E Rawa Mo Vulica e Dua Tale na Vosa!

“Au sega ni rawa ni sosomitaka na ka au cakava ena dua na ka,” e kaya o Mike. E kuria o Phelps, “Oqo e dua na vakatulewa vinaka duadua au cakava.” Rau tukuna ruarua tiko na nodrau bolea me rau vulica e dua tale na vosa.

E LEVU sara na tamata ena veiyasa i vuravura era sa vulica tiko e dua tale na vosa. E duidui na vuna era vulica kina, so e baleta nira vinakata ga, so e baleta na veika vakailavo, qai so ena vuku ni lotu. E vakatarogi ira na lewe vica era vulica tiko e dua tale na vosa na Yadra! Era tarogi ena taro oqo, E vakacava na kena rawarawa se dredre vua e dua e uabula me vulica e dua tale na vosa, na cava ena vukea e dua e tovolea? E yavutaki na ulutaga oqo ena veika era kaya. O na raica ni veivakauqeti qai yaga na veika e tukuni oqo, vakauasivi ke o vulica tiko e dua tale na vosa se o vakasamataka tiko mo vulica e dua na vosa. Vakasamataka toka e so na itovo bibi e vinakati era vakaraitaka na vakatarogi ena kena vulici e dua tale na vosa.

Vosovoso, Yalomalumalumu, kei na Yalorawarawa

E rawarawa vei ira na gonelalai mera vulica e rua na vosa ena dua na gauna nira rogoca wale toka ga, ia e dau dredre vei ira na uabula mera vulica e dua tale na vosa. Ena vinakati taumada mera dau vosovoso baleta e rawa ni taura  e dua na gauna balavu na kena vulici e dua na vosa vou. Nira na rairai dau osooso, ena vinakati mera biuta toka mada vakawawa e so na ka era saga tiko.

E kaya o George ni “vinakati sara ga na yalomalumalumu.” “Ni o vulica e dua na vosa vou, ena gadrevi mo okati iko mo vaka na gone ena gauna o vosa kina. O na raici tale ga mo vaka o gone.” E kaya na ivola How to Learn a Foreign Language: “Ena vinakati mo kua so ni kauaitaka na veika e baleti iko se mo lomaleqataka na kemu irogorogo kevaka o vinakata me toso nomu vulica na vosa.” Kua ni madua. “Kevaka e sega ni calacala nomu vosa, e kena ibalebale ni o sega ni vakayagataka vakalevu tiko na vosa vou o vulica tiko,” e kaya o Ben.

Kua ni leqataka kevaka era dredrevaki iko e so ni cala na vosa o vakayagataka, dredre vata kei ira! Ena qai yaco mai na gauna o na veiwalitaka kina na veika lasa o dau tukuna. Kua ni madua mo taro. Nomu kila na duidui ni kena vakayagataki e so na vosa ena vukea mo nanuma dei na vosa oya.

Ni noda vulica e dua na vosa vou eda vulica tale ga kina na itovo vakavanua vou, ena veivuke gona kevaka meda dau yalorawarawa da qai dolava na noda vakasama ina veika vovou. “Noqu vulica e dua tale na vosa e vukei au meu kila ni duidui noda rai qai duidui tale ga na ivakarau ni noda cakava na ka,” e kaya o Julie. “E sega ni uasivi e dua vei rau, e duidui wale ga.” E vakatura o Jay, “Veimaliwai kei ira era vakayagataka na vosa o vulica, taleitaki ira.” Ia, era na qarauna na lotu Vakarisito mera itokani vinaka o ira oqori ra qai sega ni dau vakayagataka na vosa vakasisila. (1 Korinica 15:33; Efeso 5:​3, 4) E kuria o Jay, “Nira raica ni o taleitaki ira, na kedra kakana, na nodra ivakatagi, kei na veika vaka oya, era na taleitaki iko dina.”

