NA RAI NI IVOLATABU
Mate
Era tu e vei na mate?
“Ko sa kuvu ni qele ga, ia ko na suka tale mo kuvu ni qele.” —Vakatekivu 3:19.
KA ERA TUKUNA ESO.
Era dau raitayaloyalotaka eso se na vakacava na bula i lomalagi, eli, puregatorio se Libo (na itikotiko ni yalo ni gone matedole sega ni papitaiso) Eso tale era vakabauta nida sucu vakavica, meda tamata ena dua na gauna, manumanu se kakana dradrau ena dua tale na gauna. Ia o ira na cata na vakabauta vakalotu qori era nanuma ni iotioti ni ka kece o mate.
KA E KAYA NA IVOLATABU
E kaya na Dauvunau 9:10 ni “sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.” E vakamacalataka tale ga na iVolatabu na ituvaki ni tamata kei na manumanu nira mate, e kaya: “Era sa lako kece ki na dua bauga na tikina; era sa kuvu-ni-soso kecega, ka ra sa suka tale kecega me kuvu-ni-soso.”—Dauvunau 3:20.
Na cava na kedra ituvaki na mate?
“Sa lako tani na nonai cegu, a sa suka ko koya ki na kena qele; e na siga dina ko ya sa oti na ka e vakanananu kina.” —Same 146:4.
KA ERA TUKUNA ESO
Era vakavulici e levu mera vakabauta ni revurevu ni ka era sotava ena gauna era sucu tale kina, e vakatau ena ka era cakava nira se bula e vuravura. Ena marau tawamudu ke dau caka vinaka, ia ena vakararawataki tawamudu ke dau caka ca. E tukuni ni dodonu me vakasavasavataki e dua, ena qai vakadonui me rairai ena mata ni Kalou ena gauna e mate kina. Era na sega ni rawata qori o ira na sega ni vakasavasavataki.
KA E KAYA NA IVOLATABU
O ira na mate era sega ni marau se rarawa. Io, era sega ni vakila e dua na ka na mate ra qai sega ni rawa ni vukei ira se vakaleqai ira na bula. E tukuni ena Dauvunau 9:5, 6: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka, . . . na nodra loloma, kei na nodra veicati, kei na nodra vuvu, sa qai yali; a sa sega tale na nodrai votavota e na dua na ka sa caka e ruku ni mata-ni-siga.”
E tiko beka nodra inuinui na mate?
“Kevaka sa ciba na tamata, ena bula tale ko koya? Au na waraka na siga kecega sa loku vei au, me yaco mada na noqu vakamataliataki.”—Jope 14:14.
KA ERA TUKUNA ESO
Era vakabauta eso ni o koya e nona ivotavota me lako i eli e sega na nona inuinui, ena lai vakararawataki tawamudu e kea. Ia o ira na tiko e puregatorio, era rawa ni marautaka na bula e lomalagi nira vakasavasavataki oti ena bukawaqa.
KA E KAYA NA IVOLATABU
Na Luve ni Kalou ena vakaturi ira na sa mate mera bula e vuravura. E kaya na iVolatabu: “Kua ni kurabui ena ka qo, ni sa voleka na gauna mera rogoca na domona o ira kece na tu ena ibulubulu mera tucake mai.” (Joni 5:26, 28, 29) Na ka e cakava e dua ni sa vakaturi oti ena qai macala kina nona rawata na bula tawamudu se sega. *
^ para. 14 Me ikuri ni ivakamacala me baleta na veivakaturi, raica na wase 7 ni ivola Na Cava Sara Mada e Kaya na iVolatabu? tabaka na iVakadinadina i Jiova.
Rawa ni o Wilika Tale ga
SAUMI NA TARO VAKAIVOLATABU
E Dua Dina na Vanua o Eli? Cava e Kaya na iVolatabu?
Levu era vakabauta ni o eli na vanua era na vakararawataki tawamudu kina na tamata ca. Ia na cava e kaya na iVolatabu?
SAUMI NA TARO VAKAIVOLATABU
E Vakavulica na iVolatabu Nida na Dewa ina Dua Tale na Bula?
Na cava e yaco nida mate?
SAUMI NA TARO VAKAIVOLATABU
E Cavuti ena iVolatabu na Puregatorio?
O na rairai kurabui ke o kila se vu mai vei na ivakavuvuli ni puregatorio.
