N A KUITANU ni Hawaii e dau vakasasa ga ena bogi. E dau veiveisautaka na kena roka ni vakayagataka na rarama e tiko vua me vuni kina ni cilavi koya na rarama ni vula se na kalokalo. E vakasakiti ni dau cakacaka vata kei na kuitanu e dua na mataqali manumanu somidi e tiko e yagona me buli kina na rarama qori. Na nodrau cakacaka vata eda rawa ni vulica kina eso na ka me baleta na noda bula, ena sala eda sega sara ga ni bau vakasamataka tu.

Vakasamataka mada: Era bula na kuitanu ena veibaravi e Hawaii. Dau laurai levu na kedra iyaloyalo ni cila na vula kei na kalokalo, rawarawa kina vei ira na meca mera raici ira. Ena veisautaka gona na rokana me seraka mai na rarama e tautauvata vinaka kei na kena e cilavi koya tiko ena bogi. Vakatubuqoroqoro ga na ka e yaco ni yali vakasauri na kena iyaloyalo. E rawa ga qori ena vuku ni manumanu somidi e tiko ena loma ni tikiniyagona vakasakiti, e dau seraka na rarama veiganiti me vunitaki koya kina.

Dau yaga na manumanu somidi qori ena nona moce se yadra na kuitanu. Era kauai kina vakalevu na dauvakadidike, ni rairai sega ni yalani ga vei ira na kuitanu na cakacaka ni manumanu somidi qori kei na veika e cakava e veisiga. Eso tale na ibulibuli e tiko e yagodra na manumanu somidi e rawa ni veivuke ena qaqi ni kakana vaka kina na ka e caka e veisiga. Ke vakaleqai na ituvatuva qori, e dau rawa gona ni so e lomabibi, matenisuka, levulevu sivia, se moce yadrayadra. Kena vakadikevi gona na manumanu somidi e tiko ena kuitanu e rawa ni kilai kina e levu na ka me baleta na noda bula.

Na cava o nanuma? E bula vakaidewadewa se buli na tikiniyago vakasakiti ni kuitanu ni Hawaii?