Ena totolo na nomu kila na vosa kevaka o vulica vakalevu o qai vakayagataka tale ga vakalevu. “Na noda vulica e dua na vosa e vaka na ivakarau ni nona kana na toa, e tomika yadudua na tikitiki ni kena,” e kaya o George. “E sega ni levu na tiki lalai ni vosa o tomika ia ena yaga ni lai wiliki vata kei na ka o sa kila.” E kaya o Bill, e dua na daukaulotu e vulica e vica na vosa, “Au dau kauta voli na tikiniveva au vola kina na vosa e so me rawa kina niu dikeva tale ena gauna au galala kina ena vica na miniti.” E levu era kaya ni nodra vulica wasoma ena dua na gauna lekaleka na vosa e vinaka cake mai na nodra lokuca e dua na gauna balavu mera vuli kina.

E levu sara na ivukevuke e tu ena kena vulici e dua na vosa, e okati kina na ivola, na tepi e katoni tu kina na vosa e vulici, na flash card, kei na levu tale. Dina ni tu na ivukevuke oqo, ia e levu era kaya ni vinaka cake vei ira ke dua e vakavulici ira. Vakayagataka na kena icakacaka ga e vinaka vei iko. Nanuma tiko ni sega ni rawa ni vulici e dua tale na vosa ke da sega ni sasaga da qai vosovoso. Ia e tiko e so na kena icakacaka ni vulici ni vosa e rawarawa cake da qai marautaka. E dua na sala oya mo vakayagataka vakalevu na vosa o vulica tiko o qai muria tale ga na kena itovo vakavanua.

“Ni o sa kila na lawa ni vosa kei na vica na malanivosa o vulica tiko,” e kaya o George, “ena uasivi ke o lai tiko vakalekaleka ena vanua era vosataka kece kina na lewenivanua na vosa o vulica tiko.” E tokona o Barb, “Ni o sikova na vanua e vosataki kina na vosa, o na kila vinaka kina na ivakavakayagataki ni vosa.” E bibi tale ga na nomu lai veimaliwai kei ira na vosataka na vosa baleta ena vukei iko mo vakasama ena vosa vou o vulica tiko. Ia, ena dredre vei ira e le levu mera gole i vanua tani. De vakayagataki tiko beka ena vanua era vakaitikotiko kina na vosa oya kei na kena itovo vakavanua. Me kena ivakaraitaki, de tiko beka e so na kena ivola vivinaka se siteseni ni retio se retioyaloyalo e vakayagataka tiko na vosa oya. Vakasaqarai ira tale ga na tamata era vakayagataka tiko na vosa oya mo lai vosa vei ira. E kaya na ivola How to Learn a Foreign Language,  “na vakayagataki sara ga ni vosa e ka bibi duadua e rawa ni toso kina na nomu vuli vosa.” *

Ni Vaka e Tao Nomu Toso

O na rairai nanuma ena so na gauna ni vaka e sa mai tao tu qai sega ni toso na nomu vuli vosa. Na cava o rawa ni cakava? Vakasamataka na inaki taumada ni nomu via vulica na vosa. E levu na iVakadinadina i Jiova era vulica e dua tale na vosa me rawa kina nira vukei ira e so tale mera vulica na iVolatabu. Ena vakadeitaka na nomu tomana nomu vulica na vosa ni o vakasamataka na kena inaki taumada.

Kena ikarua, kua ni nanamaki vakasivia. “O na sega sara beka ni madila me vakataki ira e nodra na vosa,” e vakaraitaka na ivola How to Learn a Foreign Language. “Ia e sega ni ka bibi oya. O gadreva ga mera kila na rogoci iko na ka o tukuna tiko.” O koya gona, kua ni rarawataka nomu sega ni madila ena vosa o vulica tiko me vaka nomu madila ena nomu vosanisucu, kauaitaka ga me macala na nomu tukuna na vosa o sa vulica.

