Nona Taukeni Keda o Jiova​—E iLoloma Soli Wale

“Eda nei Jiova.”​—ROMA 14:8.

1, 2. (a) Na ka talei cava e dulaki vei keda? (b) Na taro cava soti eda na dikeva?

A DULAKA o Jiova vei ira na Isireli e dua na ka talei ena nona kaya: “Dou na qai noqui yau talei, kai yau lailai na matanitu kecega.” (Lako 19:5) E talei tale ga nikua vei keda kece na lotu vaKarisito ni taukeni keda o Jiova. (1 Pita 2:9; Vkta. 7:​9, 14, 15) Qo e dua na ka talei e tawamudu na kena yaga.

² E sega ni talei wale ga ni taukeni keda o Jiova, e tiko tale ga na kena icolacola. Era na vakasamataka beka eso: ‘Au rawa ni cakava beka na veika e namaka vei au o Jiova? Ena biuti au beka keu caka cala? Au vesuki beka ni taukeni au o Jiova?’ E bibi meda vakasamataka vinaka na veitikina qo. Ia meda dikeva tale mada e dua na taro bibi: Na cava eso na ka yaga eda vakila ni taukeni keda o Jiova?

E Vakavumarau ni Taukeni Keda o Jiova

3. E yaga vakacava vei Reapi nona vakatulewataka me qaravi Jiova?

³ Era vakila beka na kena yaga o ira e taukeni ira o Jiova? Vakasamataki Reapi mada, e dua na yalewa dautagane a tiko ena koro makawa o Jeriko. Sega ni vakatitiqaqataki ni a susugi mai ena sokalou vakasisila ni nodra kalou na kai Kenani. Ia ni rogoca nona veivakabulai o Jiova vei ira na Isireli, e vakadeitaka sara ga ni Kalou dina ga o Jiova. A bolemate ena nona taqomaki rau na tamata digitaki ni Kalou, qai vakatautaka  vei rau na nona bula. E tukuna na iVolatabu: “E sega beka ni okati me yalododonu [o Reapi] ena nona cakacaka ni a maroroi rau na italai, qai tukuna me rau muria e dua tale na sala?” (Jeme. 2:25) Vakasamataka mada na yaga ni nona duavata kei ira na dausokalou savasava, era vakavulici vakayalololoma qai vakadodonu ena lawa ni Kalou. Sa na wacava nona marau ni sa vakanadakuya nona ivakarau ni bula makawa! A vakamautaka e dua na Isireli, e tubera na luvena tagane o Poasa qai yaco me dua na turaga yalodina ni Kalou.​—Josua 6:25; Ruci 2:​4-12; Maciu 1:​5, 6.

4. E yaga vakacava vei Ruci nona digia me qaravi Jiova?

⁴ E vakatulewataka tale ga o Ruci na yalewa ni Moapi me qaravi Jiova. Rairai a dau sokaloutaki Kimosi kei na nodra kalou na kai Moapi ena gauna se goneyalewa kina. Ia e qai mai kilai Jiova na Kalou dina, qai vakamautaka tale ga e dua na turaga ni Isireli a dro mai ena nona vanua. (Wilika Ruci 1:​1-6.) Nodrau tomani Neomai na vugodrau ena nona ilakolako i Peceliema, o rau na veikaruwani o Ruci kei Oripa, a uqeti rau me rau lesu tale ina nodrau vanua. Ena sega ni ka rawarawa me rau lai vakaitikotiko e Isireli. A lesu o Oripa “vei ira na kai nona, kei na nona kalou,” ia a sega ni gole o Ruci. Na ka e cakava e salavata kei na nona vakabauta, a kila na vanua e dodonu me gole kina. E tukuna vei Neomai: “Mo kakua ni cikevi au me’u laivi iko, ka me’u lesu me’u kua ni muri iko; ni’u na lako ki na vanua ko sa lako kina; ia na vanua ko tiko kina ka’u na tiko talega kina: ia na kai nomu era na kai noqu, na nomu Kalou talega ena noqu Kalou.” (Ruci 1:​15, 16) A vakila na yaga ni Lawa ni Kalou o Ruci ena nona digia me qaravi Jiova, baleta ni vakarautaki kina na nodra kauaitaki na yada, na dravudravua kei ira e sega nodra qele. A vakila kina na marau qai nuidei ena nona veitaqomaki o Jiova.

5. Na cava o dikeva rawa vei ira na qaravi Jiova ena yalodina?

⁵ O na rairai kila eso ni oti ga nodra yalataki ira vei Jiova, era veiqaravi tu ga ena yalodina me vica vata na yabaki. Tarogi ira se yaga vakacava na nodra veiqaravi. Dina ni sega ni dua e galala ena leqa, e donu vinaka kina na vosa ni daunisame: “Sa kalougata na tamata . . . sa nodra Kalou ko Jiova.”​—Same 144:15.

