1-2. (a) Na cava e kaya kina o Paula ni “uasivi duadua” na loloma? (b) Na taro cava eda na veivosakitaka?

 NI VAKAMACALATAKA tiko na yapositolo o Paula na vakabauta, inuinui kei na loloma, e tinia ena nona kaya ni “uasivi duadua vei ratou qo na loloma.” (1 Kor. 13:13) Na cava e tukuna kina qori o Paula? Ena gauna se bera mai sa na sega ni vinakati meda vakabauta tale tiko na yalayala ni Kalou me baleta na vuravura vou, se meda nuitaka na vosa ni yalayala qori nira sa na vakayacori oti. Ia ena vinakati tiko ga meda lomani Jiova kei ira na tacida. Eda na lomani ira tiko ga vakalevu me tawamudu.

² Ni vinakati meda dau veilomani, eda na veivosakitaka e tolu na taro. Kena imatai, na cava meda dau veilomani kina? Kena ikarua, eda na vakaraitaka vakacava na noda veilomani? Kena ikatolu, sala cava eda na veilomani tiko ga kina vakalevu?

3. Na cava eso na vuna meda veilomani kina?

³ Na cava e bibi kina meda dau veilomani? Dua na vuna, ya ni loloma eda kilai kina nida lotu vaKarisito dina: E tukuna o Jisu vei ratou nona yapositolo: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Kena ikuri, na noda veilomani ena vakaduavatataki keda. E kaya o Paula ni loloma e “ivau vinaka duadua ni duavata.” (Kolo. 3:14) Ia e tiko e dua tale na  vuna bibi meda dau veilomani kina. E vola na yapositolo o Joni vei ira na tacina vakayalo: “O koya e lomana na Kalou, me lomana tale ga na tacina.” (1 Joni 4:21) Nida veilomani eda vakaraitaka tale ga nida lomana na Kalou.

4-5. Vakatauvatana na noda lomana na Kalou kei na noda lomani ira na tacida.

⁴ Na sala cava e veisemati kina na noda lomana na Kalou kei na noda lomani ira na tacida? Me kena ivakaraitaki, vakasamataka na veisemati ni utoda kei na veitikiniyagoda. Ni via kila o vuniwai na malumu se totolo ni noda icegu ena tara na noda icegucegu e ligada, ena rawa ni kila kina eso na ka me baleta na ituvaki ni utoda. Na cava eda vulica kina me baleta na loloma?

⁵ Na nona rawa ni kila o vuniwai na itukutuku ni utoda ni tara na ligada, eda na rawa tale ga ni kila na levu ni noda lomana na Kalou nida dikeva na noda lomani ira na tacida. Ke da dikeva nida sa sega ni lomani ira me vaka e liu, e rawa ni kena ibalebale qori nida sa sega tale ga ni lomana vakalevu na Kalou. Ke da vakaraitaka wasoma na noda lomani ira na tacida, eda na kila kina nida lomana vakalevu na Kalou.

6. Na cava meda kauai kina ke da sa sega ni lomani ira tiko vakalevu na tacida? (1 Joni 4:7-9, 11)

⁶ E dodonu meda kauai ke da sega ni lomani ira tiko vakalevu na tacida. Na vuna? E rawa ni vakaraitaka qori ni sega ni vinaka tiko na noda veiwekani kei Jiova. E vakamatatataka qori na yapositolo o Joni ni kaya meda nanuma tiko qo: “Ke sega ni lomana na tacina e raica, me qai lomana vakacava na Kalou e sega ni raica?” (1 Joni 4:20) Na cava eda vulica kina? Ena marau o Jiova kevaka wale ga eda “veilomani.”—Wilika 1 Joni 4:7-9, 11.

7-8. Na cava eso na sala eda rawa ni vakaraitaka kina noda veilomani?

⁷ Eda vakaroti vakalevu ena Vosa ni Kalou meda “veilomani.” (Joni 15:12, 17; Roma 13:8; 1 Ces. 4:9; 1 Pita 1:22; 1 Joni 4:11) Na loloma e ivakarau sara ga ni lomada, e sega ni dua e kila rawa se me raica. Ia ena laurai ga vakacava na noda veilomani? Qori ena noda vosa kei na ka eda cakava.

⁸ E levu na sala eda rawa ni vakaraitaka kina na noda veilomani vakamataveitacini. Qo eso na kena ivakaraitaki: “Moni dui tukuna na ka dina.” (Saka. 8:16) “Dou veiyaloni tiko ga.” (Mari. 9:50) “Ni dau liu ena nomuni veirokorokovi.” (Roma 12:10) “Moni dau veiciqomi.” (Roma 15:⁠7) “Ni dau veivosoti . . . vakarawarawa.” (Kolo. 3:13) “Ni veivuketaka na nomuni icolacola bibi.” (Kala. 6:2) “Ni veivakacegui tiko ga.” (1 Ces. 4:18) “Moni . . . veivakauqeti [tiko ga].” (1 Ces. 5:11) “Ni veinanumi ena masu.”—Jeme. 5:16.

