Kaya mada nida tu mai Jeriko, e dua na siti ena vanua o Kenani ra qai sega ni vakabauti Jiova na lewena. E tiko kina e dua na yalewa na yacana o Reapi.

Ni se gone o Reapi, sa rogoca voli na italanoa ni nona wasea rua na Wasa Damudamu o Mosese qai liutaki ira na Isireli mai Ijipita. A rogoca tale ga na sala e vukei ira kina o Jiova mera qaqa vei ira na meca. Ia qo e rogoca nira sa keba volekati Jeriko na Isireli!

Dua na yakavi, erau gole yani e Jeriko e rua na yamata ni Isireli me rau lai raica na siti. Erau gole ena vale i Reapi, qai sureti rau i vale me rau cegu vakalailai. Ni sa bogi, e qai kila na tui Jeriko ni rau tiko ena vale i Reapi na yamata. A tala sara eso na tagane mera lai kauti rau mai. E vunitaki rau na yamata o Reapi ena dela ni nona vale qai tukuna vei ira na nona tamata na tui: ‘Rau a tiko eke na yamata, ia rau sa biubiu. Ke dou lako qo, dou rawa ni toboki rau!’ O kila na vuna e taqomaki rau kina na yamata o Reapi?— Baleta e vakabauti Jiova qai kila ni na solia vei ira na Isireli na vanua o Kenani.

Ni rau vakarau biubiu mai na vale i Reapi na yamata, rau yalataka ni na bula o Reapi kei na nona vuvale ni vakarusai o Jeriko. O kila na ka rau tukuna me cakava?— Erau kaya: ‘Taura na dali damudamu qo, vakaliliga ena nomu katubaleka. Ke o cakava qori, o ira kece era tiko ena nomu vale era na bula.’ E cakava o Reapi na ka erau tukuna na yamata. O kila na ka e qai yaco?—

Oti e vica na siga, era wavokita galugalu na siti na Isireli. Era wavokita na siti me ono na siga, vakadua ena dua na siga. Ia ena ikavitu ni siga, era wavokita vakavitu na siti. Oti era qai kaila kece. E vakavuna o Jiova me kasura na bai ni siti. Ia e duri tu ga na vale e lili toka kina na dali damudamu! O raica rawa qori ena iyaloyalo?— Eratou vakabulai o Reapi kei na nona vuvale!

 Cava o vulica vei Reapi?— A vakabauti Jiova ena vuku ni veika totoka e rogoca me baleti koya. Levu tale ga na ka totoka o sa vulica me baleti Jiova. Vakacava o vakabauti koya me vakataki Reapi?— Macala ga ni o vakabauti Jiova!