E laurai ena dua na vakadidike mai Suwitisiladi ni sivia e 14 na pasede era yabaki 60 era na rairai mate ena tikinisiga ni nodra sucu. E 18 na pasede era mate ena mateniuto, 21 na pasede na marama era mate ena strouk qai 35 na pasede na tagane era vakamatei ira ga. Era kaya na saenitisi ni lomaocaoca kei na gunusivia e vakavuna me tubu na iwiliwili ni vakacalaka e gaunisala kei na nodra vakamatei ira ga e levu. Ia eso vei ira na kenadau era sega ni duavata kei na vakadidike qori, era vakabauta ni nodra lewa cala ga na tamata e vakavuna mera mate kina ena tikinisiga ni nodra sucu.

Ni laurai na kedra itaba na kere cakacaka, era dau vakadonui ga mera intaviutaki na tagane rairai vinaka ni vakatauvatani kei ira na marama. Na cava na vuna? Era kaya na dauvakadidike mai Isireli, ni levu ga vei ira na veintaviutaki era yalewa. E kaya na ivola The Economisit, ni o ira na yalewa qori era vuvutaki ira na yalewa rairai vinaka era kere cakacaka yani.

Eratou curuma rawa na vale e dau maroroi kina e levu na iyaya vakaniukilia e Oak Ridge, Tennessee e dua na sista lotu Katolika yabaki 82 kei na rua nona itokani tagane rau yabaki 63 kei na 57. Eratou vakavola eso na ka e loma ni vale me ratou kudruvaka kina na veika me baleta na ivalu. E kaya na Vunivola ni Energy o Steven Chu, na vanua qo e dodonu me taqomaki vinaka, ia na kena sa curumi rawa e “vaka vu lomaleqa sara ga.”

E vakatulewataka na mataveilewai levu me veisautaka na kabani ni tavako na roka ni pakete ni tavako kei na kena ivakatakilakila. Na pakete kece ni tavako e dodonu me roka braun siawa, qai biu kina na itaba ni veimataqali mate e vu mai na vakatavako.