Vola o Joni 2:1-25
2 Ena ikatolu ni siga e caka e dua na kana magiti ni vakamau mai Kena e Kalili, qai tiko kina na tinai Jisu.
2 A sureti tale ga ena kana magiti ni vakamau o Jisu kei ratou na nona tisaipeli.
3 Ni sa oti koso na waini, e tukuna vei Jisu o tinana: “Sa oti na waini.”
4 Ia e kaya vua o Jisu: “Tinaqu, na cava me daru leqataka kina qori? E se bera na noqu gauna.”
5 E tukuna o tinana vei ira na veiqaravi tiko: “Na ka ga e tukuna, ni cakava.”
6 Me vaka na kena ivakarau ena nodra lawa ni veivakasavasavataki na Jiu,+ e tu e kea e ono na saqavatu e rawa ni tawa kina e rua se tolu na ivakarau wai.*
7 E kaya vei ira o Jisu: “Ni tawana na wai ena saqa.” Era mani vakasinaita me yacova na gusu ni saqa.
8 E qai kaya vei ira: “Ni takiva eso me kau vua na iliuliu ni soqo.” Era mani kauta.
9 Ni tovolea na iliuliu ni soqo na wai sa vuki qo me waini, e sega ni kila se kau mai vei, (era kila ga na dauveiqaravi era takiva mai na wai), e kaciva sara na taganevou na iliuliu ni soqo
10 qai kaya vua: “Na tamata kece e dau biuta mai liu na waini vinaka, nira sa mateni na tamata, e dau qai biuta mai muri na waini e sega soti ni vinaka. O maroroya tu na waini vinaka me yacova mai qo.”
11 Qo na cakamana i Jisu mai Kena e Kalili, na itekitekivu ni nona cakamana e vakaraitaka kina nona lagilagi,+ eratou vakabauti koya tale ga na nona tisaipeli.
12 Oti ya sa qai lako sobu o koya, o tinana, o iratou na tacina,+ kei ratou na nona tisaipeli i Kapenaumi,+ eratou tiko e kea me vica ga na siga.
13 Sa voleka sara nodra Lakosivia+ na Jiu, mani lako cake i Jerusalemi o Jisu.
14 E kunei ira na volitaki bulumakau, sipi, kei na ruve+ ena valenisoro, ra qai dabe tale tu ga kina na dauveisauilavo.
15 Ni talia oti e dua na kuita ena dali e cemuri ira tani kece mai na valenisoro na sipi kei na bulumakau vaka kina na kedra ivakatawa, e sova nodra ilavo na dauveisauilavo qai vakatoboicutaka na nodra teveli.+
16 E kaya vei ira na volitaki ruve: “Ni kauta laivi na ka kece qo! Ni kua ni cakava tiko na vale i Tamaqu me vale ni veivoli!”+
17 Eratou nanuma sara nona tisaipeli ni volai: “Sa kani au na noqu yalogu me baleta na nomuni vale.”+
18 Era kaya vua na Jiu: “Na ivakatakilakila cava o na vakaraitaka vei keimami+ me tokona na ka o cakava?”
19 E sauma vei ira o Jisu: “Ni talaraka na valenisoro qo, au na qai tara tale ena tolu na siga.”+
20 Era qai kaya na Jiu: “E 46 na yabaki na tara tiko ni valenisoro qo, o na rawa ni tara me tolu ga na siga?”
21 Ia ni cavuta na valenisoro a vakaibalebaletaka tiko na yagona.+
22 Ni sa vakaturi mai na mate eratou sa qai nanuma na nona tisaipeli ni dau tukuna na ka qo o koya,+ eratou vakabauta kina na tikinivolatabu kei na vosa i Jisu.
23 Ia ni tiko voli mai Jerusalemi ena soqo ni Lakosivia, levu era vakabauta na yacana nira raica nona cakamana.
24 Ia e sega ni nuitaki ira o Jisu ni kilai ira kece
25 qai sega ni yaga me dua e tukuna vua na ka e baleta na tamata, ni kila vinaka na ka e tu e loma ni tamata.+
