na ivalavala torosobu qori: “Era cudru vakalevu na veimatanitu, oni [Kalou] qai vakaraitaka na nomuni cudru.” Na Kalou ena “vakawabokotaki ira tale ga na vakarusai vuravura tiko.” (Vakatakila 11:18) Sa vakatulewataka na Kalou me na vakadinadinataki ena Amaketoni se o cei e dodonu me liutaka na kawatamata.—Same 83:18.

Ena yaco ninaica na Amaketoni? E vakamatatataka na Luve ni Kalou: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” (Maciu 24:36) Ia e veivakasalataki tale ga me baleta na Amaketoni na Tui Dauvala o Jisu Karisito: “Raica! Au na lako yani me vaka na daubutako. E marau o koya e yadra tiko.” (Vakatakila 16:15) Na ivalu ena tarai vuravura qori e sema ina nona tiko o Karisito, e vakadinadinataki ena parofisai vakaivolatabu nida sa donuya tu qo.

Era na vakarusai ga ena Amaketoni o ira era caka ca tiko ga, ia e dua na “isoqosoqo levu” era na vakabulai. (Vakatakila 7:9-14) O ira qori era na raica na vakayacori ni vosa qo: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:10, 11.

[Tikina bibi ena tabana e 10]

“Ia ko ira na yalomalumalumu era na taukena na vanua; ka na daumarau tiko e na veivakacegui vakaidina”