KA ERA TUKUNA ESO

Levu era kaya ni sega ni ca na veimauilavo, ia me vakalawataki ga. So na veimauilavo e tokona na matanitu e dau vakalawataki, e yaga raraba tale ga na kena ilavo.

KA E KAYA NA IVOLATABU

Sega ni tukuni ena iVolatabu na veimauilavo. Ia e tiko kina e vica na ivakavuvuli me baleta na rai ni Kalou ena ka e vauca na veimauilavo.

E kilai na veimauilavo ena nodra dau rawa ilavo eso vei ira eso tale, qo e veisaqasaqa kei na ivakasala vakaivolatabu ni tukuni kina moni “qarauni kemuni mai na ivakarau ni yalokocokoco.” (Luke 12:15) Na veimauilavo e uqeta na kocokoco. Era matai sara na cicivaka tiko na vanua ni veimauilavo mera tukuna na levu ni ilavo ena rawati. Era vunitaka ga na itukutuku dina ni sega ni o ira kece na veimauilavo era na rawata e dua na ka. Ra kila vinaka sara tu ga ni na veirawai na itukutuku va qori me veimautaki kina e levu na ilavo. Era veiuqeti ga ena rawa ilavo totolo, sega ni nodra vukei eso mera kua ni kocokoco.

O ira na dau veimauilavo era dau nanumi ira ga, nodra inaki mera rawata nodra ilavo eso tale. Ia e veiuqeti na iVolatabu me “kua ni dua e qara na ka e yaga ga vua, me qara tale ga na ka e yaga vei ira tale eso.” (1 Korinica 10:24) Dua na iVunau e Tini e tukuni kina: “Mo kakua ni kocova . . . na ka sa nona na kai nomu.” (Lako Yani 20:17) O koya e saga tiko me wini, ena nuitaka mera lusi na kena vo me nona kece na ilavo.

Veivakasalataki tale ga na iVolatabu me kua ni raici nona rawaka e dua me vaka tiko na kalougata e vu mai na kaukaua vuni. Era a tiko e Isireli makawa eso e lailai nodra vakabauta, ra mani “vakarautaka na teveli me nona na kalou ni Kalougata.” Vakacava, e vakadonuya o Jiova me qaravi na “kalou ni Kalougata”? E sega, ni tukuna vei ira: “Dou a cakava na ka sa ca e mataqu: ka dou sa digitaka na ka ka’u sa sega ni vinakata.”—Aisea 65:11, NW, 12.

So na vanua e vakadonui kina vakalawa na veimauilavo e dau vakayagataki na kena ilavo ena vuli, bula vakailavo, kei na so tale na ka me baleti ira na lewenivanua. E sega ga ni veisautaka qori na sala e rawati kina—ni uqeta vakalevu na kocokoco kei na vakasama ni o na rawata e dua na ka, ia qai sega.

“Mo kakua ni kocova . . .  na ka sa nona na kai nomu.”​—Lako Yani 20:17

KA E KAYA NA IVOLATABU

Veivakasalataki na iVolatabu ni “o ira era qara na bula vutuniyau era na temaki, era na coriti, ena curumi ira tale ga e levu na gagadre ca e veivakaleqai, na ka kece qo ena vakavuna na nodra leqa kei na nodra rusa.” (1 Timoci 6:9) Uqeta na kocokoco na veimauilavo, ni dau veivakaleqai na “kocokoco” e vakarota kina na iVolatabu ni qo e dua vei ira na itovo meda biuta tani sara ga.—Efeso 5:3.

Ni vakabibitaki ena veimauilavo na rawa ilavo totolo, e uqeta me lomani vakalevu na ilavo—e kaya kina na iVolatabu ni “levu sara na ka ca e vu mai” kina. E rawa ni veivakaleqai na kena vinakati vakalevu na ilavo me lai lomabibi kina e dua, luluqa tale ga nona vakabauta na Kalou. E tukuna na iVolatabu ni o ira na vakacalai tu ena nodra lomana vakalevu na ilavo era “sualaka na yagodra taucoko ena levu na mosi.”—1 Timoci 6:10.

Na kocokoco e dau vakavuna mera sega ni lomavakacegu kina e levu, sega ni rauti ira na ilavo era sa rawata tiko, ra sega tale ga ni marau. “O koya sa lomana na siliva ena sega ni mamau e na siliva; se ko koya sa lomana nai yau e na kenai kuri.”—Dauvunau 5:10.

Milioni era sa bobula tu ena veimauilavo. Sega tale ni qai leqa lailai, mai Merika mada ga e laurai nira sa bobula tu kina e milioni vakacaca.

E kaya e dua na vosa vakaibalebale: “Na ivotavota e rawati e liu ena kocokoco ena sega ni vakalougatataki e muri.” (Vosa Vakaibalebale 20:21, NW) Levu na leqa e dau yaco vei ira na bobula ina veimauilavo me vaka na dinau vakasivia, se beqaravu mada ga, ra vakacegui tale ga mai na cakacaka, leqa nodra bula vakawati kei na veimaliwai. Ia ni muri na ivakavuvuli vakaivolatabu e rawa ni itataqomaki vinaka, vu tale ga ni marau.

“O ira era qara na bula vutuniyau era na temaki, era na coriti, ena curumi ira tale ga e levu na gagadre ca e veivakaleqai, na ka kece qo ena vakavuna na nodra leqa kei na nodra rusa.”​—1 Timoci 6:9