1. Na cava na rai nei Tevita me baleti Jiova, e uqeti koya vakacava qori?

E VOLA o Tui Tevita: “E cecere o Jiova qai ganiti koya duadua na veivakacaucautaki.” (Same 145:3) E lomani Jiova o Tevita, qori e uqeti koya me vakacaucautaka na Kalou “ena loma ni ivavakoso.” (Same 22:22; 40:5) E matata ni o lomani Jiova tale ga, o qai duavata kei na ka e tukuna o Tevita: “Moni vakavinavinakataki mada ga o kemuni Jiova na Kalou ni Isireli na tamai keimami, me tawamudu.”—1 Vei. 29:10-13.

2. (a) Na cava e dua na sala meda vakacaucautaki Jiova kina? (b) Cava e sega ni rawarawa kina vei ira eso? Cava eda na dikeva?

² Dua na sala eda vakacaucautaki Jiova kina nikua oya nida vakamacala ena soqoni. Ia e sega ni rawarawa qori vei ira e levu na tacida. Era via vakamacala tale ga ia era rere. Era na valuta vakacava? Na cava meda cakava me veiuqeti kina na noda ivakamacala? Ni bera ni saumi na taro qori, meda dikeva mada e va na vuna e bibi kina meda vakamacala ena soqoni.

3-5. (a) Me vaka e cavuti ena Iperiu 13:15, cava meda vakamacala kina ena soqoni? (b) Ena tautauvata kece noda ivakarau ni ivakamacala? Vakamacalataka.

³ Dua na itavi dokai e solia vei keda o Jiova oya meda vakacaucautaki koya. (Same 119:108) Na noda ivakamacala ena soqoni e noda “isoro ni veivakacaucautaki,” eda na dui cabora gona na isoro qori. (Wilika Iperiu 13:15.) Vakacava e namaka o Jiova me tautauvata  na noda isoro, se ivakamacala? Sega!

⁴ E kila o Jiova ni duidui na keda ituvaki kei na ka eda rawata, e mareqeta na ka eda rawa ni cabora vua. Vakasamataka mada nona vakadonuya na veimataqali isoro era cabora na Isireli. Eso era cabora na lami se na me. Ia ena rairai cabora na Isireli dravudravua “e rua na kukuru se rua na ruve gone.” Ke sega ni volia rawa qori, ena vakadonuya o Jiova “e dua na ikatini na efa falawa vinaka sara.” (Vunau 5:7, 11) E sau rawarawa na falawa, ia e mareqeta na isoro qori o Jiova ni “falawa vinaka sara.”

⁵ E va tale ga qori na rai ni Kalou nikua. Nida vakamacala, e sega ni namaka meda gusumacala kece me vakataki Apolosa, se veirawai vakataki Paula. (Caka. 18:24; 26:28) O Jiova e sega ni namaka vakasivia vei keda na ka, e vinakata ga meda solia noda vinaka taucoko. Vakasamataka mada na yada e solia e rua na ilavo lailai. E mareqeti koya o Jiova ni a solia na ka sara ga e rawata.—Luke 21:1-4.

6. (a) Me vaka e cavuti ena Iperiu 10:24, 25, ena rawa ni uqeti keda vakacava na ivakamacala ena soqoni? (b) O na vakaraitaka vakacava ni o marautaka?

⁶ Eda veivakayaloqaqataki nida vakamacala. (Wilika Iperiu 10:24, 25.) Eda taleitaka na duidui ivakamacala eda dau rogoca ena soqoni. Eda marau ni vakamacala mai vu ni lomana e dua na gone lailai. E dau uqeti keda tale ga ni dua e vakamacalataka ena marau na ka dina e mai vulica. Eda qoroya nodra “doudou” ni vakamacala eso era dau mamadua, se ra vulica tiko na noda vosa. (1 Ces. 2:2) Eda na vakaraitaka vakacava nida marautaka nodra sasaga? Vakavinavinakataka nodra ivakamacala veiuqeti ni suka na soqoni. Dua tale na sala oya nida vakamacala tale ga. Eda sega wale ga ni vakayaloqaqataki, ia eda veivakayaloqaqataki tale ga.—Roma 1:11, 12.

7. E yaga vakacava nida vakamacala?

⁷ E yaga vei keda. (Aisea 48:17) Ena sala cava? Kena imatai, na noda via vakamacala ena uqeti keda meda vakavakarau vinaka ena soqoni. Nida vakavakarau  vinaka, ena titobu noda kila na Vosa ni Kalou. Ni titobu na ka eda kila, ena matata na ituvaki meda bulataka kina. Kena ikarua, eda na taleitaka vakalevu na soqoni nida vakaitavi ena veivosakitaki ni ulutaga. Kena ikatolu, ni ka ni sasaga meda vakamacala, eda na sega kina ni guilecava na ka eda vakamacalataka.

8, 9. (a) Me vaka e tukuni ena Malakai 3:16, cava nona rai o Jiova nida vakamacala? (b) Cava ena rairai dredre vei ira eso?

