1. Na cava sa vakarau cakava o Jisu?

 EDA bula tiko ena dua na gauna ena levu kina na veisau! Sa vakarau qo me vakatauca nona lewa o Jisu vei keda na tiko e vuravura. E tukuna ni sa voleka na gauna qori ni parofisaitaka na “ivakatakilakila” ni nona tiko tawarairai kei “na ivakataotioti ni veika vakavuravura.” (Maciu 24:3) Na ivakatakilakila qori e volai ena Maciu wase 24 kei na 25, vaka kina na Marika wase 13 kei na Luke wase 21.

2. Na cava eda na veivosakitaka? Cava na kena yaga?

² E tukuna o Jisu e tolu na vosa vakatautauvata me rawa nida vakarautaki keda. Qori na vosa vakatautauvata me baleta na sipi kei na me, o ratou na goneyalewa vuku kei na goneyalewa lialia, kei na taledi. Eda na vulica ena vosa vakatautauvata yadua ni na vakatau na noda lewai ena ka eda cakava. Nida veivosakitaka tiko, meda raica na ka eda vulica kei na sala meda muria kina. Eda na vulica e liu na vosa vakatautauvata me baleta na sipi kei na me.

NA SIPI KEI NA ME

3. Na gauna cava ena tauca kina o Jisu na nona lewa vei keda?

³ E vakamacalataka o Jisu ena vosa vakatautauvata me baleta na sipi kei na me, ni na yavutaki nona vakataulewa ena noda rogoca na itukutuku vinaka kei na noda tokoni ira na tacina lumuti. (Maciu 25:​31-46) Ena “veivakararawataki levu” ena tauca nona lewa se o cei e sipi se me ni bera toka ga na Amaketoni. (Maciu 24:21) Me vaka ga nona tawasea na ivakatawa na sipi mai na me, o Jisu tale ga ena tawasei ira na tokoni ira nona imuri lumuti mai vei ira na sega ni veitokoni.

4. Me vaka e tukuni ena Aisea 11:​3, 4, eda vakadeitaka vakacava ni na dodonu tu ga na vakataulewa nei Jisu? (Raica tale ga ena waqana.)

⁴ E vakaraitaka na parofisai ena iVolatabu ni gauna e  vakataulewa kina o Jisu ena vuku i Jiova, ena dodonu tu ga na nona vakataulewa. (Wilika Aisea 11:​3, 4.) Ena dikeva na noda itovo, noda rai, kei na ka eda tukuna, okati kina na ka eda cakava vei ira na lumuti. (Maciu 12:​36, 37; 25:40) Ena kila o Jisu o koya e tokoni ira na tacina lumuti kei na nodra itavi. a Dua na sala bibi eda tokoni ira kina na taci Karisito, ya nida vukei ira ena cakacaka vakavunau. Ena vakatulewataka o Jisu mera “yalododonu” o ira na veitokoni, era na rawa tale ga ni bula tawamudu e vuravura. (Maciu 25:46; Vkta. 7:​16, 17) Qori e dua na icovi totoka! Nira yalodina tiko ga ena veivakararawataki levu, vaka kina ni oti ya, ena volai tiko ga na yacadra ena “ivola ni bula.”​—Vkta. 20:15.

5. Na cava eda vulica ena vosa vakatautauvata me baleta na sipi kei na me? E yaga vei cei?

⁵ Vakaraitaka ni o yalodina tiko ga. Na vosa vakatautauvata i Jisu me baleta na sipi kei me, e baleti ira sara ga era nuitaka na bula tawamudu e vuravura. Era vakaraitaka na nodra vakabauta nira vukei ira na taci Karisito ena cakacaka vakavunau, era muria tale ga na veidusimaki ni dauveiqaravi yalodina e vuku e lesia o Jisu. (Maciu 24:45) Ia e bibi tale ga vei ira na nuitaka na bula i lomalagi mera muria na ivakasala ena vosa vakatautauvata qori. Na vuna? Ni dikeva tiko o Jisu na nodra itovo, nodra rai, kei na ka era tukuna. E bibi tale ga mera vakaraitaka nira yalodina. E tukuna o Jisu e rua tale na vosa vakatautauvata e tu kina na ivakasala matata me baleti ira na lumuti. Eda raica tale ga qori ena Maciu wase 25. Meda veivosakitaka sara na vosa vakatautauvata me baleti ratou na goneyalewa vuku kei ratou na goneyalewa lialia.