9. Sala cava eda vakaraitaka kina na bibi ni noda veilomani ena noda veivakacegui? (Raica tale ga na iyaloyalo.)

⁹ Meda dikeva mada qo e dua na sala eda vakaraitaka kina noda veilomani vakaveitacini. E veiuqeti o Paula: “Ni veivakacegui tiko ga.” Cava eda kaya kina ni dua na sala bibi eda vakaraitaka kina noda lomani ira eso tale na noda vakacegui ira? E tukuni ena dua na ivakamacala ni iVolatabu, na  vosa “veivakacegui” e tukuna o Paula e kena ibalebale nomu “tu e yasa i koya e sotava tiko na ituvaki dredre mo vakayaloqaqataki koya.” Na noda veivakacegui gona, eda sa vukea tiko kina e dua na tacida e sotava tu na ituvaki dredre me tomana nona qaravi Jiova ena yalodina. Na gauna kece eda vakacegui ira kina na tacida, eda sa vakaraitaka tiko vei ira noda lomani ira.—2 Kor. 7:6, 7, 13.

10. Erau veisemati vakacava na yalololoma kei na veivakacegui?

¹⁰ Erau veisemati voleka na yalololoma kei na veivakacegui. Ena sala cava? O koya e yalololoma ena dau veivakacegui qai vukei ira na sotava tu na veika dredre. Na noda yalololoma sara ga ena uqeti keda meda veivakacegui. Dikeva mada na nona sema o Paula na yalololoma i Jiova kei na nona veivakacegui. E vakamacalataki Jiova o Paula me “Tama ni yalololoma, na Kalou e dau vakacegui keda ena ka kece.” (2 Kor. 1:3) E vakayagataka o Paula na vosa “yalololoma” me vakaraitaka na noda dau lomani ira eso tale. E tukuni ni Kalou e Tama se iVurevure ni yalololoma ni dau lomani ira vakalevu na tamata. Na nona yalololoma gona qori e vakacegui keda kina ena “veika dredre kece eda sotava.” (2 Kor. 1:4) Me vaka ga na kena vakacegui ira na viagunu tu na wai savasava mai na mataniwai, e vakacegui ira tale ga va qori na vakaleqai tu o Jiova. Eda na vakatotomuri koya vakacava ena noda dau yalololoma kei na noda veivakacegui? Dua na sala, ya nida bucina e lomada na itovo eda na vakaraitaka kina na yalololoma kei na veivakacegui. Cava eso na itovo qori?

11. Me vaka e tukuni ena Kolosa 3:12 kei na 1 Pita 3:8, na itovo cava tale e bibi meda vakaraitaka tiko ga na veilomani kei na veivakacegui?

¹¹ Na cava meda cakava meda veilomani tiko ga kina, da qai “veivakacegui tiko ga” ena veisiga? E bibi meda bucina na itovo me vaka na veikauaitaki, veilomani vakaveitacini, kei na yalololoma. (Wilika Kolosa 3:12; 1 Pita 3:8.) Era na yaga vakacava na itovo qori? Na noda lomani ira na tacida kei na noda kauaitaki ira dina ena uqeti keda meda vakacegui ira nira sotava na ituvaki dredre. Me vaka ga e tukuna o Jisu “ni na cavuta ga na gusumudou na ka e sinai tu e lomamudou. Na tamata vinaka ena kauta mai na ka vinaka ena lololo vinaka ni lomana.” (Maciu 12:34, 35) Na noda vakacegui ira na tacida e dua dina na sala bibi eda vakaraitaka kina na noda lomani ira.

12. (a) Na cava meda qarauna? (b) Na taro cava eda na dikeva?

¹² Eda vinakata kece meda “veilomani tiko ga.” (1 Joni 4:7) Ia e bibi meda nanuma tiko ni tukuna o Jisu ni na “batabata na nodra loloma e levu.” (Maciu 24:12) E sega ni tukuna tiko o Jisu ni na batabata na nodra loloma e levu na nona tisaipeli. Ia e bibi meda qaqarauni tiko me kua ni vakamuai keda na nodra itovo e levu e vuravura nikua nira sa sega ni dau veilomani. Meda dikeva mada e dua na taro bibi: Eda na kila vakacava nida lomani ira tiko vakalevu na tacida?

13. Na cava e rawa ni vakatovolei kina na noda loloma?

¹³ Dua na sala eda na kila kina nida veilomani  tiko vakalevu ya ena ka eda cakava ni yaco e dua na ituvaki. (2 Kor. 8:8) Dua na kena ivakaraitaki e vakamacalataka na yapositolo o Pita: “E bibi duadua moni dau veilomani vakalevu, ni ubia e levu na ivalavala ca na loloma.” (1 Pita 4:8) Na nodra malumalumu kei na nodra sega ni uasivi na tacida, e rawa ni vakatovolei kina na noda loloma.

