Na iyaya vovou sa tu nikua e vakarawarawataka me levu na noda itokani ena noda vakacuruma wale ga na yacadra ena site ni veikilai ena internet. Ena yasana adua, e rawa nida bokoca na yacadra ke da sega ni via veitokani tale kei ira. Ia na veika e yaco vua na marama mai Peritania, e vakaraitaka ni dredre mera kunei na itokani dina. E laurai ena dua na vakadidike ni sa qai levu ga na noda veimaliwai, ia era lewe lailai era itokani dina.

O na rairai duavata kei ira e levu ni yaga na itokani. Me dua nomu itokani e levu na ka e okati kina, sega ni nomu biuta wale na yacana ena internet se talevoni. Na cava o namaka vua na nomu itokani? Rawa vakacava mo itokani vinaka? Na cava e vinakati me rawa ni dei na veitokani?

Dikeva mada e va na ivakavuvuli e rawa ni dusimaki iko, kei na ivakasala vakaivolatabu ena vukei iko mo dua na itokani vinaka.

Na veitokani dina e okati kina na nomu solia nomu gauna vua nomu itokani. Ena vinakati mo drau cakacaka vata, mo drau veitokoni tale ga. Qori na dei kina na nomudrau veitokani. Tarogi iko mada: ‘Au yalorawarawa ni solia na noqu gauna kei na noqu iyau me baleti noqu itokani?’ Nanuma tiko, me dua nomu itokani vinaka, e vinakati taumada vei iko mo vakaraitaka e liu ni o itokani vinaka.

KA ERA NAMAKA E LEVU VUA NA ITOKANI VINAKA

Irene: “Na veitokani e vaka na kena cakacakataki e dua na were totoka, e vinakati kina na gauna kei na sasaga. Ia ena tekivu mada mai Jerusalemi, oya mo itokani vinaka mada e liu. Mo yalololoma qai veikauaitaki. Mo yalorawarawa tale ga ni solia nomu gauna vei nomu itokani ke gadrevi.”

Luis Alfonso: “E takalevu nikua na yalo ni dui nanumi koya. Ena marautaki gona ke dua e kauaitaki iko qai sega ni namaka me saumi lesu vua e dua na ka.”

NA CAVA E KAYA NA IVOLATABU?

“Na ka tale ga oni vinakata mera cakava vei kemuni na tamata, moni cakava tale ga vei ira. Moni dau soli ka, ena qai soli vei kemuni.” (Luke 6:31, 38) E vakabibitaka o Jisu ena tikinivolatabu qori na veinanumi kei na lomasoli. Ni o lomasoli, ena vinaka kina na nomu veitokani kei na dua. Era na taleitaki iko qai volekati iko nomu itokani ke o dau tu vakarau ni vukei ira o qai sega ni namaka mera sauma lesu vei iko.

Ena dei nomu veitokani kei na dua ke wasoma na veivosaki. Drau veivosakitaka gona eso na ka drau taleitaka. Vakarogoca na ka e tukuna qai doka na nona rai. Vakavinavinakataki koya qai vakayaloqaqataki koya ena gauna veiganiti. Ena so na gauna ena vinakati mo vakadodonutaki koya se vakasalataki koya qai sega ni rawarawa qori. Ia na itokani dina ena raica me vakayacori, ena cakava tale ga vakamaqosa.

KA ERA NAMAKA E LEVU VUA NA ITOKANI VINAKA

Juan: “Na itokani dina ena vakaraitaka vakadodonu na nona nanuma, ia ena sega ni cudru ke sega ni ciqomi nona rai.”

Eunice: “Au taleitaka na itokani e yalorawarawa ni rogoci au, vakauasivi ena gauna au sotava kina na leqa.”

Silvina: “Na itokani dina ena sega ni wereubiubi ena ka e tukuna—kevaka mada ga e kila ni o na sega ni taleitaka—ni kauaitaki iko.”

NA CAVA E KAYA NA IVOLATABU?

“Me totolo ni vakarorogo na tamata yadua, me berabera ni vosa, me berabera ni cudru.” (Jemesa 1:19) Na itokani vinaka e dau vakarorogo. Ena sega ni vosa tu ga qai nanuma ni bibi na nona rai. Koya gona, ena vakarogoci nona itokani ni talaucaka na lomana. Ena sega tale ga ni cudru ni vakadodonutaki. E kaya na Vosa Vakaibalebale 27:6, VV: “E vinaka na i naki ni veivakamavoataki ni i tokani voleka.”

Nida veitokani kei na dua eda na raica ni tiko na ka era lekata. Ia meda nanuma tiko nira sega ni uasivi me vakataki keda. Meda kua gona ni namaka nira na vinaka vakaoti. Meda raica ga na ka era vinaka kina qai vosoti ira nira cala.

KA ERA NAMAKA E LEVU VUA NA ITOKANI VINAKA

Samuel: “Eda dau namaka vakalevu na ka vei ira na so tale. Ia ke da kila nida dau cala qai vinakati meda vosoti, eda na yalorawarawa ni vosoti ira tale ga na tani.”

Daniel: “Mo kila nira dau cala tale ga nomu itokani. Ni basika gona na leqa, e vinaka me wali totolo qai guilecavi.”

NA CAVA E KAYA NA IVOLATABU?

“Eda dau tarabe kece. Ke dua e sega ni tarabe ena vosa, e uasivi o koya, ni rawa tale ga ni varaeletaka na yagona taucoko.” (Jemesa 3:2) Noda nanuma na ka dina qori ena vukei keda meda dua na itokani vinaka, eda na raibaleta tale ga nodra cala se malumalumu. Na iVolatabu e kaya: “Moni dau yalorawarawa, ni dau veivosoti tale ga vakarawarawa ke dua e cudruvaka e dua na ka vua e dua tale. . . . Ia me kena ilutua, moni sulumaka na loloma ni qo na ivau vinaka duadua ni duavata.”—Kolosa 3:13, 14.

E dodonu meda digia vinaka na noda itokani. Ia e sega ni kena ibalebale qori meda digi ira ga eda yabaki vata se tautauvata na noda isususu. Ia nida veitokani kei ira e duidui na nodra yabaki, isususu se duikaikai, eda na vakila na kena yaga.

KA ERA NAMAKA E LEVU VUA NA ITOKANI VINAKA

Unai: “Ni o veitokani kei ira o yabaki vata se tautauvata na ka oni taleitaka, e vaka nomu kania tiko ga e dua na mataqali kakana e veisiga. Se mani vakacava na kena kana vinaka, ena yaco mai na gauna o na sega ni taleitaka.”

Funke: “Noqu veitokani kei na so tale e vakayalomatuataki au. Niu veimaliwai kei ira e duidui na nodra yabaki kei na nodra isususu, e vukei au meu yalorawarawa qai veikauaitaki. Era taleitaka qori na noqu itokani.”

NA CAVA E KAYA NA IVOLATABU?

“O koya gona—au vosa vei kemuni me vaka au vosa vei ira na luvequ—moni lomasavu.” (2 Korinica 6:13) E uqeti keda na iVolatabu meda veitokani kei ira na tamata kece ga. Ena vinaka kina na nomu bula, era na taleitaki iko tale ga e levu.