DUA na ka na levu ni itukutuku e maroroi ena kompiuta qai vakayagataki ena gauna e gadrevi kina. Era vinakata na saenitisi e dua na sala vou ni maroroi itukutuku e vinaka cake, ya na nodra vakatotomuria na ka e biuta na Kalou ena kabula kece, na DNA.

Vakasamataka mada: E maroroi tu ena DNA e vica vata na bilioni na itukutuku ni ibulibuli ni kabula kece. E kaya o Nick Goldman ena tabana ni vakadidike ni veikabula na European Bioinformatics Institute me baleta na DNA: “E kune na DNA ena sui ni woolly mammoth . . . e rawa kina nida kila na veika me baleta na manumanu qo. E vakasakiti ni lailai toka ga [na DNA], e vaka na irairai ni vauvau, ia e sega ni leqataki na kena maroroi, e rawarawa tale ga ni veikauyaki.” E rawa beka ni maroroya na DNA na itukutuku eda bulia? Era duavata kina na dauvakadidike.

Era saga na saenitisi me maroroi ena DNA na sere, itaba, kei na so tale na itukutuku me vaka ga e caka ena kompiuta. Era vakayagataka tale ga na dauvakadidike e dua na misini me wilika na ka era maroroya ena DNA, e qai vakalesuya kece mai na itukutuku a maroroi kina. Na nodra muria na iwalewale qori na saenitisi sa na rawa kina nira maroroya na itukutuku e katoni tu ena 3,000,000 na CD ina dua na karamu na DNA, qai maroroi tu me vica na udolu na yabaki. Na iwalewale ni maroroi itukutuku qori sa rawa kina ni maroroya na ka kece e tu ena kompiuta e veiyasa i vuravura. E kilai na DNA me iyaya ni maroroi itukutuku uasivi duadua.

Na cava o nanuma? E bula vakaidewadewa se buli na kena rawa ni katona e levu na ka na DNA?