14. Me vaka e tukuni ena 1 Pita 4:8, na loloma cava e vinakati meda vakaraitaka? Vakatauvatana.

¹⁴ Meda dikeva vinaka mada na vosa i Pita. Na imatai ni cegu ena tikina e 8 e vakamacalataka na mataqali loloma meda vakaraitaka, ya meda “veilomani vakalevu.” Na vosa e vakayagataka o Pita e kena ibalebale “tevuka.” Na ikarua ni cegu ena tikina qori e vakamacalataki kina na yaga ni noda veilomani vakalevu. E ubia na nodra ivalavala ca na tacida. Eda rawa ni raitayaloyalotaka va qo: Vakasamataka mada e dua na teveli e maka tu kina e levu na ka, eda rawa ni tevuka e dua na isulu e delana me ubia na maka kece qori. Ke da lomani ira tale ga na tacida eda na ubia se vosota “e levu na nodra ivalavala ca.”

15. Na cava eda rawa ni cakava ke da lomani ira vakalevu na tacida? (Kolosa 3:13)

 ¹⁵ E vinakati meda lomani ira vakalevu na tacida, ni sala qori eda na rawa ni vosota kina na nodra malumalumu, ke dredre mada ga ena so na gauna. (Wilika Kolosa 3:13.) Nida vosoti ira na tacida, eda vakaraitaka tiko nida lomani ira vakalevu, eda via vakamarautaki Jiova tale ga. Na cava eda rawa ni cakava meda vosota kina nodra malumalumu na tacida, meda kua ni cudru totolo ena ka era cakava?

16-17. Na cava tale eda rawa ni cakava meda kua ni kauaitaka kina na nodra cala lalai na tacida? Vakatauvatana. (Raica tale ga na iyaloyalo.)

¹⁶ Mo kauaitaka ga na nodra itovo vinaka na tacimu, sega ni nodra malumalumu. Vakatauvatana mada va qo. O tiko kei na so na tacimu ena dua na soqo. O marautaka nomuni veimaliwai, ia ni sa voleka ni oti o tabaki kemuni vata kece sara. Ena rua se tolu na kemudou itaba, de sega ni rairai vinaka na kena imatai. Sa na tolu toka na itaba. Ia ni o sarava tale tiko, o raica sara ni dua na itaba qori e mataruburubu tu kina e dua na tacimu. Na cava o na cakava? O na bokoca ni sa tu e rua tale era matadredredre tu kina, wili kina na tacida qori.

¹⁷ Meda vakatauvatana mada qo na itaba eda maroroya kei na veika eda dau nanuma lesu. Macala ga nida sega ni guilecava na gauna marautaki eda tiko kina  kei ira na tacida. Ia kaya mada ke dua na gauna qori e cakava se tukuna na tacimu e dua na ka e vakararawataki iko. Cava o na cakava? O rawa sara ga ni bokoca laivi me vaka ga o cakava ena itaba ya. (Vkai. 19:11; Efeso 4:32) Eda rawa ni bokoca laivi na nona cala lailai na tacida meda qai nanuma tiko ga na gauna vinaka eda marautaka vata. Eda na via nanuma tu ga na gauna va qori da qai mareqeta.

18. Na tikina bibi cava me baleta na loloma eda veivosakitaka ena ulutaga qo?

¹⁸ Na cava meda veilomani tiko ga kina vakalevu? Me vaka eda sa veivosakitaka mai, nida lomani ira na tacida vakayalo, eda vakaraitaka tiko nida lomani Jiova. Sala cava eda vakaraitaka kina nida lomani ira na tacida? Dua ya na noda vakacegui ira tiko ga. Eda rawa ni “veivakacegui tiko ga” ke da dau loloma. Eda na vakaraitaka vakacava nida dau veilomani vakalevu? Nida na vosota tiko ga nodra malumalumu na tacida kevaka mada ga e dredre.

19. Na cava sa qai bibi ga kina nikua meda veilomani?

¹⁹ Na cava sa qai bibi ga kina nikua meda veilomani? Dikeva mada na ka e tukuna o Pita: “Sa roro mai na icavacava ni ka kece. . . . Moni dau veilomani [gona] vakalevu.” (1 Pita 4:7, 8) Ni sa vakarau ni cava na vuravura ca eda bula tu kina qo, na cava meda namaka? E vakamacalataka o Jisu me baleti ira na nona imuri: “Era na cati kemudou na veimatanitu ena vuku ni yacaqu.” (Maciu 24:9) Meda rawa ni vosota na veika qori, e bibi meda duavata tiko ga. Nida cakava qori ena sega ni rawa na sasaga i Setani me tawasei keda, ni vakavolekati keda na loloma. Qori na “ivau vinaka duadua ni duavata.”—Kolo. 3:14; Fpai. 2:1, 2.