“iOtioti ga ni Bilo”

A TEKIVU gunu vakasivia o Amena ni se yabaki 11. * E dau lai qito kei ira nona ilala e veikau, ra dau matanataka tale ga na ka ra sarava ena iyaloyalo. Ra vakamurimuria tiko ga na ka e saravi, ia era gunu alakaolo sara tiko ga.

Sa qai toso cake ga na gunu nei Toni ni sa yabaki 40, sa sega ni dua se rua ga na bilo ena veiyakavi, ia sa lai lima sara se ono. Yaco me sega ni kila na levu ni ka e gunuva ena dua na siga.

A lai vaqara na iwali ni nona leqa o Amena. A sega ni via vakarorogo o Toni vei ratou nona vuvale kei ira nona itokani era kauaitaki koya. E bula tiko ena gauna qo o Amena me talanoataka na kena ituvaki; a mate ena vakacalaka o Toni ni a mateni tu qai draiva.

E tara nodra bula eso na nona gunu vakasivia e dua, e dau vakilai vakalevu ga kina na leqa. * Na gunu vakasivia e dau lai tini ena veivakalolomataki, veisavosa, na veibuturaki kei na laba, na vakacalaka e gaunisala se vanua ni cakacaka, kei na levu na veimataqali mate. Ena veiyabaki e vakayagataka na matanitu e bilioni vakacaca na dola ena vuku ni gunu vakasivia. Era vakila kina na mosi kei na rarawa o ira na gunu vakasivia, o ira na lewenivuvale, kei ira na gone.

E macala, “ni sega ni o ira kece na daugunu, e nodra leqa na gunu,” e tukuna na U.S. National Institutes of Health, “ra qai sega ni gunu e veisiga o ira e nodra malumalumu na gunu.” Levu vei ira na sega ni daugunu vakasivia, era sega ni kila nodra sa vakayagataka tiko vakasivia na gunu. Eso era gunu vakavudua ia era gunuva e sivia na lima na bilo ena dua ga na gauna.

Ke o vakatulewataka mo gunu, e vakacava sara mada na levu ni gunu e okati me sa sivia? O na kila vakacava na gauna mo sa kua ni gunuva “e dua tale na bilo”? (Vosa Vakaibalebale 23:​29, 30, Contemporary English Version) Ena yaga na veika e vakamacalataki ena rua na ulutaga e tarava.

[iVakamacala e ra]