Drau se qai veiba ga vakaveiwatini. O kaya lo sara, ‘Cava meu kere veivosoti kina, o koya ga e vakavuna!’

O sega ni via tomana nomudrau veiba, ia drau sega ni guilecava na ka e yaco. O via kere veivosoti, e dredre ga mo tukuna ‘Vosoti au!’

Dokadoka. E kaya e dua na turaga vakawati o Jale *: “So na gauna dau dredre meu kere veivosoti niu sa rui nanumi au vakasivia.” Ni dua e dokadoka vakasivia e rawa ni ka vakamadua vua me vakatusa ni cala.

Nomu rai. O na rairai nanuma ni dodonu mo qai kere veivosoti ga ke o cala. E kaya e dua na yalewa vakawati o Amele: “Dau rawarawa meu kaya ‘vosoti au’ keu vakadeitaka niu cala. Ia ena dredre toka ke keirau cavuta ruarua eso na vosa mosimosi. Se cava meu kere veivosoti kina ni keirau cala ruarua?”

O na rairai vakadonui iko ga ke o nanuma ni vakavuna kece o watimu na leqa. E kaya e dua na tagane vakawati o Josefa: “Ni o vakadeitaka ni o donu tiko, o na vinakata me kilai qori ena nomu sega ni kere veivosoti.”

iSususu. De dua o susu ena vuvale era sega ni dau kere veivosoti vakalevu. Ke dina qori, o rairai sega ni vulica mo dau vakatusa na nomu cala. Ni o sega ni dau cakava qori ni o se gone, o na sega tale ga ni cakava qori ni o sa uabula.

Dau kauaitaki watimu. Dau saga mo nanuma lesu na gauna e kere veivosoti kina vei iko e dua, o qai marautaka. Vakacava mo cakava sara ga qori vei watimu? Ke o nanuma mada ga ni o sega ni cala, o se rawa tiko ga ni kere veivosoti ena vuku ni nona rarawa se na ka o cakava ia o sega ni nakita. Qori ena vukei watimu me yalovinaka tale.—iVakavuvuli vakaivolatabu: Luke 6:31.

Dau kauaitaka nomu bula vakawati. Mo raica na kere veivosoti me sala e vakavinakataki kina nomudrau bula vakawati, sega ni ka me kilai kina ni o cala. E kaya na Vosa Vakaibalebale 18:19 ni “dredre” na veimaliwai kei koya e cudru tiko ga, e “rawarawa” cake na curuma “na koro vakabai.” Ena dredre se sega sara ga ni rawati na bula veiyaloni ni dua e cudru tiko ga. Ia e rawa ni itataqomaki na kere veivosoti me kua ni vakavuna na leqa levu. O na sega ni vakaliuci iko, ia o na dau kauaitaka nomu bula vakawati.—iVakavuvuli vakaivolatabu: Filipai 2:3.

Kere veivosoti totolo. Dau dredre meda kere veivosoti ke da sega ni cala. Ia kua ni vakaiulubaletaka na cala nei watimu mo cakava kina eso na ka ca. Kua ni nanuma ni na toso na gauna ena qai vinaka na ituvaki, kua gona ni lomalomarua na kere veivosoti. Ena rawarawa tale ga kina nona kere veivosoti o watimu. Ena rawarawa nomu kere veivosoti ke o dau vakamatauni iko kina.—iVakavuvuli vakaivolatabu: Maciu 5:25.

Me vu dina mai lomamu. E sega ni tautauvata na nomu saga mo vakamacalataka e dua na ka o cakava kei na nomu kere veivosoti dina. Ke o kere veivosoti dina, o na sega tale ni veivakanini va qo, “Vosoti au, sega ni kila ni o dau leva tale ga.” Kua ni o cakitaka na ka o cakava, ke o vakacudrui watimu, tu vakarau mo kere veivosoti, se o mani nanuma ni donu qori se sega.

Ka e yaco dina. Mo kila tiko nida dau cala kece! Ni yaco e dua na ituvaki o qai nanuma ni o sega ni cala, de dua e vakatikina ga na ka o kila. E kaya na iVolatabu: “O koya e vosa e liu ena nona kisi ena via donu toka, me lako mada yani na ito kadua me vakatarogi koya.” (Vosa Vakaibalebale 18:17) Ena rawarawa sara nomu kere veivosoti ke donu nomu rai me baleti iko kei na nomu malumalumu.