Same 102:1-28
Na nona masu o koya e vakasaurarataki, na gauna e yalolailai* kina qai sova yani nona nuiqawaqawa ena mata i Jiova.+
102 Kemuni Jiova, ni rogoca noqu masu,+Me yaco yani vei kemuni na noqu masu ni kere veivuke.+
2 Ni kua ni tabonaka vei au na matamuni ena gauna ni rarawa.+
Ni vakala mai na daligamuni* vei au,Ni rogoci au mai vakatotolo niu kaci yani.+
3 Ni sa yali yani na noqu siga me vaka na kubou,Na suiqu tale ga sa loaloa me vaka na matadravu.+
4 Na lomaqu sa bikai sobu qai malai yani vaka na co,+Niu guilecava meu kania na kequ kakana.
5 Ni rogo levu noqu vutugu,+Na suiqu sa kabita na lewequ.+
6 Au sa vaka na pelikani ni vanua talasiga,Au vaka na lulu lailai ena maliwa ni rusarusa.
7 Au yadra voli niu davo tu,*Au vaka na manumanuvuka e tu duadua ena delavuvu.+
8 Era vakanini au voli ena siga taucoko na kequ meca.+
Era vakayagataka na yacaqu o ira na vakalialiai au* me vosa ni veicudruvi.
9 Niu kania na dravusa me vaka na kequ madrai,+Na mequ tale ga sa veiwaki kei na wainimata,+
10 Ena vuku ni nomuni cudru kei na nomuni cudru waqawaqa,Ni oni a laveti au cake ga moni kolotaki au tale vakatikitiki.
11 Na noqu siga e vaka na iyaloyalo*+ sa seavu tiko yani,Au qai malai me vaka na co.+
12 Ia oni tu ga me tawamudu, kemuni Jiova,+Na kemuni irogorogo* ena tu ga ena itabatamata kece.+
13 Oni na duri dina qai vakaraitaka vei Saioni na yalololoma,+Ni sa kena gauna me vakaraitaki vua na nomuni loloma,+Sa yaco mai na gauna lokuci.+
14 Ni o ira na nomuni dauveiqaravi era marautaka na kena vatu+Ra qai taleitaka mada ga na kena kuvuniqele.+
15 Na veimatanitu era na rerevaka na yaca i Jiova,Kei ira na tui kece ni vuravura na kemuni lagilagi.+
16 Ni na tarai Saioni tale o Jiova,+Ena basika mai o koya ena kena lagilagi.+
17 Ni na rogoca o koya na nodra masu na vakaloloma,+Ena sega ni beca na nodra masu.+
18 Qo e volai ena vukudra na itabatamata era na muri mai,+Me na vakacaucautaki Ja kina e dua na matatamata e se bera ni vakatuburi.*
19 Ni rai sobu mai o koya ena nona vanua tabu e cecere,+E raici vuravura mai lomalagi o Jiova,
20 Me rogoca na nona vutugu na kaivesu,+Me sereki ira na totogimate,+
21 Me vakatakilai kina na yaca i Jiova e Saioni+Me vakacaucautaki tale ga e Jerusalemi,
22 Nira sa kumuni vata na veimatatamata kei na veimatanituMera qaravi Jiova.+
23 E butakoca koso na noqu kaukaua,E vakalekalekataka o koya na noqu siga.
24 Au kaya: “Isa noqu Kalou,Kua ni kauti au laivi ni se veimama tu noqu bula,Ni o kemuni, e yacova na itabatamata kece na nomuni veiyabaki.+
25 Oni sa biuta tu na yavu kei vuravura ena gauna makawa sara,Na lomalagi tale ga e cakacaka ni ligamuni.+
26 Era na rusa, ia oni na tu ga,Era na madra kece vaka ga na isulu.
Oni na sosomitaki ira vaka na isulu, era na qai yali.
27 Oni na dua tu ga, ena sega ni oti na nomuni veiyabaki.+
28 Era na tikovinaka na luvedra na nomuni dauveiqaravi,Na nodra kawa tale ga ena vakataudeitaki e matamuni.”+
iVakamacala e ra
^ Se “malumalumu mai.”
^ Se “Ni cuva qai vakarorogo.”
^ Se rawa ni,“au sa sui wale ga.”
^ Se “na veiwalitaki au.”
^ Se “iyaloyalo balavu.”
^ Se “Na yacamuni.” Ipe., “ivakananumi.”
^ Ipe., “ni buli.”
