“Na levu ni ka era cakava na tamata ena rawa ni vakavuna e levu tale na leqa tubukoso. Ena rawa ni luvu e levu na siti, katakata sivia na draki, cagilaba kaukaua, kei na maca ni wai. Ena rawa tale ga ni kawaboko e vica vata na milioni na kau, kei na manumanu. Qo e sega ni itukutuku lasutaki se me vakatubutaki. Qori sara ga na ka era raica na saenitisi e vu mai ena kena sega ni veisautaki na lawa me baleta na iyaubula.”—Tukuna o António Guterres, na vunivola levu ni Matabose kei Vuravura, ena dua na ripote e vakarautaka na Intergovernmental Panel ena ika4 ni Epereli, 2022.

 “Era kaya na saenitisi ni rawa ni vakacacani ena veisau ni draki e 423 na vanua era taqomaki tu kina na kau, kei na veikabula tale eso e Merika. Baleta na veivanua qori ena rawa ni vakaleqai ena katakata ni draki. De dua eda sa wilika ena iVolatabu na veika e rawa ni vakavuna na leqa tubukoso, me vaka na kama kei na waluvu, waicala ni waicevata, tubu na yalayala ni waitui, toso cake tale ga na katakata ni draki.”—tabaki ena ika15 ni June 2021 ena niusipepa The New York Times, kena ulutaga “Flooding Chaos in Yellowstone, a Sign of Crises to Come.”

 Vakacava e rawa ni wali na vakacacani ni veika bula? Ke dina qori, o cei ena walia? Raica mada qo na ka e tukuna na iVolatabu.

 E kaya na iVolatabu na Kalou ena “vakawabokotaki ira na vakarusai vuravura tiko.” (Vakatakila 11:18) E tolu na ka eda raica rawa ena tikinivolatabu qori:

1.  1. Ena vakaleqa na vuravura na ka era cakava na tamata.

2.  2. Ena oti na vakacacani ni vuravura.

3.  3. Na Kalou ena walia na veika kece e vakaleqa tu na veikabula.

 E kaya na iVolatabu na “vuravura ena tu ga me tawamudu.” (Dauvunau 1:4) Ena sega vakadua ni lala.

•   “O ira na yalododonu era na taukena na vuravura, era na qai bula tawamudu kina.”—Same 37:29.

 Ena bulabula tale na noda vuravura.

•   “Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.”—Aisea 35:1.