Ena yabaki qo, eda nuitaka ni na yaco vei keda kei ira na noda vuvale eso na ka vinaka. Cava meda nuidei kina ni na vinaka na gauna se bera mai?

 E tukuni ena iVolatabu ni na lekaleka wale na veika dredre eda sotava tiko qo, sa voleka tale ga na gauna me oti kina. E tukuni mada ga ni iVolatabu e “volai meda vakavulici kina, me noda na inuinui. . . kei na noda vakacegui mai na veika e volai ena iVolatabu.”—Roma 15:4.

•   Mo kila e levu tale na ka e yalataka na iVolatabu, wilika na ulutaga “iNuinui Totoka ena Veigauna se Bera Mai.”

 Na inuinui ena iVolatabu e vaka na “ikelekele ni noda bula.” (Iperiu 6:19) Na inuinui qori e rawa ni vakadeitaki keda. Ena vukei keda tale ga meda vosota na ituvaki dredre, donu tiko ga noda rai, qai vakamarautaki keda. Kena ivakaraitaki:

•   Raica na sala e yaga kina na inuinui ena iVolatabu vua e dua na tagane e sasaga tiko me veisau. Sarava na vidio, Au Rarawataka Sara ga Noqu iVakarau ni Bula.

•   Raica na sala e yaga kina vei keda na inuinui ena iVolatabu ni mate e dua eda lomana. Sarava na vidio, Nodra Vakacegui na Lolosi.

 Levu era nuitaka tu me yaco na veika vinaka. Ia era sega ni vakadeitaka ni na yaco na ka era nuitaka. E duatani na ka e yalataka na iVolatabu. Na vuna? Ni ka e yalataki tu kina e vu mai vua na Kalou o Jiova a “e sega ni lasu rawa.” (Taito 1:2) O Jiova duadua ga e tu vua na kaukaua me vakayacora na ka kece e yalataka. Ena “cakava na ka kece e via cakava.”—Same 135:5, 6.

 Keimami vinakata mo vakila tale ga na yaga ni inuinui ena iVolatabu. O rawa ni vakadeitaka ni na yaco dina na ka e yalataka ni o “dikeva vinaka na iVolatabu.” (Cakacaka 17:11) Saga mo vakasaqara sara ga vakataki iko ni o vulica wale na iVolatabu. Vakanuinui tiko ga ni na yaco na veika vinaka ena yabaki qo!