O nanuma ni na vinaka cake sara na ituvaki ena veigauna se bera mai? Dina ni vakilai tu na ituvaki dredre nikua, ia e levu era saga me donu tiko ga nodra rai. Vakacava eda rawa ni nuitaka ni na vinaka cake na veigauna se bera mai? Io! E yalataka na iVolatabu na inuinui totoka meda rai vakanamata kina.

•  Na inuinui cava e tukuni tu ena iVolatabu?

•  Vakacava e dredre me vakabauti na inuinui e yalataki ena iVolatabu?

•  Ena vakayacori vakacava na inuinui totoka qori?

•  Gauna cava ena vakayacori kina?

•  Ena vukei keda vakacava nikua na inuinui e yalataki ena iVolatabu?

 E kaya na iVolatabu ni levu na ituvaki dredre eda sotava tiko nikua. Ia e yalataka nida na sega ni sotava tu ga na ituvaki qori me tawamudu. Dikeva mada eso na kena ivakaraitaki.

•   Vu ni Leqa: Sega na vale

   Ka e kaya na iVolatabu: “Era na tara vale era na tiko kina.”—Aisea 65:21.

   Kena ibalebale ena veigauna se bera mai: Era na marautaka na tamata nira na tiko ga ena nodra dui vale.

•   Vu ni leqa: Sega na cakacaka kei na bula dravudravua

   Ka e kaya na iVolatabu: “Era na marautaka vakalevu na cakacaka ni ligadra o ira au digitaka.”—Aisea 65:22.

   Kena ibalebale ena veigauna se bera mai: Era na marautaka na tamata na cakacaka era cakava, era na vakaicovitaki tale ga kina.

•   Vu ni leqa: iValavala tawadodonu

   Ka e kaya na iVolatabu: “Ira na turaga era na lewadodonu.”—Aisea 32:1.

   Kena ibalebale me baleta na veigauna se bera mai: Ena oti vakadua na veivakaduiduitaki ena vuku ni duidui matatamata, itutu se rawaka vakailavo. Sa na caka vei keda kece na ka e dodonu.

•   Vu ni leqa: Kana vakaca kei na waloloi

   Ka e kaya na iVolatabu: “Ena levu na covuata e vuravura, ena vuabale ena dela ni veiulunivanua.”—Same 72:16.

   Kena ibalebale ena veigauna se bera mai: Ena sega ni caka rawa na levu ni kakana bulabula eda na kania. Ena sega tale ga ni dua ena viakana se tauvimate ena kana vakaca.

•   Vu ni leqa: Basulawa kei na itovo kaukaua

   Ka e kaya na iVolatabu: “Era na dui dabe ena ruku ni nodra vaini kei na ruku ni nodra vunilolo, ena sega ni dua me vakarerei ira.”—Maika 4:4.

   Kena ibalebale ena veigauna se bera mai: Eda na nuidei qai sega ni rerevaka e dua na ka nira sa sega na daucaka ca, ia o ira na “yalododonu era na taukena na vuravura.”—Same 37:10, 29.

•   Vu ni leqa: iValu

   Ka e kaya na iVolatabu: “Ena sega ni lave iseleiwau e dua na matanitu ina dua na matanitu, era na sega ni vulica tale na ivalu.”—Aisea 2:4.

   Kena ibalebale ena veigauna se bera mai: Eda na nuidei qai taqomaki nira na muduki laivi na tamata ca, era na qai taukena na vuravura na yalododonu. (Same 72:7) Ena sega tale ni dua e rarawa ni takali e dua e lomana ena vuku ni ivalu. Era na sega tale ga na isenivalu.

•   Vu ni leqa: Tauvimate kei na mate ca

   Ka e kaya na iVolatabu: “Ena sega ni kaya e dua na lewenivanua: ‘Au tauvimate.’”—Aisea 33:24.

   Kena ibalebale ena veigauna se bera mai: Ena sega ni dua e vakaleqai na yagona se tauvimate. (Aisea 35:5, 6) E yalataka tale ga na iVolatabu ni sa na “sega tale na mate.”—Vakatakila 21:4.

