Vola o Joni 1:1-51
1 Ena ivakatekivu a bula na Vosa,+ e bula vata kei na Kalou+ na Vosa, e dua na kalou*+ na Vosa.
2 A tiko vata kei na Kalou o koya qo mai na ivakatekivu.
3 E buli na ka kece ena vukuna,+ e sega ni dua na ka e buli me sega ni vakaitavi kina.
Na ka kece e buli
4 ena vukuna e rawa kina na bula, na bula qori e rarama ni tamata.+
5 E cila yani na rarama ina butobuto,+ ia e sega ni bokoca rawa na rarama ya na butobuto.
6 E tala mai na Kalou e dua na tagane me nona mata, na yacana o Joni.+
7 E lako mai na tagane qo me ivakadinadina, me vakadinadinataki koya na rarama+ mera vakabauta na tamata kece ena vukuna.
8 E sega ni rarama ya o koya,+ e mai tukuna ga na ka e baleti koya na rarama.
9 Sa voleka ni lako mai vuravura na rarama dina ena mai vakararamataki ira na tamata kece ga.+
10 A tiko e vuravura o koya,+ e bau vakaitavi ena caka ni vuravura,+ ia e sega ni kilai koya o vuravura.
11 E lako ina nona vanua, ia era sega ni ciqomi koya na kainona.
12 Ia vei ira kece na ciqomi koya, e solia vei ira na dodonu mera luve ni Kalou,+ ni laurai vei ira nodra vakabauta na yacana.+
13 E vu vakalou+ nodra sucu, e sega ni vu ena nodra isema vakadra se lewa vakayago se lewa vakatamata.
14 E mai tamata*+ na Vosa, e tiko vata kei keda, eda raica tale ga nona lagilagi, na lagilagi qo e solia o tamana vua na luvena duabau.+ E sinai ena loloma soli wale kei na dina.
15 (E vakadinadinataki koya o Joni, io e kacivaka sara ga: “O koya ga qo au a vakaibalebaletaka tiko niu kaya, ‘O koya e muri au mai e uasivi au ni a bula e liu vei au.’”)+
16 Na ka kece eda rawata, eda rawata ena uasivi ni nona yalololoma, ya na loloma soli wale e vakaikuritaki tiko ga.
17 Ni a soli vei Mosese na Lawa,+ ia na loloma soli wale+ kei na dina e qai mai vakaraitaka o Jisu Karisito.+
18 E sega ni dua na tamata sa raica na Kalou ena dua na gauna,+ na luvena duabau ga e vaka na kalou+ e tiko ena yasa i Tamana,*+ e tukuni koya.+
19 Qo na ivakadinadina e solia o Joni nira talatala yani na Jiu vei ira na bete kei ira na Livai mai Jerusalemi mera lai tarogi koya: “O cei o iko?”+
20 E sega tale ni vunitaka, e tukuna ga vakadodonu: “Au sega ni Karisito.”
21 Era mani taroga: “O cei ga o iko, o Ilaija?”+ E kaya: “Sega.” “O iko na parofita?”+ E kaya: “Sega!”
22 Era qai kaya vua: “O cei ga o iko? Tukuna mai me keimami lai tukuna vei ira na talai keimami mai. Vakamacalataki iko mada.”
23 E kaya: “O yau ga na domo e kacivaka tiko ena vanua talasiga, ‘Ni vakadodonutaka na sala i Jiova,’*+ me vaka e tukuna na parofita+ o Aisea.”
