Sa lutu sobu tiko na wai ena Waitui Mate, rauta ni 1 na mita e veiyabaki. Era kaya eso ni rawa ni maca vakadua na drano qo ena 2050. Era qara tiko na vakailesilesi na kena iwali. Dua na iwalewale era se vakasamataka tiko, oya me kau tani ga na masima, me vakayagataki na kena wai savasava. Na vo ni wai e se tu kina na masima me vakadrodroi lesu ina Waitui Mate. Ia era kaya na dauvakalelewa ni vakarerevaki qori ni rawa ni vakaleqa na iyaubula era tu ena Waitui Mate.

E tukuni ena vakadidike ni dua na kabani ni inisua, ni sivia na duanaikatolu era curu e valenibula nira mateniuto ena Siganisucu, qo ni vakatauvatani kei na veigauna tale eso ena loma ni yabaki. Tukuna na kabani ni vakavuna vakalevu qori na lomaocaocataki ni qarai ni iloloma ni Siganisucu kei na veika era dau nanamaki kina na lewenivuvale kei ira na itokani.

Era tukuna na saenitisi ni Peritania ni mate koso ena 2006 e dua na kai e kune ena wasawasa mai Iceland. Dau nanumi tu ni se qai volekata na yabaki 405, ia e qai kilai ena gauna e mate kina ni sa yabaki 507. E manumanu bula balavu duadua * me bau volatukutukutaki. E mate ena gauna era vakacevatataki koya kina na dauvakadidike me kau ina vale ni vakadidike.

Ena dua na bose e vakayacori mai Havana, e Cuba, ena itekitekivu ni yabaki qo e 33 na matanitu era lewena na isoqosoqo ni Community of Latin American and Caribbean States era tukuna nira sa ‘vanua ni veisaututaki,’ qo ena nodra veidinadinati mera walia nodra duidui, me kua ga ni vakayagataki kina na ivalavala kaukaua. A tiko tale ga ena bose qori na vunivola levu ni Matabose kei Vuravura o Jenerali Ban Ki-moon.