E Yalorawarawa o Jiova

6. Na cava meda kua kina ni lomaocaocataka noda sega ni cakava rawa na veika e namaka vei keda o Jiova?

⁶ O na rairai vakasamataka, o rawa ni cakava na veika e namaka vei iko o Jiova se sega. E rawa nida lomaocaocataka na veika e vauci ena noda qarava na Kalou, muria nona lawa kei na noda matataki koya. Kena ivakaraitaki, a beci koya o Mosese ni na sega ni vosa rawa ena gauna a talai kina me vosa vei ira na Isireli kei na tui Ijipita. Ia a yalorawarawa na Kalou ena nona sega ni namaka vakasivia na ka vei Mosese. O Jiova a qai ‘vakavulica vua na ka  me cakava.’ (Wilika LakoYani 3:11; 4:​1, 10, 13-15.) Ni ciqoma o Mosese na veidusimaki ya, a marau kina ni cakava na loma ni Kalou. E va tale ga qori na nona yalorawarawa vei keda o Jiova. E kila vinaka nida ivalavala ca, e vinakata tale ga me vukei keda. (Same 103:14) E veivakacegui noda qarava na Kalou nida imuri i Jisu qai sega ni vakavu lomaocaoca. Qori na ivakarau ni bula e yaga vei ira eso tale, e marau tale ga kina o Jiova. E kaya o Jisu: “Ni lako mai vei au . . . au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga.”​—Maciu 11:​28, 29.

7. Na cava mo nuidei kina ni na vukei iko o Jiova ena veika e vinakata mo cakava?

⁷ Kevaka eda vakararavi vakatabakidua vei Jiova, ena tu vakarau o koya me vakayaloqaqataki keda ena gauna eda gadreva kina. Kena ivakaraitaki, a sega soti ni madila ena vosa o Jeremaia. Ia ni lesi koya o Jiova me nona parofita, e kaya o Jeremaia: “Isa, noqu Turaga Jiova! raica, ka’u sa sega ni kila vosa: ni’u sa gone ga koi au.” E kaya tale emuri: “Au na sega ni cavuti koya, se vosa tale e na yacana.” (Jere. 1:6; 20:9) Nona veivakayaloqaqataki o Jiova, e vunautaka rawa o Jeremaia ena loma ni 40 na yabaki na itukutuku era sega ni taleitaka na tamata. A vakavica nona vakadeitaka o Jiova vei koya: “Ni’u sa tiko vata kei iko . . . me’u vakabulai iko.”​—Jere. 1:​8, 19; 15:20.

8. Eda na vakaraitaka vakacava nida nuitaki Jiova?

⁸ Me vaka ga nona vakayaloqaqataki Mosese kei Jeremaia o Jiova, ena rawa tale ga ni vukei keda nikua meda cakava na veika e namaki vua e dua na lotu vaKarisito. E bibi duadua meda nuitaka na Kalou. E kaya na iVolatabu: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” (Vkai. 3:​5, 6) Eda na vakaraitaka noda nuitaki Jiova ena noda vakayagataka vinaka na veika e vakarautaka nona Vosa kei na ivavakoso. Nida muria nona veidusimaki ena sega ni dua na ka ena vakacaraka noda yalodina vua.

E Kauaitaki Keda Yadudua O Jiova

9, 10. Na veitaqomaki vakacava e yalataki ena ika91 ni Same?

⁹ Nira vakasamataka tiko eso mera yalataki ira vei Jiova, era leqataka de ra qai caka cala, se sega na betedra qai biuti ira o Jiova. Eda marau ni vakarautaka o Jiova na idusidusi kece me karoni kina noda veiwekani talei kei koya. Meda dikeva mada na kena vakamacalataki qo ena ika91 ni Same.

¹⁰ E tekivuna na daunisame: “O koya sa tiko e na nona yasana vuni ko Koya na Cecere sara, ena tiko ga e na yaloyalo i Koya sa Kaukauwa. Au na kaya e na vuku i Jiova, o koya ga na noqui drodro kei na noqu bai ni valu: na noqu Kalou; au na vakararavi vua. Ni na vakabulai iko dina mai na nona tudai na tamata sa daubiri dai.” (Same 91:​1-3) Dikeva ni yalataka o Jiova nona veitaqomaki vei ira na lomani koya, ra nuitaki koya tale ga. (Wilika Same 91:​9, 14.) E veitaqomaki vakacava? Ena gauna makawa, a taqomaki ira nona dauveiqaravi o Jiova ena so na ituvaki, me vakabula kina na yatukawa e basika kina na Mesaia yalataki. Ia e levu tale na dauveiqaravi yalodina era bala e valeniveivesu, vakararawataki qai vakamatei ena veivakamuai ni tevoro, mera muduka kina nodra yalodina vua na Kalou. (Iper. 11:​34-39) Era vosota rawa baleta ni taqomaki ira vakayalo o Jiova mera yalodina tiko ga kina vua. O koya gona, eda dikeva ena ika91 ni Same ni yalataki kina na veitaqomaki vakayalo.

