Ena iotioti ni bogi i Jisu kei ratou na yapositolo, a tukuna vei ratou: “Niu sa vakaturi, au na liu i Kalili.” (Maciu 26:32; 28:7, 10) Levu tale ga nona imuri era gole e Kalili. Ia na cava era lai cakava e kea?

A tukuna o Pita vei ratou na ono na yapositolo: “Au se lako mada i qoli.” Eratou kaya sara vua: “Keitou lako tale ga yani.” (Joni 21:3) Eratou sega ni rawata e dua na ika ena bogi taucoko. Ni sa matakacaca, e rairai o Jisu e baravi, ia ratou sega ni kilai koya na yapositolo. E kaci sara o Jisu: “Ragone, sa rawa eso na kemudou?” Ratou sauma: “Sega!” E kaya o Jisu: “Dou balata na lawa ena yasa ni waqa imatau me rawa kina eso.” (Joni 21:5, 6) Dua na ka na levu ni ika e coko, sega sara ga ni ratou yavia rawa mai na lawa.

E tukuna o Joni vei Pita: “Na Turaga!” (Joni 21:7) E vesuka vinaka sara o Pita na nona isulu e tolona, a sega ni dara tiko ena qoli. E lade i wai qai qalo i baravi, rauta ni ciwasagavulu na mita. Ratou muri koya vakamalua ena waqa na vo ni yapositolo, ni ratou dreta tiko yani na lawa e sinai tu kina na ika.

Ni ratou yaco i vanua, eratou raica ni sa “waqa tu na qilaiso, ra qai tavu tu kina na ika kei na madrai.” E tukuna o Jisu: “Dou kauta mai eso na ika dou se qai rawata.” E yavia mai na lawa o Pita sa sinai tu ena ika lelevu, e rauta ni 153 taucoko! E tukuna o Jisu: “Dou mai katalau.” E sega ni dua e doudou me taroga, “O cei o kemuni?” ni ratou sa kila vinaka ni oya ga o Jisu. (Joni 21:10-12) Qo na ikatolu ni gauna e rairai kina o Jisu vei ratou na ilawalawa tisaipeli.

E solia sara o Jisu na madrai kei na ika me ratou kania. De dua ni raica o Jisu na levu ni ika, e taroga: “Saimoni na luvei Joni, o cei o lomana, o yau se na ka era tu qo?” Vakacava e taleitaka vakalevu o Pita na bisinisi ni qoli mai na cakacaka e vinakata vua o Jisu? E sauma o Pita: “Turaga, oni kila niu lomani kemuni vakalevu.” Mani kaya vua o Jisu: “Vakani ira noqu lami.”—Joni 21:15.

E taroga tale o Jisu: “Saimoni na luvei Joni, o lomani au?” De dua e veilecayaki o Pita, ia e sauma vakadodonu: “Io Turaga, oni kila niu lomani kemuni vakalevu.” E sauma tale o Jisu: “Vakatawani ira na noqu sipi lalai.”—Joni 21:16.

E taroga o Jisu ena ikatolu ni gauna: “Saimoni na luvei Joni, o lomani au?” De dua e nanuma o Pita ni vakatitiqataka o Jisu na nona yalodina. E sauma ena doudou o Pita: “Turaga, oni kila na ka kece. Oni kila niu lomani kemuni vakalevu.” E cavuta tale o Jisu na ka e dodonu me cakava o Pita: “Vakani ira na noqu sipi lalai.” (Joni 21:17) Io, e bibi vei ira na veiliutaki mera qaravi ira era vagolei mai ena bainisipi ni Kalou.

A vesu qai vakamatei o Jisu ena vuku ni cakacaka e lesi koya kina na Kalou. Sa qai vakatakila vei Pita ni na sotava tale ga qori. E kaya o Jisu: “Ni o se gone, o vakaisulu ga vakataki iko o qai lako ena vanua ga o vinakata. Ia ni o sa qase, o na dodoka yani na ligamu vua tale e dua me vakasulumi iko, e kauti iko tale ga ina vanua o sega ni vinakata.” Sa qai uqeti koya o Jisu: “Muri au tiko ga.”—Joni 21:18, 19.

E raici Joni o Pita qai taroga: “Turaga, vakacava o koya qo?” Ni dau lomani Joni vakalevu o Jisu, na itavi cava ena lesi vua ena gauna se bera mai? E sauma o Jisu: “Ke lomaqu me bula tiko me yacova noqu lako mai, na cava mo leqataka kina?” (Joni 21:21-23) E sega ni dodonu me leqataka o Pita na ka era cakava eso tale, e bibi me muri Jisu tiko ga. Sa qai tukuna o Jisu ni na dede sara nona bula o Joni vei ira kece na yapositolo, ena raivotutaka tale ga nona lako mai o Jisu me veiliutaki ena Matanitu ni Kalou.

Io, e levu tale na ka e cakava o Jisu, ia e sega ni rawa ni volai kece ena ivolavivigi.