Vola o Joni 11:1-57
11 Ia a tauvimate voli e dua na turaga, na yacana o Lasarusa, na kai Pecani. Erau tiko tale ga e Pecani o Meri kei Marica+ na tacina.
2 O Meri ga qo a livia na waiwai boivinaka ena yava ni Turaga, qai vakamamacataka ena drauniuluna.+ E ganei Lasarusa na turaga e tauvimate tiko.
3 Erau qai vakauitukutuku na ganena vei Jisu, erau kaya: “Turaga, e tauvimate na nomuni itokani dredre.”
4 Ia ni rogoca o Jisu, e kaya: “Ena sega ni tini ena mate na tauvimate qo, ia ena vakalagilagi kina na Kalou.+ Me vakalagilagi tale ga kina na Luve ni Kalou.”
5 E dau lomani Marica kei tacina kei Lasarusa o Jisu.
6 Ia ni rogoca ni tauvimate o Lasarusa, e sega ni lako sara, e tiko tale e kea me rua na siga.
7 Sa qai tukuna vei ratou na tisaipeli: “Me datou lako tale i Jutia.”
8 Eratou kaya vua na tisaipeli: “Rapai,+ era se qai via vakaviriki iko+ mada ga ena vatu na kai Jutia, oni via lako tale kina?”
9 E sauma o Jisu: “Vakacava, e sega ni 12 na aua ena dua na siga?+ Ke dua e taubale ena siga ena sega ni coqa e dua na ka ni raica tiko na rarama ni vuravura.
10 Ia ke dua e taubale ena bogi, ena tarabe ni sega vua na rarama.”
11 Ni cavuta oti ya e qai tukuna vei ratou: “Sa moce+ na nodatou itokani o Lasarusa, ia au sa lako qo meu lai vakayadrati koya.”
12 Eratou kaya vua na tisaipeli: “Turaga, ke moce dina o koya, ena bula vinaka mai.”
13 A tukuna tiko o Jisu ni sa mate o Lasarusa. Eratou nanuma ga nona tisaipeli ni tukuna tiko ni moce me vakacegu.
14 E qai tukuna vakamatata vei ratou o Jisu ena gauna ya: “Sa mate+ o Lasarusa.
15 Au marau ena vukumudou niu a sega ni tiko e kea, mo dou vakabauta kina. Me datou lako sara vua.”
16 Mani kaya vei ratou na vo ni tisaipeli o Tomasi, e dau vakatokai tale ga me o Drua: “Me datou lako tale ga me datou mate vata kei koya.”+
17 Ni yaco yani o Jisu e qai kila ni sa siga va ena ibulubulu* o Lasarusa.
18 E voleka i Jerusalemi o Pecani, e rauta ni rua na maile* na kedrau veiyawaki.
19 E levu na Jiu era lako yani vei Marica kei Meri mera vakacegui rau ena mate nei ganedrau.
20 Ni rogoca o Marica ni lako tiko yani o Jisu, e lai tavaki koya sara, ia o Meri+ e dabe toka ga mai vale.
21 E kaya o Marica vei Jisu: “Turaga, ke oni a tiko eke, ke a sega ni mate o ganequ.
22 Ia au kila ena gauna mada ga qo ni ka kece oni kerea vua na Kalou ena solia vei kemuni.”
23 E tukuna vua o Jisu: “Ena tucake tale na ganemu.”
24 E kaya vua o Marica: “Au kila ni na tucake tale ena gauna ni veivakaturi+ ena iotioti ni siga.”
25 E tukuna vua o Jisu: “O yau na vu ni veivakaturi kei na bula.+ O koya e vakaraitaka ni vakabauti au, ke mani mate, ena bula tale.
26 O koya tale ga e bula tiko qai vakaraitaka ni vakabauti au ena sega sara ni mate.+ O vakabauta?”
27 E kaya vei Jisu: “Io Turaga, au vakabauta ni o kemuni ga na Karisito na Luve ni Kalou, o koya ena lako mai vuravura.”
28 Ni cavuta oti ya, e gole sara me lai kacivi Meri na tacina, e kaya lo vua: “Sa tiko qo na Qasenivuli,+ e tarogi iko tiko.”
29 Ni rogoca ya o Meri, e tucake sara me lako vei Jisu.
30 Se bera ni lako ina koro o Jisu, se tiko voli ga ena vanua e lai tavaki koya kina o Marica.
31 Era tiko e vale na Jiu era mai vakacegui Meri. Nira raici koya ni tucake vakatotolo qai lako i tuba, era muri koya sara nira nanuma ni lako ina ibulubulu*+ me lai tagi.