11. Na cava ‘na yasana vuni i Koya sa Cecere Sara,’ o cei ena taqomaka kina na Kalou?

¹¹ E tukuna na daunisame ‘na yasana vuni i Koya na Cecere sara,’ e vakatayaloyalotaka na vanua ni veitaqomaki vakayalo. O ira na tiko kina mera vulagi ni Kalou, ena sega ni dua na ka e rawa ni vakaleqa nodra vakabauta kei na nodra lomana na Kalou. (Same 15:​1, 2; 121:5)  E vanua vuni, baleta nira sega ni kila rawa na tawavakabauta . Na vanua qo ena taqomaki ira kina o Jiova era kaya: ‘O kemuni na noqu Kalou; au na vakararavi vei kemuni.’ Kevaka eda tiko ga ena koro ni drodro qo, eda na sega ni leqataka vakasivia nona veivakadonui na Kalou ena noda tacori ena dai i Setani, na “daubiri dai.”

12. Na cava eso na ka e rawa ni vakaleqa noda veiwekani kei na Kalou?

¹² Na cava eso na ka e rawa ni vakaleqa noda veiwekani talei kei na Kalou? E vakamacalataka eso na ka vakarerevaki na daunisame, me vaka “na mate dauveiveitauvi sa lako voli e na butobuto; se na vu ni veivakamatei sa dauia e na siga levu.” (Same 91:​5, 6) Levu sa coriti ira o koya na “daubiri dai,” nira via lewai ira ga. (2 Kor. 11:3) E rawai ira tale eso ena yalo kocokoco, dokadoka, kei na domodomoiyau. E levu tale era vakacalai ena ivakavuvuli ni boletaki vanua, na bula vakaidewadewa kei na ivakavuvuli ni lotu lasu. (Kolo. 2:8) Levu tale ga era tacori ena veiyacovi vakasisila. Na itovo kece qo e vaka na mate dauveitauvi e veivakaleqai vakayalo, e vakavuna vei ira e milioni mera muduka nodra lomana na Kalou.​—Wilika Same 91:​7-10; Maciu 24:12.

Taqomaka Nomu Veiwekani kei na Kalou

13. E taqomaki keda vakacava o Jiova ena ka ni veivakaleqai vakayalo?

¹³ E taqomaki ira vakacava nona tamata o Jiova ena ka ni veivakaleqai vakayalo sa cavuti oti mai? E tukuna na daunisame: “Ni na vakaroti ira na nona agilosi ko koya e na vukumu, me ra maroroi iko e na nomui lakolako kecega.” (Same 91:11) Era veidusimaki ra qai taqomaki keda na agilosi vakalomalagi meda vunautaka kina na itukutuku vinaka. (Vkta. 14:6) Me ikuri ni nodra veitaqomaki na agilosi, o ira na qase ni ivavakoso era dei ena ivakavuvuli vakaivolatabu nira taqomaki keda mai na veivakacalai ni ivakavuvuli lasu. Era rawa ni vukei ira yadudua era saga tiko mera vorata na yalo ni vuravura. (Taito 1:9; 1 Pita 5:2) E vakarautaka tale ga na “dauveiqaravi e yalodina e vuku” na kakana vakayalo me taqomaki keda mai na ivakavuvuli lasu ni bula vakaidewadewa. E taqomaki keda tale ga ena veibacani ni gagadre vakasisila, na qarai ni iyau kei na rogo, kei na levu tale na gagadre kei na veivakamuai e veivakaleqai. (Maciu 24:45) O a vorata vakacava eso na ka ni veivakaleqai qori?

14. Eda na vakayagataka vinaka vakacava na veitaqomaki e vakarautaka na Kalou?

¹⁴ Na cava meda cakava meda taqomaki tiko ga kina ena “yasana vuni” ni Kalou? E macala nida dau qaqarauni ena ka e rawa ni veivakaleqai me vaka na vakacalaka, ira na daubasulawa, se na matedewa. E va tale ga ya na noda dau qaqarauni mai na ka e dau veivakaleqai vakayalo. Meda vakayagataka gona vakawasoma na veidusimaki i Jiova e vakarautaki ena noda ivola tabaki, na soqoni vakaivavakoso, soqo ni tabacakacaka kei na soqo  ni tikina. Eda na qara nodra veidusimaki na qase. E yaga tale ga vei keda na itovo era kilai kina na tacida lotu vaKarisito. Io, noda veimaliwai ena ivavakoso e uqeti keda meda vuku.​—Vkai. 13:20; wilika 1 Pita 4:10.