•   Vu ni leqa: Vakacacani na veika bula

   Ka e kaya na iVolatabu: “Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.”—Aisea 35:1.

   Kena ibalebale ena veigauna se bera mai: Ena parataisi na vuravura taucoko era na qai tiko kina o ira na kawatamata, me vaka ga na nona inaki taumada na Kalou.—Vakatekivu 2:15; Aisea 45:18.

 E macala ni na dredre meda vakabauta qori. Ia oni uqeti moni dikeva eso tale na ka e kaya na iVolatabu me baleta na veigauna se bera mai. Na vuna? Na ka e yalataka na iVolatabu e duidui mai na ka era yalataka kei na ka era kaya na tamata. Na yalayala e tiko kina e vu mai vua na Kalou. Qo eso na vuna e duidui kina:

•   E nuitaki na Kalou. E kaya na iVolatabu ni sega ni “lasu rawa na Kalou.” (Taito 1:2) Kuria ya, e tiko ga vua na kaukaua me tukuna na veika ena yaco ena gauna se bera mai. (Aisea 46:10) E tu ena iVolatabu e levu na ivakaraitaki ni ka e tukuna na Kalou ena yaco dina. Me ikuri ni vakamacala sarava na vidio, Eda Vakadeitaka Vakacava ni Dina na iVolatabu?

•   E tu vua na Kalou na kaukaua me walia noda leqa. E kaya na iVolatabu ni tu vua na kaukaua me “cakava na ka kece e via cakava.” (Same 135:5, 6) Kena ibalebale, ena sega ni dua ena tarova nona vakayacora na nona yalayala. E vinakata tale ga na Kalou me vukei keda ni lomani keda.—Joni 3:16.

 De dua o na rairai vakasamataka, ‘Ke Kalou kaukaua qai vinakata me vukei keda, cava na vuna eda sotava tiko kina e levu na ituvaki rarawa?’ Me saumi qori sarava na vidio, Na Cava e Vakatara Tiko Kina na Kalou na Rarawa?

 Ena vakayagataka na Kalou na nona matanitu mai lomalagi me vakayacora kina nona yalayala. E digitaki Jisu Karisito me iLiuliu ni matanitu qori, e solia tale ga vua na lewa me liutaka na vuravura kei ira na bula kina. Ni se tu e vuravura o Jisu e vakabulai ira na tauvimate, vakani ira na waloloi, vakamaravutaka na draki ca, e vakaturi ira tale ga na mate. (Marika 4:39; 6:41-44; Luke 4:40; Joni 11:43, 44) E vakaraitaka sara ga qori na ka ena cakava ni sa Tui ni Matanitu ni Kalou.

 Sarava na vidio Na Cava na Matanitu ni Kalou? mo vulica kina e levu na ka me baleta na Matanitu ni Kalou kei na kena yaga vei iko.

 Sa voleka sara! Eda vakadeitaka vakacava qori? E tukuni ena iVolatabu e levu na ivakatakilakila e vakaraitaka ni sa vakarau veiliutaki e vuravura na Matanitu ni Kalou. (Luke 21:10, 11) Na ituvaki e yaco tiko qo e vuravura sa volatukutukutaki oti tu ena iVolatabu

 Mo kila e levu tale na ka wilika na ulutaga, “Gauna Cava ena Veiliutaki Kina e Vuravura na Matanitu ni Kalou?”

 E vakatauvatana e dua na dauvola iVolatabu na inuinui e vaka na “ikelekele ni noda bula.” (Iperiu 6:19) Na ikelekele ena taura dei toka na waqa ni voravora na wasawasa. Kena ibalebale, na inuinui tale ga e tukuni ena iVolatabu ena vukei keda meda vosota na ituvaki dredre eda sotava tu nikua. Na noda inuinui e vukei keda meda lomavakacegu, marau, donu noda rai, da qai bulabula.—1 Cesalonaika 5:8.