32 Ni yaco yani o Meri ina vanua e tiko kina o Jisu, e cuva sobu i yavana ni raici koya qai kaya: “Turaga, ke oni a tiko eke, ke a sega ni mate o ganequ.”
33 E vusolo na loma i Jisu ni raica nona tagi voli o Meri kei ira na Jiu era lako vata yani.
34 E taroga: “Oni vakadavori koya e vei?” Era kaya vua: “Ni mai raica Turaga.”
35 E tagi o Jisu.+
36 Era mani kaya na Jiu: “Isa, sa dua na ka na nona lomani koya!”
37 Era kaya eso tale: “Na cava a sega ni tarova rawa kina o koya na nona mate na tamata qo ni a vakavuna mada me rai na mataboko?”+
38 Ni se baci vusolo na loma i Jisu, sa qai lako ina ibulubulu.* Qo e dua na qara e kena isogo na vatu.
39 E kaya o Jisu: “Ni kauta tani na vatu.” E kaya o Marica na ganei koya e mate: “Turaga sa na boi na yagona ni sa ikava ni siga qo.”
40 E kaya vua o Jisu: “Au a sega ni tukuna vei iko, ke o vakabauta o na raica na lagilagi ni Kalou?”+
41 Era mani kauta tani sara na vatu. E tacake i lomalagi+ o Jisu qai kaya: “Tamaqu, au vakavinavinakataki kemuni ni oni rogoci au.
42 Au kila ni oni dau rogoci au, ia au tukuna qo mera vakabauta kina na ilala levu era tu qo ni oni talai au mai.”+
43 Ni cavuta oti ya, sa qai kaci vakadomoilevu: “Lasarusa, lako mai tuba!”+
44 E mani lako mai tuba na tagane a mate, e viviraki tu na yavana kei na ligana ena isulu, e viviraki tale ga na matana ena isulu. E kaya vei ira o Jisu: “Sereki koya me lako.”
45 Levu na Jiu era sikovi Meri yani era mani vakabauta nira raica na ka e cakava o Jisu,+
46 ia eso tale era lai tukuna vei ira na Farisi na ka e cakava o Jisu.
47 Era mani kumuni ira vata na lewe ni Sanadrini na iliuliu ni bete kei ira na Farisi, era kaya: “Sa levu nona cakamana+ na tamata qo, cava meda cakava?
48 Ke da laivi koya tiko ga va qo, era na vakabauti koya kece. Era na lako mai na kai Roma ra qai taura noda vanua* kei na noda matanitu.”
49 Ia e dua vei ira o Kaiafa,+ e bete levu tiko ena yabaki ya, e kaya vei ira: “Oni sega sara ga ni kila e dua na ka,
50 oni sega tale ga ni vakasamataka ni yaga vei kemuni me mate e dua na tamata ena vukudra na lewenivanua, me kua kina ni rusa na matanitu taucoko.”
51 E sega ni cavuta vakataki koya na vosa ya, ia me vaka ni bete levu tiko ena yabaki ya, e parofisaitaka ni dodonu ga me mate o Jisu ena vuku ni matanitu,
52 e sega ni vuku ni matanitu wale ga, ia me soqoni ira tale ga na luve ni Kalou era talabusese tu mera dua ga na ilawalawa.
53 Tekivu mai na siga ya era sa qai bosea mera vakamatei Jisu.
54 Sa sega gona ni qai veilakoyaki voli o Jisu ena kedra maliwa na Jiu, ia e biubiu mai kea me lako ina yasayasa e volekata na vanua talasiga, ena dua na koro na yacana o Ifireimi,+ e tiko e kea kei ratou na tisaipeli.
55 Sa voleka na nodra Lakosivia+ na Jiu, levu ena vanua ya era lako cake i Jerusalemi ni se bera na Lakosivia mera lai vakasavasavataki ira.
56 Era vakasaqarai Jisu, era veitarogi nira sa lai tu ena valenisoro: “Cava nomuni nanuma? Ena sega sara ga ni lako mai ena soqo?”
57 Era mani vakarota na iliuliu ni bete kei ira na Farisi ke dua e kila na vanua e tiko kina o Jisu me tukuna mai, mera lai vesuki koya.
iVakamacala e ra
^ Se “ibulubulu nanumi.”
^ Se “ibulubulu nanumi.”
^ Se “ibulubulu nanumi.”
^ Oya na valenisoro.