24 Era talai ira yani qori na Farisi.
25 Era qai tarogi koya nira kaya: “Na cava ga o veipapitaisotaki kina ni o sega ni Karisito, se o Ilaija, se parofita?”
26 E tukuna vei ira o Joni: “Au veipapitaisotaki ena wai. E maliwai kemuni tiko e dua oni sega ni kila.
27 E muri au mai o koya qai sega mada ga ni ganiti au meu sereka na wa ni nona ivava.”+
28 A yaco kece qo mai Pecani ena tai ni Joritani, na vanua e veipapitaisotaki tiko kina o Joni.+
29 Ena siga tarava e raici Jisu ni lako tiko yani vua, qai kaya: “Raica na Lami+ ni Kalou ena kauta tani na nodra ivalavala ca+ na kai vuravura!+
30 O koya ga qo au a vakaibalebaletaka tiko niu kaya: ‘O koya e muri au mai e uasivi au ni a bula e liu vei au.’+
31 Au sega mada ga ni kilai koya, ia au veipapitaisotaki ena wai mera kilai koya kina na Isireli.”+
32 E vakadinadina tale ga o Joni ni kaya: “Au raica ni lako sobu mai lomalagi na yalo tabu me vaka na ruve, e mai toka vua.+
33 Au sega mada ga ni kilai koya, ia e kaya vei au o koya e talai au mai meu veipapitaisotaki ena wai: ‘O koya ga o raica ni lako sobu vua na yalo tabu qai lai toka vua,+ o koya qo ena veipapitaisotaki ena yalo tabu.’+
34 Au raica sara ga, au vakadinadinataka tale ga ni o koya ga qo na Luve ni Kalou.”+
35 Ena siga tarava eratou a tucake vata tu o Joni kei na rua nona tisaipeli.
36 Ni raici Jisu ni taubale tiko, e kaya: “Raica, na Lami+ ni Kalou!”
37 Ni rau rogoca ya na tisaipeli, erau muri Jisu sara.
38 E qai vuki o Jisu, e raica ni rau muri tiko yani, e kaya vei rau: “Na cava drau vaqara?” Erau kaya vua: “Rapai, (kena ibalebale, “Qasenivuli”), oni vakaitikotiko i vei?”
39 E kaya vei rau: “Drau lako mai, drau na qai raica.” Eratou gole vata sara, rau raica na vanua e vakaitikotiko kina, rau tiko e kea kei koya ena siga ya. Qo ni sa voleka na ikatini ni aua.*
40 O Adriu+ na taci* Saimoni Pita e dua vei rau na rogoca na ka e tukuna o Joni mani muri Jisu sara.
41 E kunea e liu na tacina o Saimoni, qai tukuna vua: “Keirau sa kunea na Mesaia”+ (kena ibalebale, “Karisito”),
42 e kauti koya sara vei Jisu. Ni raici koya o Jisu e kaya: “O iko o Saimoni+ na luvei Joni, o na vakatokai o Kifa” (kena ibalebale, “Pita”).+
43 Ena siga tarava e vinakata o Jisu me lako i Kalili. E raici Filipi+ sara, qai kaya vua: “Muri au mai.”
44 O Filipi e kai Peciseita na nodrau koro o Adriu kei Pita.
45 E raici Nacanieli+ o Filipi qai kaya vua: “Keitou sa kunei Jisu na luvei Josefa+ mai Nasareci, o koya e vola o Mosese ena Lawa kei ira tale ga na Parofita.”
46 Ia e kaya vua o Nacanieli: “Ena bau kune e dua na ka vinaka mai Nasareci?” E kaya vua o Filipi: “Lako mai mo raica.”
47 E raici Nacanieli sara o Jisu ni lako tiko yani vua, e kaya me baleti koya: “Raica, e dua na kai Isireli dina, e sega ni dau lawaki.”+
48 E kaya vua o Nacanieli: “Oni kilai au vakacava?” E sauma o Jisu: “Au a raici iko ni o tiko ena ruku ni vunilolo ni bera ni kacivi iko o Filipi.”
49 E kaya vua o Nacanieli: “Rapai, o kemuni ga na Luve ni Kalou, oni Tui Isireli.”+
50 E kaya vua o Jisu: “O vakabauta ena vuku wale ga ni noqu tukuna niu raici iko ena ruku ni vunilolo? O na raica e levu tale na ka e uasivia qori.”
51 E mani tukuna vua: “Au tukuna vakadodonu sara vei kemudou, dou na raica ni tadola na lomalagi, dou na raici ira na agilosi ni Kalou nira lako cake ra lako sobu tale ga vua na Luve ni tamata.”+
iVakamacala e ra
^ Se “vakalou.”
^ Kir., “lewe.”
^ Se “lomasere i Tamana.” Qo e vakaibalebaletaka na itutu e vakadonui.
^ Rauta na 4 na kaloko ena yakavi.
^ E sega ni vakamatatataki ena vosa vaKirisi se qase vei Pita o Adriu se gone.
