Nodra Cakacaka na Yapositolo 15:1-41
15 Era lako sobu mai Jutia eso na tagane ra qai vakavulica vei ira na veitacini: “Ke oni sega ni cili me vaka na Lawa e vola o Mosese,+ oni na sega ni vakabulai.”
2 Ia nira veileti qai veiba oti kei rau o Paula kei Panapasa, era mani lokuca me lako o Paula, o Panapasa kei na so tale i Jerusalemi+ vei ratou na yapositolo kei ira na qase ena vuku ni ka qo.*
3 Era talaci ratou sara na tagane qo na lewe ni ivavakoso me ratou qai vakacavara yani na ilakolako i Finaisi kei Samaria. Ena ilakolako qori eratou vakamacalataka kina na nodra sa tavuki mai na lewe ni veimatanitu. Qo e vakamarautaki ira vakalevu na veitacini kece.
4 Ni ratou yaco i Jerusalemi, dua na ka nodra marautaki ratou na lewe ni ivavakoso mai kea, wili kina o iratou na yapositolo kei ira na qase. Eratou vakamacalataka tale ga na levu ni ka e cakava na Kalou ena vukudratou.
5 Era qai tucake eso era a lewe tu ni nodra ilawalawa vakalotu na Farisi era sa mai vakabauta, ra qai kaya: “E dodonu mera cili. Mera vakaroti tale ga mera muria na Lawa e vola o Mosese.”+
6 Era soqoni vata mai na yapositolo kei ira na qase mera veivosakitaka na ka qo.
7 Ni oti e dua na veivosaki katakata, e tucake o Pita qai kaya vei ira: “Raveitacini, oni kila vinaka na kena itekivu, ni sa digitaki au na Kalou mai na kemuni maliwa meu vunautaka na itukutuku vinaka vei ira na lewe ni veimatanitu, mera vakabauta kina.+
8 Na Kalou ga, o koya e kila na ka e tu e lomada,+ e vakadonui ira ena nona solia vei ira na yalona tabu,+ me vaka ga e cakava vei keda.
9 E sega tale ga ni vakaduiduitaki keda vei ira,+ e vakasavasavataka ga na lomadra nira sa vakabauta.+
10 Ia na cava oni vakatovolea kina na Kalou ena nomuni taqara e domodra na tisaipeli na ivua+ era a sega mada ga ni colata rawa na tukada, se o keda?+
11 Ia eda vakabauta na Jiu ni na vakabulai keda na Kalou ena loloma soli wale ni noda Turaga o Jisu,+ me vaka era vakabauta tale ga na tisaipeli era sega ni Jiu.”+
12 Ni vosa oti o Pita, era vagagalu kece na ilala levu era tiko e kea. Era sa qai vakarogoci Panapasa kei Paula ni rau vakamacalataka e levu na ka veivakurabuitaki kei na cakamana e cakava na Kalou ena vukudrau ena kedra maliwa na veimatanitu.
13 Ni rau vosa oti, e qai kaya o Jemesa: “Raveitacini, ni rogoci au mada.
14 Sa vakamacalataka vinaka o Simioni+ na imatai ni gauna e golevi ira kina na veimatanitu na Kalou me digitaka e dua na ilawalawa me vakatokai ena yacana.+
15 E duavata kei na tikina qo na nodra vosa na Parofita me vaka e volai:
16 ‘Ni oti na veika qo, au na qai lesu meu tara tale na valelaca* i Tevita sa bale tu, au na tara na kena irusarusa me duri tale,
17 mera vakasaqarai Jiova* kina na tamata era vo tu mai, wili kina o ira kece na lewe ni veimatanitu, o ira era vakatokai ena yacaqu, e kaya o Jiova,* o koya e vakayacora na ka kece qo me vaka+
18 sa nakita makawa tu mai.’+
19 Au vakatulewataka gona meda kua ni vakavuleqa tale vei ira na veimatanitu era sa tavuki tiko mera qarava na Kalou,+
20 meu vola ga me tabu vei ira na veika e vakadukadukalitaki ena qaravi matakau,+ na veiyacovi tawadodonu,*+ na ka e kuna,* kei na dra.+
21 Se tekivu makawa sara na kena vunautaki ena koro na ka e vola o Mosese, wili kina na ivunau kece qo, ni dau wiliki vakadomoilevu na nona ivola ena valenilotu ena siga ni vakacecegu kece.”+
22 Era qai duavata na yapositolo, na qase, kei na ivavakoso taucoko me digitaki e vica vei ira mera tomani Paula kei Panapasa ena ilakolako i Anitioki. E mani digitaki o Jutasa, e dau vakatokai tale ga me o Parisapa, kei Sailasa,+ erau dau veidusimaki vei ira na veitacini.
