Na iVolatabu e Uqeta na Veisau

Na cava e digia kina e dua na turaga e dau taleitaka na vodo motopai, wainimate gaga kei na qito, me cakacaka vakaitalatala vakatabakidua? Na cava e biuta kina e dua na turaga na veimauilavo me rawa ni qarava vinaka nona vuvale ena dua na cakacaka e kilai vakalawa? Na cava e uqeta nona sasaga lesu mai e dua na goneyalewa a tuberi ena vuvale iVakadinadina i Jiova, ia a vakanadakuya na ivakavuvuli vakaivolatabu? Wilika mada na ka ratou tukuna.

KENA ITUKUTUKU

YACA: TERRENCE J. O’BRIEN

YABAKI: 57

VANUA: OSITERELIA

KA E KILAI KINA: VAKATOVOLEA NA WAINIMATE GAGA, TALEITAKA NA VODO MOTOPAI

NOQU BULA ELIU: Au susu mai Brisbane, na koroturaga kei Queensland. Ratou lotu Katolika noqu vuvale, ia niu sa yabaki walu keitou sa sega ni lotu se veivosakitaka na ka ni lotu. Na gauna au yabaki tini kina, keitou toki ena Gold Coast e Ositerelia. Keitou vakaitikotiko volekata na baravi, au dau lai sili waitui qai vakasisisi e dela ni wai.

Au sotava e levu na ituvaki dredre ena gauna vakaitabagone. A biuti keitou o Ta niu se yabaki walu, vakamau tale o Nana, qai dau caka vakalevu e vale na gunu kei na veiba. Ena dua na bogi ni rau se qai veiba oti ga noqu itubutubu, au dabe toka ena noqu loga qai yalataka, kevaka au na vakawati au na sega ni veiba kei watiqu. Na ituvaki dredre qori a sega ni vakaleqa na neitou veivolekati vakavuvale.

Ena noqu bula vakacauravou, e levu noqu itokani era dau talaidredre, ra vakatovolea na mariwana, tavako, kei na so tale na wainimate gaga, ra gunu vakasivia tale ga. Au vakamuri ira qai sega ni kauaitaka e dua na ka. Dua tale ga na ka au taleitaka na vodo motopai, au sotava kina e vica na vakacalaka lelevu, ia au se saga ga meu wavokiti Ositerelia.

Au rawa ni cakava na ka au vinakata, ia au se lomabibi ga niu vakasamataka na ituvaki kei vuravura kei na nodra sega ni kauai e levu ena leqa e tarai keda tu. Au vinakata sara ga meu kila na ka dina me baleta na  Kalou, na lotu, kei na ituvaki kei vuravura. Ia niu taroga e rua na bete ni Katolika kei na so na iliuliu ni lotu Tawase, au sega ni marautaka na nodra isaunitaro. A tukuna vei au e dua noqu itokani meu veivosaki kei Eddie e dua na iVakadinadina i Jiova. Keirau veitalanoa vakava kei koya, e sauma kece noqu taro ena iVolatabu. Ena imatai ni veivosaki au kila niu sa kunea e dua na ka talei. Ia au nanuma ena gauna qori ni sega ni veiganiti meu veisautaka na ivakarau ni noqu bula.

VEISAUTAKI AU NA IVOLATABU: Ena noqu gade wavoki e Ositerelia au veitalanoa sara kei na dua tale na iVakadinadina. Ia niu lesu i Queensland, au a sega ni veitaratara kei ira na iVakadinadina me rauta e ono na vula.

Niu suka mai na cakacaka ena dua na siga, au raica sara e rua na turaga, rau vakaisulu vinaka qai yadua na kato, rau taubale tiko e gaunisala. Ena gauna au raici rau kina au nanuma ni rau iVakadinadina i Jiova. E donu na noqu nanuma ni keitou sota, au mani kerei rau me rau vakavulici au ena iVolatabu. Au lako sara ena nodra soqoni na iVakadinadina i Jiova qai tiko tale ga ena dua na soqo ni tikina a caka e Serene ena 1973. Ia ratou a sega ni taleitaka qori noqu vuvale, vakabibi o tinaqu. Na ituvaki qori kei na so tale a vakavuna meu muduka noqu veimaliwai kei ira na iVakadinadina. Au mani lai qito kirikiti tu me dua na yabaki, ni qori tale ga e dua na qito au dau taleitaka.