GONEYALEWA VUKU KEI NA GONEYALEWA LIALIA

6. Eratou vakaraitaka vakacava e lima na goneyalewa ni ratou vuku? (Maciu 25:​6-10)

⁶ Ena vosa vakatautauvata me baleti ratou na goneyalewa, e tukuna o Jisu e tini na goneyalewa ratou lai tavaka na taganevou. (Maciu 25:​1-4) Eratou vinakata me ratou tomani koya ena kana ni vakamau. E tukuna o Jisu e lima na goneyalewa “vuku,” e lima eratou goneyalewa “lialia.” Eratou vakavakarau vinaka na goneyalewa vuku, ratou yadra tale ga. Ratou tu vakarau me ratou waraka na taganevou, kevaka mada ga e yaco yani ni sa bogilevu. Eratou kauta na nodratou cina me vakararamataki ratou ni sa buto. Ratou kauta tale ga eso na waiwai ni cina de bera yani na taganevou. Kena ibalebale ni ratou vakavakarau vinaka me waqa tiko ga nodratou cina. (Wilika Maciu 25:​6-10.) Ni yaco mai na taganevou, ratou tomani koya na goneyalewa vuku ina kana ni vakamau. Na cava eda vulica? Era vakarautaki ira tale ga va qori na lumuti lotu vaKarisito nira yadra tiko ra qai yalodina tiko ga me yacova ni lako mai o Karisito. Era na vakaicovitaki nira tomana na Taganevou o Jisu ena nona Matanitu vakalomalagi. b (Vkta. 7:​1-3) Ia vakacava o ratou na goneyalewa lialia?

7. Na cava e yacovi ratou na goneyalewa lialia? Na vuna?

⁷ Eratou sega ni vakarau tu na goneyalewa lialia ni yaco mai na taganevou. Eratou sega ni vakatotomuri ratou na  goneyalewa vuku. Sa voleka ni boko na nodratou cina, ratou sega tale ga ni kauta tu eso na waiwai. Ni ratou kila ni sa voleka mai na taganevou, ratou lai volia tale mai eso na waiwai. Ni yaco mai o taganevou, ratou se bera tu ga mai. Ena gauna qori, “ratou mani curu vata kei koya ina kana ni vakamau na goneyalewa eratou sa vakarau tu, qai sogo na katuba.” (Maciu 25:10) Ni ratou lesu mai na yalewa lialia ratou qai via curu i loma, e tukuna mai o taganevou: “Au sega sara ga ni kilai kemudou.” (Maciu 25:​11, 12) Kena ibalebale ni ratou sega ni vakavakarau tu na goneyalewa qori ena nona yaco mai na taganevou, ni balavu mada ga nodratou wawa tiko. Na cava era vulica na lumuti?

8-9. Na cava era vulica na lumuti ena vosa vakatautauvata ni goneyalewa? (Raica tale ga na iyaloyalo.)

⁸ Vakaraitaka ni o vakarau tu qai yadra tiko. A sega ni tukuna o Jisu ni na rua na ilawalawa lumuti, dua e tu vakarau me wawa me yacova na icavacava ni ituvaki ca qo, kei na dua tale e sega ni vakarau tu. Ia e vakamacalataka tiko ga na ka ena yacovi ira na lumuti ke ra sega ni vakarautaki ira mera vosota ena yalodina me yacova na icavacava. Ke ra sega ni vakarau tu, era na sega ni rawata na nodra icovi. (Joni 14:​3, 4) E bibi dina qori! Ke da nuitaka na bula i lomalagi se vuravura, e bibi meda muria kece na ivakasala ena vosa vakatautauvata me baleti ratou na goneyalewa. E bibi vei keda yadua meda yadra tiko qai vakavakarau, meda tu vakarau ni vosota me yacova na icavacava.​—Maciu 24:13.

⁹ E tukuna o Jisu na vosa vakatautauvata ni goneyalewa me vakaraitaka na bibi ni vakavakarau kei na yadra, oti sa qai tukuna na vosa vakatautauvata ni taledi. E vakabibitaki kina na cakacaka vakaukaua.