23 Era mani vola qo qai solia me ratou kauta:
“O keimami na tacimuni na yapositolo kei na qase, keimami vakabula yani vei kemuni na veitacini oni lewe ni veimatanitu mai Anitioki,+ Siria, kei Silisia.
24 Keimami sa mai rogoca ni so vei keimami era lai vakavuleqa vei kemuni ena ka era tukuna,+ era saga mera vakaleqai kemuni, ia keimami a sega ni solia vei ira e dua na ivakaro,
25 keimami duavata kina me digitaki eso tale mera talai yani vei kemuni mera tomani rau na wekada lomani o Panapasa kei Paula,
26 erau solia nodrau bula ena yaca i Jisu Karisito na noda Turaga.+
27 O koya gona, keimami talai Jutasa kei Sailasa me rau vakamacalataka tale ga na ka kece e volai tiko yani.+
28 Keimami duavata kei na yalo tabu+ me keimami kua ni vakataqara vei kemuni e dua tale na icolacola, vakavo ga na ka bibi kece qo:
29 ni vakatabui kemuni mai na ka kece e cabori ina matakau,+ na dra,+ na ka e kuna,*+ kei na veiyacovi tawadodonu.*+ Ke oni qarauni kemuni mai na ka kece qo, oni na tikovinaka kina. Me nomuni na vakacegu!”*
30 Ni ratou sa biubiu na tagane qo, eratou lako sobu i Anitioki, eratou kumuni ira vata e dua na ilala tisaipeli levu, ratou solia sara vei ira na ivola.
31 Nira wilika oti, era marautaka vakalevu na veivakauqeti.
32 Ni rau parofita tale ga o Jutasa kei Sailasa, erau sega ni cegu ena nodrau tauca na vosa ni veiuqeti me rau vakayaloqaqataki ira na veitacini.+
33 Ni sa oti e vica na siga, era sa qai talaci rau vakavinaka me rau lesu vei ira na talatala mai.
34 * ——
35 Ia erau tiko ga mai Anitioki o Paula kei Panapasa ni rau veivakavulici tiko, era tomani rau e levu tale ena nodra vunautaka na itukutuku vinaka ni vosa i Jiova.*
36 Ni oti e vica na siga, e kaya o Paula vei Panapasa: “Daru lesu mada me daru lai sikovi ira na veitacini ena koro kece daru a vunautaka kina na vosa i Jiova* me daru raica se ra vakacava tiko.”+
37 A vinakata o Panapasa me kauti Joni, e yacana tale ga o Marika.+
38 Ia e sega ni donu vei Paula me rau kauti koya, ni a biuti rau mada mai Pamifilia qai sega ni lako vata kei rau ina cakacaka.+
39 Ena vuku ni tikina ya, e tubu sara ga kina e dua na veiba katakata, ratou mani veitalatala. E kauti Marika o Panapasa,+ rau soko sara i Saipurusi.
40 A digitaki Sailasa o Paula, e mani lako ni oti nodra tataunaki koya na veitacini vei Jiova* kei na nona loloma soli wale.+
41 E lako sara i Siria kei Silisia me vakayaloqaqataki ira na ivavakoso.
iVakamacala e ra
^ Se “ni veileti.”
^ Se “valetabanikau, vale.”
^ Se “na ka e vakamatei qai sega ni vakadavei na kena dra.”
^ Kirisi, por·neiʹa. Raica na iVakamacala ni Vosa.
^ Kir., “Moni bulabula vinaka.”
^ Kirisi, por·neiʹa. Raica na iVakamacala ni Vosa.
^ Se “na ka e vakamatei qai sega ni vakadavei na kena dra.”