Au qai vakasamataka, ni gauna duadua ga au marau kina, na noqu a vuli iVolatabu tiko kei ira na iVakadinadina i Jiova. Au mani veitaratara kei ira, au lesu tale ena soqoni. Au tagutuva tale ga noqu veimaliwai kei ira na noqu itokani era dau vakayagataka na wainimate gaga.

A uqeti au na ivakaraitaki vakaivolatabu i Jope meu veisau. Keirau dau veitalanoataka na iVolatabu kei Bill, e dua na iVakadinadina yalovinaka sa dua toka na itaba. Ni oti neirau veivosakitaki Jope, a taroga sara o Bill se o cei tale e beitaka tiko o Setani ni sega ni qaravi Jiova mai vu ni lomana. (Jope 2:​3-5) Au tukuni ira kece au kila ena iVolatabu, qai tukuna toka ga o Bill, “Io, koya tale ga.” Oti a raici au mai qai tukuna, “e tukuna tale tiko ga qori me baleti iko o Setani!” Vovoleka sara meu lutu mai na dabedabe au dabe tiko kina. Ni se bera ni keirau vulici Jope, au a sa kila tu ni dina na ka au vulica. Ia au sa qai kila qo na vuna meu bulataka kina na ka au vulica. Ni oti ga e va na vula, au papitaiso sara meu dua na iVakadinadina i Jiova.

KENA YAGA: Au sega ni via vakasamataka na ka e rawa ni yacovi au, keu a sega ni bulataka na ivakavuvuli vakaivolatabu rairai au sa mate. Levu noqu itokani era daugunu se vakayagataka na wainimate gaga era sa mate, e vakaleqai tale ga nodra vuvale. Au dau vakasamataka ke a va tale ga ya noqu bula.

Ena gauna qo au sa vakamau kei Margaret, keirau veiqaravi tiko ena valenivolavola ni tabana ni iVakadinadina i Jiova e Ositerelia. E sega ni dua ena noqu vuvale a tomani au ena noqu qaravi Jiova. Ia ena veiyabaki sa sivi keirau marautaka neirau vakavulica eso kei na so na veiwatini mera veisautaka nodra bula, me vakataki au. E levu sara neirau  itokani vinaka. Kuria qori nona tokoni au vakalevu o Margaret, e tuberi mai na vuvale iVakadinadina i Jiova, meu dina tiko ga ena yalayala au a cakava ena 40 na yabaki sa oti. Sa sivia qo e 25 na yabaki neirau marautaka tiko neirau bula vakawati. E duidui neirau rai, ia me yacova mai qo keirau se sega ni bau veiba. Keirau vakavinavinakataka na veidusimaki ni iVolatabu ena vuku ni tikina qori.

KENA ITUKUTUKU

YACA: MASAHIRO OKABAYASHI

YABAKI: 39

VANUA: JAPANI

KA E KILAI KINA: DAUVEIMAUILAVO

NOQU BULA ELIU: Au susu mai Iwakura, dua na vanua lailai, e rauta ni tolusagavulu na miniti ke o vodo tereni (train) mai Nagoya. Au nanuma lesu nodrau dauveikauaitaki noqu itubutubu. Au qai kila emuri ni lewena tu e dua na ilawalawa voravora o tamaqu, na yacana na yakuza. Keitou lewe lima e vale, a daucakacaka veidabui o neitou Ta me qaravi keitou kina. E daugunu vakasivia e veisiga, a mate o tamaqu niu sa yabaki 20 ni tauvi koya na mate ni liva.

E turaga ni Korea o tamaqu, ya na vuna era sega ni taleitaki keitou kina na lewenivanua. Na ituvaki qo kei na so tale e vakaleqa sara ga noqu bula vakaitabagone. Au vuli ena dua na sekeneri, ia au dau vakalutu vuli qai dua ga na yabaki na dede ni noqu vuli. E dredre na vaqara cakacaka ni a dua tu noqu kisi vakaovisa, kuria qori niu tikitiki Korea. Au mani kunea rawa e dua, ia a mavoa kina na duruqu, mai oti tale ga e keri na noqu rawa ni cakacaka kaukaua.