NA TALEDI

10. Rau vakaraitaka vakacava e rua na dauveiqaravi ni rau yalodina? (Maciu 25:​19-23)

¹⁰ Ena vosa vakatautauvata ni taledi, e tukuna o Jisu e rua na dauveiqaravi rau  yalodina vua na nodrau turaga, e dua tale e sega ni yalodina. (Maciu 25:​14-18) Erau vakaraitaka vakacava na dauveiqaravi qori ni rau yalodina? Rau cakacaka vakaukaua me rau rawata tale e levu na ilavo me nona na nodrau turaga. Ni bera ni lako i vanuatani, e tataunaka vei rau eso na taledi, ya e dua na iwase levu ni ilavo. Erau mamakutu e rua na dauveiqaravi, rau vakayagataki ilavo tale ga vakavuku. Na kena itinitini? Ni lesu mai na nodrau turaga, sa vakaruataki na levu ni taledi a soli vei rau. E vakavinavinakataki rau, ya me rau “marau vata kei na [nodrau] turaga.” (Wilika Maciu 25:​19-23.) Ia vakacava na ikatolu ni dauveiqaravi? Na cava e cakava ena ilavo e solia vua na nona turaga?

11. Na cava e yacovi koya na dauveiqaravi “vucesa”? Na vuna?

¹¹ E soli vua na ikatolu ni dauveiqaravi e dua na taledi, ia e “vucesa.” E vinakata nona turaga me vakayagataka vakavuku na taledi qori, ia e lai buluta. Ni lesu mai na nona turaga, e vakasuka na taledi ga a soli vua. E sega ni vinaka na ka e cakava na dauveiqaravi qori. A sega ni kere veivosoti mada ga ni sega ni rawata e levu tale na ilavo, e tukuna ga ni “turaga yalodredre” na nona turaga. A sega gona ni vakadonui na dauveiqaravi qori. E kau tani tale ga vua na taledi qai vakatalai mai na vale ni nona turaga.​—Maciu 25:​24, 26-30.

12. O cei nikua e dusi rau na dauveiqaravi yalodina?

¹² O rau na dauveiqaravi yalodina e dusi ira na lotu vaKarisito lumuti yalodina. Na Turaga o Jisu e sureti ira mera “marau vata kei na [nodra] turaga.” Oya nira rawata na nodra icovi ni bula i lomalagi, na imatai ni veivakaturi. (Maciu 25:​21, 23; Vkta. 20:5b) Ia era vuli na lumuti ena nona ivakaraitaki ca na dauveiqaravi vucesa. Ena sala cava?

13-14. Na cava era vulica na lumuti ena vosa vakatautauvata ni taledi? (Raica tale ga na iyaloyalo.)

¹³ Vakaraitaka ni o mamakutu se gumatua. A sega ni tukuna o Jisu ena vosa vakatautauvata me baleti ratou na  goneyalewa kei na taledi nira na vucesa na lumuti. E tukuna tiko ga na ka e rawa ni yaco ke ra sega ni mamakutu se gumatua. Era na sega kina ni yalodina mera ‘okati tiko ga kei ira era kacivi qai digitaki,’ era na sega tale ga ni vakadonui mera curu ina Matanitu vakalomalagi.​—2 Pita 1:10.

¹⁴ E matata ena vosa vakatautauvata me baleti ratou na goneyalewa kei na taledi ni bibi vei ira kece na lumuti mera vakarautaki ira, mera yadra tiko, mera gumatua tale ga. Vakacava e dua tale na ka e tukuna o Jisu mera vuli kina na lumuti? Io! Na ka e vakamacalataka ena Maciu 24:​40, 41 e veisemati tale ga kei na iotioti ni nodra lewai na lumuti.

O CEI ENA “KAU”?

15-16. E vakabibitaki vakacava ena Maciu 24:​40, 41 mera yadra tiko na lumuti?

¹⁵ Ni bera ni tukuna o Jisu na tolu na vosa vakatautauvata qori, e vakamacalataka na iotioti ni nodra lewai na lumuti ni na kilai kina o koya e vakadonui. E tukuna ni rua na tagane rau tiko ena iteitei, e rua tale ga na yalewa rau qaqaqi tiko. Kena irairai ni tautauvata ga na ka ratou cakava tiko. Ia e tukuna o Jisu ni na “kau e dua, ena biu mai e dua.” (Wilika Maciu 24:​40, 41.) Oti e uqeti ratou na nona imuri: “Mo dou yadra tiko gona ni dou sega ni kila na siga ena lako mai kina nomudou Turaga.” (Maciu 24:42) E tukuna tale ga e dua na ka va qori o Jisu ni cavuta oti na vosa vakatautauvata me baleti ratou na goneyalewa. (Maciu 25:13) Vakacava rau veisemati? Kena irairai ni vaka kina. O ira ga na lumuti yalodina ena ‘kauti’ ira o Jisu ina Matanitu vakalomalagi.​—Joni 14:3.

