“KEIRAU dau veibataka na ilavo,” e vakatusa o Sarah, * mai Ghana, sa 17 na yabaki nodrau bula vakawati kei Jacob. E kaya: “Au dau cudru ni levu na ka au cakava me qaravi kina na vuvale, ia e sega ni tukuna vakadodonu vei au o Jacob na veika e vauca na neitou bula vakailavo. Dau vakamacawa neirau veigaluvi tu.”

E kaya o Jacob: “So na gauna dau kaukaua sara na neirau veivosaki. E vakavuna vakalevu na rai cala kei na neirau sega ga ni dau veivosaki vinaka. Keirau dau veiba tale ga ni sivia tale na ka keirau nanuma me baleta e dua na ka.”

E se qai vakawati ga o Nathan, mai Idia, qai vakamacalataka na ka e yaco ena dua na siga ni kailavaki nona nei o nona momo. E kaya: “E cudru sara ga o nei, qai biubiu. Niu tarogi momo se cava e kailavaki nei kina, e nanuma niu sega ni veidokai. Oti ga qori e kailavaki keimami na kena vo.”

De dua o sa donuya na veiba e vu sara ga mai na vosa mosimosi, se cavuti ena gauna cala. E rawa ni tekivu ga vakamalua na veivosaki, qai tini vakaca. Eda sega ni dau tukuna tu ga na veika vinaka ena veigauna, e rawa gona ni cala noda rai me baleta na ka e tukuna e dua, se nanumi ni ca nona inaki. Ia e se rawa tiko ga ni marautaki na bula vakacegu kei na veiyaloni.

Na cava o rawa ni cakava ni yaco na veiba, se nomu saga mera bula veiyaloni tale ra qai veilomani na lewenivuvale? E rawa vakacava nira bula veiyaloni na vuvale? Yalovinaka tomana nomu wiliwili.