Au rawailavo ena noqu qitora e dua na mataqali veimauilavo, na pachinko. Gauna qori, keirau sa tiko vata kina kei na dua na goneyalewa e vinakata meu qara e dua na cakacaka kilai vakalawa, me keirau qai vakamau. Ia sa bau levu toka na ilavo au rawata ena veimauilavo, au a sega tale ga ni via veisautaka noqu ivakarau ni bula.

VEISAUTAKI AU NA IVOLATABU: Dua na siga e veisiko mai e dua na iVakadinadina i Jiova ena noqu vale, qai biuta toka e dua na ivola na Life​​—⁠How Did It Get Here? By Evolution or by Creation? Au se qai raica vakadua na taro qo. Ia niu wilika na ivola, au vinakata meu kila e levu tale na ka ena iVolatabu. Au dau lomatarotarotaka tu na kedra ituvaki na mate. Ni saumi vakamatata noqu taro mai na iVolatabu, e vaka sara ga e lutu mai mataqu na vari ni ika.

Au raica ni veiganiti meu bulataka sara ga na ka au vulica ena iVolatabu. Au mani vakalawataka noqu vakawati, muduka na  vakatavako, kotiva vakalekaleka na uluqu damu qai savasava tale ga na kequ irairai. Au biuta tale ga na veimauilavo.

E sega ni rawarawa na veisau qo. Kena ivakaraitaki, au sega ni biuta rawa na vakatavako ena noqu kaukaua ga. A rawa ga ena noqu masu vagumatua kei na noqu vakararavi vua na Kalou o Jiova. A sega ni rawarawa tale ga na matai ni noqu cakacaka niu cegu mai na qito pachinko. Na noqu cakacaka vou e dredre qai vakalomaocaocataki au, e lailai tale ga na ilavo au rawata ni vakatauvatani kei na veimauilavo. Dua na tikinivolatabu a vukei au na Filipai 4:​6, 7. E tukuna: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka; ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” Au vakila sara ga ena levu na gauna na dina ni vosa qo.

KENA YAGA: A sega ni taleitaka o watiqu na imatai ni gauna au vulica kina na iVolatabu kei ira na iVakadinadina i Jiova. Ia ni raica na veisau ni noqu bula, a tomani au tale ga ena vuli, keirau lako vata ena soqoni ni iVakadinadina i Jiova. Nikua keirau sa iVakadinadina i Jiova ruarua. Keirau kalougata dina ni keirau qaravi Jiova ena duavata!

Au nanuma niu marau ni bera niu vulica na iVolatabu. Ia qo au sa qai kila na cava na marau dina. Na bulataki ni ivakavuvuli vakaivolatabu e sega ni rawarawa, ia au kila ni ivakarau ni bula vinaka duadua.

KENA ITUKUTUKU

YACA: ELIZABETH JANE SCHOFIELD

YABAKI: 35

VANUA: PERITANIA

KA E KILAI KINA: VAKANAMATA ENA MUANIMACAWA

NOQU BULA ELIU: Au susu mai Hardgate, na taoni lailai e vica toka na kilomita mai Glasgow, e Sikoteladi. A iVakadinadina i Jiova o tinaqu niu se qai yabaki vitu, a tuberi au tale ga ena iVolatabu. Ia niu yabaki 17, au taleitaka na veimaliwai kei ira noqu ilala, lako ena valenidanisi, vakarogo ivakatagi karakaravisa, kei na gunu alakaolo. Sega sara ni lomaqu meu vulica na veika vakayalo. Au dau vinakata ga me totolo mai na muanimacawa. Ia a veisau kece qori niu sa yabaki 21.