⁸ E marau o Jiova nida vakamacalataka noda vakabauta. Eda kila ni vakarorogo tiko o Jiova nida vakamacala ena soqoni, e marautaka tale ga noda sasaga. (Wilika Malakai 3:16.) Ena vakalougatataki keda nida saga vagumatua meda vakamarautaki koya.—Mala. 3:10.

⁹ Koya gona, e tiko na vuna vinaka meda vakamacala kina ena soqoni. Ia ena rairai dredre tiko ga vei ira eso mera laveliga. Kua ni yalolailai. Meda dikeva mada eso na ivakavuvuli vakaivolatabu, vica na ivakaraitaki, kei na so na vakatutu yaga ena uqeti keda meda vakamacala vakalevu ena soqoni.

10. (a) Na cava eda dau rere kina? (b) Cava e rairai ivakatakilakila vinaka kina qori?

¹⁰ Vakacava o dau rere mada ga ni laveliga mo vakamacala? Sega ni o iko ga o va qori, levu vei keda eda dau rere nida vakamacala. O rawa ni valuta qori ke o kila na vuna o rere kina. Vakacava, o rere de o guilecava na ka mo tukuna, se ni na cala? O leqataka ni na sega ni vinaka sara nomu ivakamacala me vakataki ira na kena vo? De dua e ivakatakilakila vinaka qori. E dusia ni o yalomalumalumu, o raici ira tale ga na kena vo nira uasivi iko. E talei vei Jiova na itovo qori. (Same 138:6; Fpai. 2:3) Ia e vinakata o Jiova mo vakacaucautaki koya, mo vakayaloqaqataki ira tale ga na mataveitacini ena soqoni. (1 Ces. 5:11)  E lomani iko, ena vukei iko mo yaloqaqa.

11. Na ivakasala vakaivolatabu cava ena yaga vei keda?

¹¹ Dikeva eso na ivakasala vakaivolatabu. E tukuni ena iVolatabu nida dau cala kece ena ka eda tukuna se na kena itautau. (Jeme. 3:2) E sega ni namaka o Jiova meda uasivi, vaka kina o ira na mataveitacini. (Same 103:12-14) Era noda vuvale, era lomani keda tale ga. (Mari. 10:29, 30; Joni 13:35) Era kila ni na sega ni donu tu ga na noda ivakamacala ena veigauna.

12-13. Na cava eda vulica vei Niemaia kei Jona?

¹² Vakasamataka eso na ivakaraitaki vakaivolatabu mo valuta kina na rere. Dua o Niemaia. E veiqaravi ena nona vale e dua na tui qaqa. E rarawa sara ga o Niemaia ni rogoca ni sa rusa tu na bai kei na matamata e Jerusalemi. (Niem. 1:1-4) Vakasamataka mada na vuka ni yalona ni taroga na tui se cava e matararawa kina! E totolo ga nona masu o Niemaia, oti e vakamacala sara. E qai vukei ira na tamata ni Kalou na tui. (Niem. 2:1-8) Vakasamataki Jona tale ga. Ni kerei koya o Jiova me lai vosa vei ira na lewe i Ninive, e rere o Jona qai drovaka nona ilesilesi. (Jona 1:1-3) Ia sa qai qarava rawa na itavi qori ena veivuke i Jiova. Na veika e tukuna e uqeti ira sara ga e Ninive. (Jona 3:5-10) Eda vulica vei Niemaia ni bibi meda masu ni bera nida vakamacala. Eda vulica vei Jona ni rawa ni vukei keda o Jiova meda qaravi koya se mani cava eda rerevaka. Ia kaya mada, i vei e rawarawa, meda vakamacala ena soqoni se meda lai vunau i Ninive?

¹³ Na cava mo cakava me veiuqeti kina na nomu ivakamacala? Dikeva mada e lima na sala.

14. Na cava meda vakavakarau vinaka kina? Gauna cava eda na rairai cakava kina qori?

¹⁴ Vakavakarau ena soqoni. Ni o lalawa rawa qai vakavakarau vinaka, o na doudou mo vakamacala. (Vkai. 21:5) E duidui na gauna eda dau vakavakarau kina ena soqoni. O Eloise, e dua na yada yabaki 80 vakacaca, e dau vakarautaka na nona Vale ni Vakatawa Vulici ni se qai tekivu ga na macawa. E kaya, “Au dau marautaka na soqoni keu vakavakarau va qori.” O Joy, e dua na tacida yalewa e cakacaka saumi, e dau vakarautaka nona Vale ni Vakatawa ena siga Vakarauwai. E kaya: “E rawarawa qori niu nanuma kina na ka au vulica.” E kaya o Ike, dua na qase ni ivavakoso gumatua, e painia tale ga: “E vinaka vei au meu vulica tiko vakalalai ena lomanimacawa mai na noqu vulica kece ga vakadua.”

