Ratou Raica na Loloma Dina
E TIKO o Yomara kei rau na ganena o Marcelo kei Hiver ena dua na koro lailai e Guatemala. E vulica tiko na iVolatabu o Yomara kei ira na iVakadinadina i Jiova, toso na gauna rau vuli tale ga na ganena. Ia e dua na leqa, eratou mataboko kece, ratou sega tale ga ni wilika rawa na nodra ivola na mataboko (braille). E dau wilika gona vei ratou na nodratou qasenivuli ni iVolatabu na ivola me vulici kei na tikinivolatabu.
E dredre tale ga me ratou tiko ena soqoni. E sega ni rawa ni ratou lako ga vakataki ratou ina Vale ni Soqoni voleka, e rauta ni 40 na miniti. Ia era tuvanaka na mataveitacini ena ivavakoso mera kauti ratou ina soqoni kece. Ni ratou lesi ena itavi ni koronivuli ena soqoni ni lomanimacawa, era vukei ratou na mataveitacini me ratou wiligusutaka na nodratou itavi.
Ena Me 2019, sa tekivu vakayacori ena nodratou koro na soqoni ni ivavakoso, gauna vata qori rau toki yani e dua na veiwatini rau painia tudei. Na nodrau isausau me rau vakavulici ratou na veitacini qo ena wili ivola kei na volavola ena nodra matanivola na mataboko, ia rau sega mada ga ni kila na wilika se vola na matanivola qori. Na cava rau cakava? Rau lako sara ena dua na valenivola (library) me rau vulica na nodra matanivola na mataboko, me rawa ni rau vakavulica tale ga.
Saumitaro tiko o Marcelo ena soqoni ni ivavakoso
Oti e vica na vula, sa rawa ni ratou wilika na veitacini qo na nodra matanivola, e yaga vakalevu qori me ratou toso kina vakayalo. a Na gauna qo ratou sa painia tudei kece na veitacini, o Yomara, Marcelo, kei Hiver. O Marcelo sa dauveiqaravi tale ga ni ivavakoso. Eratou osooso vakalevu ena itavi vakayalo ena veimacawa. Nodratou gumatua e uqeta eso tale mera gumatua tale ga.
Eratou vakavinavinakataka na veitacini qori na nodra veitokoni ena yalololoma na lewe ni ivavakoso. E kaya o Yomara: “Na imatai ni gauna keitou sotavi ira kina na iVakadinadina i Jiova, era vakaraitaka sara ga vei keitou na loloma dina vaKarisito.” E tukuna o Marcelo: “Levu sara ga na neitou itokani vinaka ena ivavakoso, keitou lewe tale ga ni mataveitacini e vuravura raraba era duavata ena nodra veilomani.” E vakanamata tu o Yomara kei rau na ganena ena siga sa na veisau kina na vuravura me parataisi.—Same 37:10, 11; Aisea 35:5.
a E vakarautaki na brochure Learn to Read Braille mera kila kina na mataboko se buawa nodra rai, na wilivola se volavola ena nodra matanivola.
Rawa ni o Wilika Tale ga
E VAKAYAGATAKI VAKACAVA NA NODA CAU?
Veisautaka na Bula na Matanivola Digo
Keimami sega ni vakarautaka ga na ivola vakaivolatabu ni mataboko, ia keimami vakavulici ira tale ga eso mera wilika na nodra matanivola na mataboko.