Au gade vei ira na wekaqu ena vualiku kei Ailadi. Niu tiko e kea au donuya sara e dua nodra tayabe na lotu Tawase, na yacana na Orange Walk. Au kidroataka nodra veivakaduiduitaki kei na nodra veicati na Katolika kei na lotu Tawase. Au lialiaci sara ga ena ka au raica ya. Au nanuma lesu noqu vuli iVolatabu kei tinaqu kei na nona dau tukuna ni Kalou e sega ni taleitaki ira era sega ni via muria nona ivakatagedegede. Au liaca kina niu muri lomaqu tiko ga, au sega ni taura vakabibi na veika e vinakata vei au na Kalou. Au mani vakadeitaka kina ni gauna au na lesu kina i Sikoteladi au sa na lai vakelia se cava dina e tukuna na iVolatabu.

VEISAUTAKI AU NA IVOLATABU: Au madua qai vaka e vou tale vei au na noqu lesu ena nodra soqoni na iVakadinadina i Jiova. Era kauaitaki au na lewe ni ivavakoso, ia a kauaitaki au vakalevu cake e dua na marama ni raica noqu bulataka na ka au vulica ena iVolatabu. Qori e vakayaloqaqataki au sara ga. Ia se ra saga tiko ga noqu itokani meu lako vata kei ira ena valenidanisi, ia au vakamacalataka ga vei ira niu sa na muria ga na ivakatagedegede vakaivolatabu. Ni toso na gauna sa sega tale nira sureti au.

Au nanuma tu eliu ni iVolatabu e dua ga na ivola ni lawa. Ia qo sa veisau noqu nanuma, au vakasamataki ira era volai ena iVolatabu nira a bula dina, era tamata vakataki au ga, e tiko na nodra malumalumu. Era daucala tale ga, ia e vosoti ira o Jiova nira veivutuni dina. Au kila niu a vakanadakui Jiova niu se itabagone, ia au nuidei ni na rawa ni vosoti au qai guilecava tale ga noqu cala eliu keu vakamarautaki koya tiko ga.

E uqeti au tale ga na ivakaraitaki i tinaqu ni a sega ni vakanadakui Jiova. Niu raica nona yalodina, au vakasamataka kina na yaga ni noda qaravi Jiova. Niu se gone, au sega ni dau taleitaka na lai cakacaka vakavunau kei tinaqu, kei na levu ni gauna e vakayagataki kina. Nikua au sa vinakata sara ga meu muria na vosa i Jisu ena Maciu 6:​31-​33, ni tukuna: “Meda kua gona ni lomaocaoca meda kaya, ‘Na cava meda kania?’ se, ‘Cava meda gunuva?’ se, ‘Cava meda tokara?’ . . . e kila tu na Tamamuni vakalomalagi ni bibi vei kemuni. “Moni vakaliuca tiko ga na matanitu ni Kalou kei na nona yalododonu, ena qai soli vei kemuni na ka kece qo.” Au cegu mai noqu cakacaka saumi ni oti ga noqu papitaiso qai vaqara e dua na cakacaka vagauna meu rawa ni cakacaka kina vakaitalatala vakatabakidua.

KENA YAGA: Niu se itabagone, au sega ni lomavakacegu ena noqu dau vakanamata ena muanimacawa. A sega ni vakainaki noqu bula. Ena gauna qo au lomavakacegu niu qaravi Jiova vakatabakidua, vakainaki tale ga noqu bula. Au sa vakawati, keirau dau veisiko kei watiqu ena nodra ivavakoso na iVakadinadina i Jiova me keirau vakauqeti ira. Au raica me dokai duadua na cakacaka qo. Au vakavinavinaka vei Jiova ni solia tale vei au na gauna meu veisau!

[Tikina bibi ena tabana e 29]

“Ena imatai ni veivosaki au kila niu sa kunea e dua na ka talei. Ia au nanuma ena gauna qori ni sega ni veiganiti meu veisautaka na ivakarau ni noqu bula”

[Tikina bibi ena tabana e 31]

“Au sega ni biuta rawa na vakatavako ena noqu kaukaua ga. A rawa ga ena noqu masu vagumatua kei na noqu vakararavi vua na Kalou o Jiova”

 [Tikina bibi ena tabana e 32]

“Au nanuma tu eliu ni iVolatabu e dua ga na ivola ni lawa. Ia qo sa veisau noqu nanuma, au vakasamataki ira era volai ena iVolatabu nira a bula dina, era tamata vakataki au ga, e tiko na nodra malumalumu”