¹⁶ Vakaraitaka ni o yadra tiko. Ke dua na lumuti e moce tiko vakayalo ena sega ni kumuni vata kei ira na “digitaki.” (Maciu 24:31) O ira tale ga na nuitaka na bula tawamudu e vuravura mera vuli ena ivakasala i Jisu, ya mera yadra tiko, mera yalodina tale ga.

17. Na cava meda kua ni leqataka kina nona vakatulewataka o Jiova me lumuta eso ena noda gauna?

¹⁷ Nida sa kilai Jiova vinaka, eda na nuitaka na nona vakataulewa. Eda sega ni leqataka ke vakatulewataka me lumuta eso tale era yalodina ena noda gauna. c Eda nanuma na ka e tukuna o Jisu me baleti ira na cakacaka ena ika11 ni aua ena nona vosa vakatautauvata me baleta na loganivaini. (Maciu 20:​1-16) E tautauvata ga na kedra isau na sureti mera cakacaka ena loganivaini ena yakavi kei ira na cakacaka ena mataka. E va tale ga qori na nodra digitaki na lumuti, era na rawata na nodra icovi ni bula i lomalagi ke ra yalodina tiko ga.

MURIA NA IVAKASALA

18-19. Na cava eda sa vulica mai?

¹⁸ Na cava eda sa vulica? Ena vosa vakatautauvata ni sipi kei na me, e bibi vei ira na nuitaka na bula tawamudu e vuravura mera yalodina tiko ga vei Jiova ena gauna qo, kei na veivakararawataki levu sa voleka. Ena gauna qori, ena vakatulewataka o Jisu mera rawata “na bula tawamudu” o ira na yalodina.​—Maciu 25:46.

¹⁹ Eda veivosakitaka tale ga e rua na vosa vakatautauvata mera vuli kina na lumuti. Ena vosa vakatautauvata me baleti  ratou na goneyalewa vuku kei na goneyalewa lialia, e lima eratou vakaraitaka ni ratou vuku. Eratou vakarau tu qai yadra tiko me ratou waraka nona yaco mai na taganevou ke dede mada ga nodratou wawa. Ia eratou sega ni vakarau tu na goneyalewa lialia. Oya na vuna e sega ni vakadonuya kina na taganevou me ratou tomani koya ena kana ni vakamau. E bibi tale ga meda vakarautaki keda nida waraka nona vakarusa o Jisu na ituvaki ca qo, ke dede mada ga noda wawa tiko. Ena vosa vakatautauvata ni taledi, eda veivosakitaka e rua na dauveiqaravi yalodina erau mamakutu se gumatua. Rau cakacaka vakaukaua ena vuku i nodrau turaga me rau vakadonui kina. Ia e sega ni vakadonui na dauveiqaravi vucesa. Na cava eda vulica? E vinakati meda gumatua tiko ga ena noda qaravi Jiova me yacova na icavacava. Kena ilutua, eda veivosakitaka na bibi ni nodra yadra tiko ga na lumuti me rawa ni ‘kauti’ ira o Jisu ina nodra icovi i lomalagi. Era vakanamata sara tu ga, mera “kumuni vata” vei Jisu i lomalagi. Ni oti na ivalu na Amaketoni, era na veitomani kei Jisu ena vakamau ni Lami, mera watina.​—2 Ces. 2:1; Vkta. 19:9.

20. Na cava ena cakava o Jiova vei ira na muria na nona ivakasala?

²⁰ Sa voleka sara na gauna me vakataulewa kina o Jisu, ia meda kua ni rere. Ke da yalodina tiko ga, ena vakarautaka na Tamada vakalomalagi na “kaukaua e uasivia na kaukaua ni tamata” me rawa nida ‘dro meda tu ena mata i koya na Luve ni tamata.’ (2 Kor. 4:7; Luke 21:36) Ke da nuitaka na bula i lomalagi se vuravura, eda na vakamarautaka na Tamada ke da muria na ivakasala i Jisu ena tolu na vosa vakatautauvata qori. Ena loloma soli wale i Jiova, ena “laurai [ni] volai tu ena ivola” ni bula na yacada.​—Tani. 12:1; Vkta. 3:5.