LESONI 26
Na Cava Eda Sotava Tiko Kina na ca kei na Rarawa?
Ni yaco na veika ca eda dau taroga, “Na cava e yaco kina?” Eda marau ni vakamatatataka na iVolatabu na kena isau.
1. E vakavuna vakacava o Setani na ca e vuravura?
E talaidredre vua na Kalou o Setani na Tevoro ni via veiliutaki. Mani temaki rau na imatai ni veiwatini o Atama kei Ivi me rau talaidredre tale ga. E cakava qori o Setani ni lasutaki Ivi. (Vakatekivu 3:1-5) E nanuma kina o Ivi ni bureitaka tiko o Jiova na ka vinaka. E kaya o Setani nida na marau ke da talaidredre vua na Kalou. E tukuna o Setani na imatai ni lasu vei Ivi, ni na sega ni mate. Oya na vuna e vakatokai Setani kina na iVolatabu me “daulasulasu, e tama ni lasu tale ga.”—Joni 8:44.
2. Na cava erau cakava o Atama kei Ivi?
Dua na ka na nona kauaitaki Atama kei Ivi o Jiova. E kaya ni rawa ni rau kana mai na vunikau kece e tiko ena were o Iteni, vakavo ga e dua. (Vakatekivu 2:15-17) Ia rau digia me rau kana mai na vunikau qori. E “mani betia” o Ivi “na vuana qai kania sara.” Oti e mani kania o Atama. (Vakatekivu 3:6) Erau talaidredre vua na Kalou. Ni rau uasivi o Atama kei Ivi, a dodonu ga me rau cakava na ka dodonu. Ia ni rau nakita me rau talaidredre vua na Kalou, erau valavala ca kina, erau beca na nona veiliutaki. Na vakatulewa qori e vakararawataki rau vakalevu.—Vakatekivu 3:16-19.
3. E tarai keda vakacava nodrau vakatulewa o Atama kei Ivi?
Ni rau valavala ca o Atama kei Ivi rau sa sega ni uasivi, rau mani vakadewa na ivalavala ca qori vei ira nodrau kawa. E kaya na iVolatabu me baleti Atama: “Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece.”—Roma 5:12.
Levu na vuna eda rarawa kina. Eso na gauna eda rarawa ena vuku ni noda vakatulewa ca se nodra vakatulewa cala eso tale. So tale na gauna nida tiko ena vanua kei na gauna cala.—Wilika Dauvunau 9:11.
VAKEKELI
Dikeva ni sega ni vakavuna na Kalou na ca kei na rarawa eda sotava tu nikua kei na nona rai nida rarawa.
4. O koya e vakavuna tiko noda rarawa
Levu era nanuma ni lewa tiko na Kalou na vuravura taucoko. E dina qori? Sarava na VIDIO.
Wilika Jemesa 1:13 kei na 1 Joni 5:19, qai veivosakitaka na taro qo:
-
E vakavuna tiko na Kalou na noda rarawa kei na ca?
5. Ka e laurai ena veiliutaki i Setani
Wilika Vakatekivu 3:1-6, qai veivosakitaka na taro qo:
-
Na lasu cava e tukuna o Setani?—Raica na tikina e 4 kei na 5.
-
E kilai vakacava ena ka e cavuta o Setani ni o Jiova e bureitaka tiko na ka vinaka vei keda?
-
Vakacava e kaya tiko o Setani nida na marau ke noda iLiuliu o Jiova?
Wilika Dauvunau 8:9, qai veivosakitaka na taro qo:
-
Na cava e vakilai ni sa sega ni Liutaka na vuravura o Jiova?
-
Rau a bula uasivi ena Parataisi o Atama kei Ivi. Ia rau vakarorogo vei Setani mani talaidredre vei Jiova
-
Ni oti nodrau talaidredre o Atama kei Ivi, e sinai o vuravura ena ivalavala ca, rarawa, kei na mate
-
Ena vakaotia o Jiova na ivalavala ca, rarawa, kei na mate. Eda na uasivi tale qai bula ena Parataisi
6. E kauaitaka o Jiova noda rarawa
Vakacava e kauaitaka na Kalou noda rarawa? Dikeva na ka e vola o Tui Tevita kei na yapositolo o Pita. Wilika Same 31:7 kei na 1 Pita 5:7, qai veivosakitaka na taro qo:
-
E uqeti iko vakacava nomu kila ni o Jiova e raica qai kauaitaka noda rarawa?
7. Ena vakaotia na Kalou na noda rarawa kece
Wilika Aisea 65:17 kei na Vakatakila 21:3, 4, qai veivosakitaka na taro qo:
-
Na cava e veivakacegui kina noda kila ni o Jiova ena vakaotia na veika ca?
O bau kila?
Ni tukuna o Setani na imatai ni lasu, e vakaucacataki Jiova. E vakarogorogocataka na yaca i Jiova, ni sega ni iLiuliu dauloloma qai sega ni veiliutaki vakadodonu. Na gauna ena vakaotia kina o Jiova na noda rarawa, ena vakalagilagia na yacana. Kena ibalebale ena vakadinadinataka ni vinaka duadua na nona veiliutaki. E bibi duadua ena lomalagi kei na vuravura na kena vakalagilagi na yaca i Jiova.—Maciu 6:9, 10.
KA ERA KAYA ESO: “E lewa ni Kalou meda rarawa.”
-
Na cava o na kaya?
KA O VULICA
Eratou vakavuna na ca e vuravura o Setani na Tevoro kei rau na imatai ni veiwatini. E kauaitaka vakalevu o Jiova na noda rarawa, sa na vakarau vakaotia vakadua.
Railesuvi
-
Na lasu cava e tukuna o Setani na Tevoro vei Ivi?
-
E tarai keda vakacava na nodrau talaidredre o Atama kei Ivi?
-
Eda kila vakacava ni kauaitaka o Jiova na noda rarawa?
IKURI
Vulica na ibalebale ni ivalavala ca ena iVolatabu.
Wilika eso tale na vakalelewa i Setani ena were o Iteni.
“Na Cava e Vakalaiva Kina na Kalou Meda Rarawa?” (Na Vale ni Vakatawa, 1 Janueri, 2014)
E veivakacegui na isaunitaro qo.
“Cava Era Labati Kina Vakayauyau na Jiu? Cava e sega ni Tarova Kina na Kalou?” (Ulutaga ena jw.org)
Raica na ka e vulica e dua na turaga ena veika rarawa e sotava mai.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