15. Na cava mo nuidei kina ni na taqomaki iko o Jiova mai na ka e rawa ni vakaleqa nomu vakadonui?

¹⁵ Eda sega ni vakatitiqataka ni o Jiova ena taqomaki keda mai na ka e rawa ni vakavuna noda sega ni vakadonui. (Roma 8:​38, 39) A dau taqomaka na ivavakoso mai vei ira na meca kaukaua vakalotu, vakapolitiki tale ga. E sega ni nodra inaki mera vakamatei keda, ia mera tawasei keda ga mai vua na noda Kalou savasava. E vakadinadinataki kina na yalayala i Jiova ni kaya: “Nai yaragi kecega sa caka me kemu ena sega ga ni yaco.”​—Aisea 54:17.

O Cei e Veisereki?

16. Na cava e sega ni solia kina vei keda o vuravura na bula galala?

¹⁶ Eda vesuki beka ni taukeni keda o Jiova? Kena veibasai ga, eda vesuki ga nida veitokani kei vuravura. E yawaki Jiova o vuravura, qai liutaka tu e dua na kalou ca e veivakabobulataki. (Joni 14:30) Kena ivakaraitaki, e vesuki ira tu na tamata na leqa vakailavo ena ituvaki e lewa tu qo o Setani. (Vakatauvatana Vakatakila 13:​16, 17.) Na bula ivalavala ca e vakabobulataki ira tale ga na tamata. (Joni 8:34; Iper. 3:13) De ra yalataka o ira na tawavakabauta na bula galala, nodra vakatara na ivakarau ni bula e sega ni salavata kei na ivakavuvuli i Jiova. O koya e vakamuria ena totolo ga nona vakabobulataki ena bula ivalavala ca qai torosobu.​—Roma 1:​24-32.

17. E vagalalataki keda vakacava o Jiova?

¹⁷ Ena yasana adua, ke da vakararavi vei Jiova ena vagalalataki keda o koya ena ka kece ga e rawa ni veivakaleqai. So na gauna, eda na vaka sara ga nona nuitaka e dua nona veiqaravi na vuniwai ni veisele, me vagagalataki koya mai na leqa e rawa ni vakaleqa nona bula. Eda bula kece tiko ena dua na ituvaki rerevaki, ya nida sucu ivalavala ca. Kevaka wale ga eda nuitaki Jiova ena vuku ni nona isoro ni veivoli o Karisito, ena rawa nida sereki mai na ivau ni ivalavala ca da qai bula tawamudu. (Joni 3:36) Me vaka ga noda nuitaki koya na vuniwai ni veisele ena noda kilai koya vinaka, eda na nuitaki Jiova tale ga vakalevu ke da vulica wasoma na veika baleti koya. O koya gona, meda tomana tiko ga noda vulica vakavinaka na Vosa ni Kalou, baleta na noda cakava qori ena uqeti keda meda lomani koya da qai sega ni leqataka nona taukeni keda na Kalou.​—1 Joni 4:18.

18. Na cava era na vakila o ira e taukeni ira o Jiova?

¹⁸ O Jiova e solia vei keda kece na galala ni vakatulewa. E kaya nona Vosa: “Mo ni digitaka mada na bula, mo ni bula kina, koi kemuni kei na nomuni kawa: mo ni lomani Jiova na nomuni Kalou.” (Vkru. 30:​19, 20) E vinakata meda vakaraitaka noda lomani koya ena noda vakatulewataka meda qaravi koya. Ni taukeni keda na Kalou eda lomana, e sega ni vesuki keda ia ena vakamarautaki keda tiko ga.

19. Na cava e iloloma soli wale kina ni taukeni keda o Jiova?

¹⁹ Nida ivalavala ca e sega ni veiganiti me taukeni keda na Kalou uasivi. E rawa ga qo ena nona iloloma soli wale. (2 Tim. 1:9) E vola kina o Paula: “Ke da bula, eda bula ena vuku i Jiova, ke da mate, eda mate ena vuku i Jiova. O koya gona, se da bula se da mate, eda nei Jiova.” (Roma 14:8) Eda na sega ni veivutunitaka noda vakatulewataka me taukeni keda o Jiova.

O na Sauma Vakacava?

• Na cava na yaga ni nona taukeni keda o Jiova?

• Na cava eda rawa kina ni cakava na veika e namaka vei keda na Kalou?

• E taqomaki ira vakacava nona dauveiqaravi o Jiova?

[Taro]

[iYaloyalo ena tabana e 8]

Taroga eso se yaga vakacava nona taukeni ira o Jiova

[iYaloyalo ena tabana e 10]

Na cava eso na sala e veitaqomaki kina o Jiova?