15. O na vakavakarau vinaka vakacava?

¹⁵ Eda na vakavakarau vinaka vakacava ena soqoni? Ni bera ni o tekivu, dau  kerea vei Jiova na nona yalo tabu. (Luke 11:13; 1 Joni 5:14) Raica vakalekaleka na ka ena vulici me vaka na ulutaga, ulutaga lalai, iyaloyalo, kei na kato. Ni o vakavakarau ena parakaravu yadua, saga mo wilika kece na tikinivolatabu sega ni lavetaki. Vakasamataka vakatitobu na ka o vulica, vakabibi na tikina o via vakamacala kina. Ena yaga dina ni o vakavakarau vinaka, o na doudou tale ga mo vakamacala.—2 Kor. 9:6.

16. Na porokaramu cava e vakarautaki? O dau vakayagataka vakacava?

¹⁶ Ke rawa, vakayagataka na porokaramu e vakarautaki ena nomu vosa. O Jiova e vakarautaka ena nona isoqosoqo e levu na porokaramu meda vakavakarau vinaka kina ena soqoni. E tiko ena JW Library^® na noda ivola ni vuli e rawa ni download ena noda iyaya vakalivaliva. Eda rawa sara ga ni vulica, wilika se rogoca na kena katokatoni ena gauna kei na vanua eda vinakata. Eso era vakayagataka mera vuli kina vakataki ira ena gauna ni vakasigalevu e vanua ni cakacaka, koronivuli, se nira vodo tiko. Eda rawa ni raica ena Watchtower Library kei na Watchtower LAIBRI ENA INTERNET^™ eso tale na tikina eda via vakekeli kina.

17. (a) Na cava e vinaka kina mo vakarautaka e vica na isaunitaro? (b) Cava o vulica ena vidio Mo iTokani i Jiova—Vakarautaka Nomu iVakamacala?

¹⁷ Ke rawa, vakarautaka e vica na isaunitaro. Na vuna? Ni o na sega ni digitaki tu ga e veigauna. Era na laveliga tale ga eso, de dua o koya e taura na vuli ena digitaka e dua vei ira. Ena vuku ni gauna, ena rairai digitaki ga e vica mera vakamacala ena dua na tikina. Kua gona ni cudru se yalolailai ke o sega ni digitaki ni se qai tekivu na vuli. Ni o vakarautaka e vica na isaunitaro, o na rawa ni vakamacala vakalevu. De dua mo vakavakarau mo wilika e dua na tikinivolatabu. Ke rawa, vakarautaka e dua na isaunitaro o na vakamacala kina ena nomu vosa ga. *

18. Na cava meda vakamacala ga kina vakalekaleka?

¹⁸ Vakamacala ga vakalekaleka. E dau veiuqeti na ivakamacala e lekaleka qai rawarawa. Saga gona me lekaleka ga nomu ivakamacala. Me kua ni sivia e 30 na sekodi. (Vkai. 10:19; 15:23) Ke sa vakayabaki na nomu saumitaro ena soqoni, mo ivakaraitaki vinaka ena tikina qo. Ni vereverea nomu ivakamacala qai balavu, de dua era na yalolailai eso nira na sega ni vakamacala sara me vakataki iko. Ni lekaleka tale ga na noda isaunitaro,  ena rawa nira vakamacala eso tale. Vakabibi ke o saumitaro e liu, sauma ga vakadodonu, me rawarawa tale ga. Kua ni kauta kece mai na ka e tukuni ena parakaravu. Ni sa matata na ka e vakabibitaki ena parakaravu, mo qai vakamacala ena so tale na tikina.—Raica na kato “ Na Cava Meu Vakamacalataka?”

19. Na cava o rawa ni tukuna vua na tacida e taura na vuli? Ia na cava mo cakava?

¹⁹ Tukuna rawa vua na tacida e taura na vuli na parakaravu o via vakamacala kina. Ke o via cakava qori, mo tukuna rawa vua na tacida e taura na vuli ni se vo levu na gauna me tekivu na soqoni. Ni sa tarogi na taro ni parakaravu qori, me totolo nomu laveliga, mo laveliga tale ga i cake me raica o koya e taura na vuli.

20. E tautauvata vakacava na soqoni kei noda kanavata vakamataveitacini?

²⁰ Mo raica na soqoni me vaka ni o kanavata kei ira na mataveitacini. Kaya mada ke tuvanaki e dua na tatavu (barbecue) ena ivavakoso qai kerei mo vakaligaliga yani. Vakacava o na cakava? De dua o na lomaleqa vakalailai, ia o na solia nomu vinaka taucoko mo vakarautaka na ka era taleitaka kece. O Jiova tale ga e sureti keda, e totoka vakaoti na veika e vakarautaka ena noda soqoni. (Same 23:5; Maciu 24:45) E marautaka na ka eda vakarautaka yani mai vu ni lomada. Mo vakavakarau gona vakavinaka qai vakamacala vakalevu. O sega wale ga ni kana ena teveli i Jiova, o kauta tale ga yani e dua nomu iloloma ina ivavakoso.