“[E] levu sara na ka ca e vu mai na lomani ni ilavo.”​—1 Timoci 6:10.

KA ERA TUKUNA ESO

Na ilavo e vu ni veika ca kece.

KA E KAYA NA IVOLATABU

E yaga na ilavo, ia “na lomani ni ilavo” e kauta mai e levu na “ka ca.” E vola ena iVolatabu na Tui vutuniyau o Solomoni e tolu na ka ca e dau yacovi ira era lomana na ilavo. Dua, na lomaleqa: “Na nonai yau levu na vutuniyau sa dredre kina vua me moce.” (Dauvunau 5:12) Rua, sega ni lomavakacegu: “O koya sa lomana na siliva ena sega ni mamau e na siliva; se ko koya sa lomana nai yau e na kenai kuri.” (Dauvunau 5:10) Tolu, temaki me beca na lawa: “Ko koya sa kusarawa ni vutuniyau ena sega ni donu [se dina tiko ga, NW].” ​—Vosa Vakaibalebale 28:20.

“Sai vakaruru nai lavo.” ​—Dauvunau 7:12.

KA ERA TUKUNA ESO

E rawati ena ilavo na bula vakacegu kei na marau.

KA E KAYA NA IVOLATABU

Na vakasama ni rawati na marau kei na bula vakacegu ena ilavo, qori na “kaukaua ni veitemaki ni iyau.” (Marika 4:19) Ia “nai lavo . . . sa rawa [se yaga] . . . [e]na ka kecega.” (Dauvunau 10:19) Me kena ivakaraitaki, na ilavo e rawa nida volia kina na ka me baleta na noda bula, me vaka na kakana kei na wainimate.​—2 Cesalonaika 3:12.

Na ilavo e yaga tale ga ena qaravi ni noda vuvale. E kaya kina na iVolatabu: “Ke dua e sega ni qaravi ira na kainona, vakabibi o ira na lewe ni nona vuvale, e sa cakitaka na vakabauta.” ​—1 Timoci 5:8.

“Tiko sobu mada . .  cakacakataka na kena isau.” ​—Luke 14:28.

KA E KAYA NA IVOLATABU

Vakayagataka na ilavo ena sala e vakadonuya na Kalou. (Luke 16:9) E ka vakayalomatua meda dau dina ena sala eda vakayagataka kina na ilavo. (Iperiu 13:18) Mo kua ni bobula ena dinau, saga mo “lomavakacegu ga ena ka e sa tiko” vei iko.​—Iperiu 13:5.

E sega ni vakatabuya na iVolatabu na dinau, ia e vakarota: “Sa veiqaravi [bobula, NW] ko koya sa kere ka vua sa soli ka.” (Vosa Vakaibaleibale 22:7) Kua ni volivoli vakaveitalia baleta “na tamata kecega sa lomariri sa vakauta ga ki na viakana.” (Vosa Vakaibalebale 21:5) Ia mo “biuta vakatikitiki . . . eso na ka me salavata kei na ka o taukena” qai maroroi ilavo me baleta na veika bibi.​—1 Korinica 16:2.

E vakauqeti keda na iVolatabu meda “dau soli ka.” (Luke 6:38) E tiko na vuna vinaka mera dau soli ka kina o ira era via vakamarautaka na Kalou, baleta “na Kalou e taleitaki koya e solia na ka ena marau.” (2 Korinica 9:7) Koya gona, meda ‘kua ni guilecava na caka vinaka kei na noda wasea vei ira tale na so na ka e tu vei keda, ni taleitaka na Kalou na isoro va qori.’​—Iperiu 13:16.