Na Wainimata
EDA tekivu tagi ena siga eda sucu kina. E tukuna e dua na dauvakadidike, nida se gonedramidrami na noda dau tagi ena kilai kina nida vinakata e dua na ka se me vakacegui na lomada. Ia na cava meda tagi kina nida sa uabula ni rawa nida veivosaki?
E vica na vuna e dau tuturu kina na wainimatada. De dua eda tagi nida lolosi, cudru, se na mosi eda vakila e yagoda se ni curuoso na noda vakasama. Ia na wainimata ni marau e vu ena noda vakacegui se na noda rawata e dua na ka eda sasagataka. Nida raica ni dua e tagi ena tuturu tale ga na wainimatada. E tukuna o María: “Niu raica e dua e tagi, au sega ni tarova rawa na wainimataqu, keu sega mada ga ni kila na vuna e tagi kina.” Ena rairai vakavuna tale ga na tagi na noda sarava ena iyaloyalo se wilika ena ivola e dua na italanoa vakaciriloloma.
Se mani vuna cava eda tagi kina, na tagi e dua na sala eda vakaraitaka kina na lomada. E kaya na ivola na Adult Crying, “e levu na ka eda rawa ni kaya ena dua na gauna lekaleka.” Ni dua e tagi e vinaka me caka e dua na ka. Kena ivakaraitaki, eda sega ni rawa ni vakalecalecava nida raica e dua e tagi ena levu ni nona rarawa. Ena rairai uqeti keda meda vakacegui koya se vukei koya.
Era tukuna eso na dauvakadidike ni vinaka na tagi ni na cegu kina na lomada, ia nida kinoca e rawa ni vakavuna na tauvimate. Ia eso era veiletitaka ni sega na kena ivakadinadina vakasaenitisi. Ia ena dua na vakadidike e kilai kina ni 85 na pasede na marama kei na 73 na pasede na turaga era vakila ni cegu na lomadra ena gauna era tagi oti kina. E tukuna e dua na marama o Noemi, “Ena so na gauna au kila ni vinaka ga meu tagi. Ni oti qori sa qai makare na noqu vakasama ena ka meu cakava ena noqu leqa.”
Era kaya na dauvakadidike ni rauta e 85 na pasede na marama qai 73 na pasede na turaga era kaya nira vakila ni cegu na lomadra ena gauna era tagi oti kina
Ia na noda vakacegui e sega ni vakatau ga ena tuturu ni wainimatada. E bibi tale ga na ka era cakava na so ena gauna eda tagi kina. Kena ivakaraitaki, nodra tu eso mera vakauqeti keda se vukei keda e veivakacegui dina. Ke sega ni vinaka na ka e tukuni, eda na rairai madua se da nanuma nida sega ni taleitaki da qai sega ni vakacegui.
E macala ni levu na ka e se sega ni kilai me baleta na wainimata. Ia eda kila ni qo na isolisoli vakasakiti ni Kalou eda vakaraitaka kina na lomada.
