Nodra Cakacaka na Yapositolo 6:1-15
6 Ena gauna ya nira sa le levu tiko ga na tisaipeli, era qai vosavosa na tisaipeli vosa vaKirisi vei ira na tisaipeli vosa vakaIperiu, nira sa guilecavi tiko na nodra yada ena wasei ni kedra e veisiga.+
2 Ratou mani kacivi ira kece mai na tisaipeli na le Tinikarua, ratou qai kaya: “E sega ni dodonu* me keitou biuta tu na vosa ni Kalou me keitou lai wase kakana.+
3 O koya gona raveitacini, ni digia mada mai vei kemuni e vitu na tagane ivakaraitaki vinaka,+ eratou sinai ena yalo tabu kei na vuku vakalou,+ me keitou lesi ratou me ratou qarava na cakacaka yaga qo.+
4 Ia keitou na solia na neitou gauna kei na neitou bula ena masu kei na vakavulici ni vosa ni Kalou.”
5 Era marautaka sara ga na tiko kece e kea na ka e tukuni, ra mani digitaki Sitiveni, e dua e sinai ena vakabauta kei na yalo tabu, o Filipi tale ga,+ o Pirokoro, o Naikena, o Taimoni, o Parimina, kei Nikola, e dua e tavuki ina lotu vakaJiu mai Anitioki.
6 Eratou kau yani vei ratou na yapositolo, ni oti na masu, eratou sa qai tabaki ratou ena ligadratou.+
7 E tete tiko ga na vosa ni Kalou, e tubu tiko ga+ vakalevu na kedra iwiliwili na tisaipeli+ e Jerusalemi, era mai vakabauta tale ga e levu sara na bete.+
8 E sinai o Sitiveni ena loloma kei na kaukaua ni Kalou, e rawa ni cakamana kina, cakava tale ga eso na ka veivakurabuitaki vei ira na lewenivanua.
9 Ia era mai veileti kei Sitiveni eso mai na valenilotu e vakatokai na Nodra Valenilotu na Sereki, eso tale ga na kai Kirini kei na kai Alekisadria, eso mai Silisia, kei na so tale mai Esia.
10 Era sega ga ni sabaya rawa na nona vosa ni sinai ena vuku kei na yalo tabu.+
11 Era qai uqeti ira lo eso na tagane mera kaya: “Keimami rogoca ni vosabeci Mosese tiko kei na Kalou.”
12 Era vakauqeti ira na lewenivanua, ira na qase, kei ira na vunivola, ra mani lako yani ra vesuki koya, ra kauti koya sara ina Sanadrini.
13 Era kauta yani eso na ivakadinadina lasu mera kaya: “O ka qo e vosabeca tiko ga na vanua tabu qo kei na Lawa.
14 Kena ivakaraitaki, keimami rogoci koya ni tukuna ni o Jisu na kai Nasareci ena talaraka na noda vanua, ena veisautaka tale ga na ivakarau ni noda bula a solia vei keda o Mosese.”
15 Era wanonovi koya kece na dabe tiko ena Sanadrini, era raica na matana ni vaka na mata ni agilosi.
iVakamacala e ra
^ Kir., “marautaki.”