Kena ikatolu, kauaitaka nomu toso se cavuikalawa. Na vulici ni vosa vou e vaka na tubu ni co, o sega ni raica na kena tubu tiko, ia e tubu tiko e veisiga. Ni o rai lesu ina gauna o se qai tekivu kina, o na raica ni sa levu cake tiko na vosa o kila. Kua ni vakatauvatani iko kei na dua. Muria na ivakavuvuli vakaivolatabu ena Kalatia 6:4 (VV): “Me dui lewai koya vakavinaka na tamata yadua; kevaka e vinaka na nona lewa, e na qai rekitaka ga na ka e cakava, ka sega e na ka e cakava na tamata tani.”

Kena ikava, raica me vaka e dua na ka ena qai tauci vakamalua na kena yaga. Vakasamataka mada oqo: E vakacava na maqosa ni nona vosa e dua na gone yabaki tolu se va? E dau vakayagataka beka na vosa dredre e salavata kei na lawa ni vosa? Sega! Ia, sa rawa ni veivosaki. Io, e taura tale ga e vica na yabaki me vulica na gone e dua na vosa vou.

Kena ikalima, vakayagataka vakalevu na vosa vou o vulica tiko. “E vaka e lai tao na noqu kila na vosa ena gauna au sega ni vakayagataka wasoma kina,” e kaya o Ben. O koya gona, mo vakayagataka tiko ga. Veivosaki, veivosaki, veivosaki! E rawa tale ga ni vakatuburarawa na noda via vosa da qai vakayagataka voli ga na vosa era vakayagataka na gone. “E dau ca sara ga vei au na noqu sega ni rawa ni tukuna na veika au vinakata ena gauna au vinakata kina,” e rarawataka o Mileivi. Ia na rarawa oya e rawa ni vakauqeti iko mo vosovoso tiko. “Dau ca sara ga vei au na noqu sega ni kila na ka e talanoataki, se veiwalitaki tiko,” e nanuma lesu o Mike. “Au vakabauta ni ka sara ga oqori e uqeti au meu cakacaka vakaukaua meu tosoya cake kina na ivakatagedegede ni noqu kila na vosa.”

Sala Era Veivuke Kina e So

Era rawa ni vukei koya vakacava e se qai vulica tiko na vosa o ira na sa kila na vosa? E kaya o Bill e cavuti mai cake, “Vosa vakaberabera qai vosa vakavinaka, kua ni vosa vagone.” E kaya o Julie, “Mo vosovoso, kua ni vakaotia na ka e via tukuna o koya e vulica tiko na vosa.” E nanuma lesu o Tony: “E so era kila e vica na vosa era vosa tale mai vei au ena noqu vosa. Oya e vakabera sara ga na noqu toso.” E so era vulica tiko e dua na vosa era dau kerei ira na nodra itokani mera vakayagataka ga na vosa oya nira veivosaki ena so na gauna ra qai tukuna tale ga vua na veika e dodonu me vakavinakataka. Era dau marautaka o ira na vulica tiko e dua tale na vosa na nodra vakavinavinakataki ena nodra sasaga. E tukuna o George, “Ke ra sega ni lomani au ra qai vakauqeti au na noqu itokani, keu a sega ni vulica rawa na vosa oya.”

E yaga beka na vulica e dua tale na vosa? “E yaga dina!” e sauma o Bill, sa vosataka tiko ena gauna oqo e vica na vosa. “E vakarabailevutaka na noqu rai qai vukei au tale ga me duatani na ivakarau ni noqu raica na ka. Qai vakauasivi ni rawa kina meu vakavuvulitaka na iVolatabu vei ira era vosataka na veivosa au sa vulica kei na noqu raici ira nira vakabauta na ka dina ra qai toso vakayalo. Oqo e uasivia sara na noqu sasaga ni vulica na vosa. A tukuna vei au e dua na daunivosa e vosataka e 12 na vosa: ‘Au vuvutaki iko. Au vulica na vosa ena noqu vinakata ga; o iko o vulica mo vukei ira kina na tamata.’”

[iVakamacala e ra]

[Tikina bibi ena tabana e 11]

Na gagadre ni vukei ira e so tale e veivakauqeti ina vulici ni vosa