E dau vakavulica o Jisu mera veiyaloni se veisaututaki na lewenivanua. Ia dua na gauna e tukuna vei ratou na nona yapositolo: “Dou kua ni nanuma niu kauta mai na veisaututaki e vuravura, au sega ni kauta mai na veisaututaki, na iseleiwau ga. Au kauta mai na veitawasei, rau na veitawasei na veitamani tagane, o rau na veitinani yalewa, kei rau na veivugoni yalewa.” (Maciu 10:34, 35) Na cava e vakaibalebaletaka o Jisu?

E sega ni vinakata o Jisu me tawasei ira na lewenivuvale, ia e kila ni rawa ni yaco qori ena so na vuvale ena vuku ni ka e vakavulica. Koya gona mera kila tiko o ira na via tisaipeli i Karisito ra qai papitaiso nira na sega ni taleitaka na lewe ni nodra vuvale na nodra vakatulewa. Ke veitusaqati na kedra isa e sega ni tiko ena dina se lewe ni nodra vuvale, ena rawa ni vakadredretaka nodra yalodina tiko ga ena ivakavuvuli i Karisito.

E uqeti ira na lotu vaKarisito na iVolatabu mera “veiyaloni kei ira na tamata kece.” (Roma 12:18) Ia na ka e vakavulica o Jisu e rawa ni vaka na “iseleiwau” ena so na vuvale. Ena sala cava? Oya ni vakabauta na ivakavuvuli i Jisu e dua na lewenivuvale, eso tale era na cata. Ena ituvaki qori o ira na wekana, ya o ira na lewenivuvale, era na meca i koya e vulica tiko na ka dina.—Maciu 10:36.

Eso na gauna ena vakatovolei na nodra lomani Jiova kei Jisu na tisaipeli lotu vaKarisito era tiko ena vuvale duidui lotu. Kena ivakaraitaki, de dua era na veiuqeti na wekadra era sega ni tiko ena dina mera soqova na olodei ni lotu. Ni vakatovolei va qori na nodra vakabauta, o cei era na vakamarautaka? E kaya o Jisu: “E sega ni yaga vei au o koya e lomani rau cake na tamana kei na tinana qai vakalailai vei au.” (Maciu 10:37) E macala ni a sega ni tukuna tiko o Jisu mera kua ni lomani ira vakalevu na nodra itubutubu o ira era via nona tisaipeli. E vakabibitaka tiko ga na ka e dodonu me vakaliuci. Ke ra tusaqati keda na wekada nida sasaga meda qaravi Jiova, eda na lomani ira tiko ga, ia meda kila tiko nida na vakaliuca noda lomana na Kalou.

E macala ga ni rawa ni mosimosi nodra veitusaqati na lewenivuvale. Ia mera nanuma tiko na tisaipeli i Jisu na ka e tukuna: “O koya e sega ni via colata nona kaunirarawa me muri au, e sega tale ga ni yaga vei au.” (Maciu 10:38) Kena ibalebale era na raica na lotu vaKarisito na nodra veitusaqati na lewenivuvale e okati tiko ena veika rarawataki era na vosota na tisaipeli i Karisito. Ena gauna vata qori, era nuitaka ni nodra itovo vinaka ena uqeti ira na lewenivuvale qori mera yalomalumalumu ra qai vulica na itukutuku ena iVolatabu.—1 Pita 3:1, 2.