Ni toso na yabaki, sa dau luluqa na nodra veilomani eso na veiwatini. Ia ke vakilai tiko qori ena nomu bula vakawati e dodonu mo kauai kina.

•  Ka mo kila

•  Ka o rawa ni cakava

 Bibi na veilomani me dei kina na vakawati. E yaga na kakana kei na wai me kaukaua qai bulabula vinaka kina na yagoda, e bibi tale ga na veilomani ena vakawati me rawa ni dei qai kaukaua tiko ga. Ni oti mada ga e vicasagavulu na yabaki ni bula vakawati, e bibi me rau vakadeitaka tiko ga na veiwatini ni dei na nodrau veilomani kei na nodrau dau veikauaitaki.

 Na loloma dina e sega ni nanumi koya ga. Ena vakamarautaki kena isa. Koya gona, me kua ni vakaraitaki na loloma ena gauna ga e nanumi ni vinaka me vakaraitaki kina. Na isa ni vakawati vinaka ena kila na gauna e vinakata kina o kena isa me lomani, qai saga me cakava sara.

 Era dau vinakata vakalevu na yalewa vakawati mera lomani ni vakatauvatani kei ira na tagane vakawati. E rawa ni lomani watina vakalevu o tagane vakawati. Ia ke vakaraitaka ga o tagane na loloma qori ni tekivu se ni oti e dua na siga, se ni bera na veiyacovi, ena lomatarotarotaka o yalewa ke lomani koya dina o watina se sega. E bibi me vakaraitaka o tagane ni lomani watina e veigauna kece.

 Vakaraitaka na loloma ena ka o kaya. Na vosa me vaka “Au domoni iko” se “O talei dina vei au,” ena rawa ni vakamarautaki watimu.

 iVakavuvuli vakaivolatabu: “Na cavuta ga na gusumudou na ka e sinai tu e lomamudou.”​—Maciu 12:34.

 Vakatutu: Rawa ni o vakayagataka eso tale na iwalewale mo vakaraitaka kina nomu loloma me vaka nomu volavola vua, imeli, se vakau itukutuku ena talevoni.

 Vakaraitaka na loloma ena ka o cakava. Na nomu mokoti koya, reguci koya se nomudrau veitauriliga ena rawa ni kila kina o watimu na levu ni nomu domoni koya. Na ivakarau ni nomu tarai koya, raici koya, se nomu dau soli iloloma vua ena kilai kina ni o kauaitaki koya dina. Dau vukei watimu ena so na ka, me vaka na nomu veivuke ena volivoli, dolava na katuba, sava iyaya ni kana, savasava, se mo vakasaqa. Ni o cakava qori o sa vakaraitaka tiko ni o lomani koya, sega ni o veivuke ga!

 iVakavuvuli vakaivolatabu: “Meda kua ni loloma [wale] ga e gusu se na vosa, me vakavotukana, me dina na noda loloma.”​—1 Joni 3:​18.

 Vakatutu: Lomani watimu tiko ga me vaka ga na gauna drau se veibuku tiko kina.

 Me tiko nomudrau gauna vakaveiwatini. Ni drau tiko taurua ga ena dei kina nomudrau vakawati, ena vakadeitaka tale ga o watimu ni o marautaka na nomudrau tiko vata. Ena dredre toka me caka qori ke tiko o ratou na gone, se levu na veika vakabisinisi me caka e veisiga. Ia rawa ni drau tuvanaka mo drau taubale taurua ga.

 iVakavuvuli vakaivolatabu: “Vakadeitaka . . . na veika era bibi sara.”​—Filipai 1:​10.

 Vakatutu: E levu na veiwatini era dau osooso, ia era dau tikica na gauna mera dau kana vata kina vakaveiwatini.

 Kilai kemu isa. E duidui na sala eda dau vinakata kina meda lomani. Drau rawa ni veitalanoataka na sala drau dui vinakata kina me vakayacori qori, ke vinakati tale ga me vakavinakataki. Oti mo saga sara mo cakava na veika e vinakata vei iko o watimu. Nanuma tiko ni bibi na veilomani me dei kina na vakawati.

 iVakavuvuli vakaivolatabu: “Na loloma . . . e sega ni kauaitaka ga na ka e baleti koya.”​—1 Korinica 13:​4, 5.

 Vakatutu: Kua ni vakasaurarataki watimu me lomani iko, e vinaka mo taroga, ‘Cava au rawa ni cakava me lomani au kina vakalevu o watiqu?’