Sa qai kila o yalewa ni dau sarava lo tiko o watina na iyaloyalo vakasisila. E kere veivosoti vua o tagane, qai yalataka ni na sega ni cakava tale. Ia e baci cakava tale.

 Vakacava o sotava tiko qori? E vinaka mo kila na sala ena rawa ni vakaleqai watimu kina na sara iyaloyalo vakasisila, kei na ka mo cakava mo muduka kina. a

Ena ulutaga qo

•  Ka mo kila

•  Ka o rawa ni cakava

•  Ke sara iyaloyalo vakasisila o watimu

 Na iyaloyalo vakasisila e rawa ni vakaleqa na bula vakawati. E rawa ni vakavuna na cudru qai sega na veinuitaki. b

 Qo na ka ena vakila o yalewa ke dau sara iyaloyalo vakasisila o watina:

•   Dabuitaki. E kaya o Sarah e dua na yalewa vakawati, “E vaka ga e veibutakoci vakavica vata o watiqu.”

•   Beci koya. E kaya e dua na yalewa vakawati na nona dau sara iyaloyalo vakasisila o watina e vakavuna me “madua qai nanuma ni sega na kena yaga.”

•   Kasami. E kaya e dua na yalewa vakawati o Helen, “Au dau kasamitaka na ka kece e cakava o watiqu.”

•   Lomaleqa. E kaya e dua na yalewa vakawati o Catherine, “Vaka au sa lai leqataka vakalevu na ka e cakava o watiqu.”

 Vakasamataka mada: E kaya na iVolatabu ni o tagane e dodonu me lomani watina. (Efeso 5:25) Ena sega ni rawa gona ni lomani watina ke vakavuna tiko na nona beci koya, kasami qai lomaleqa

 E sega ni rawarawa na muduki ni sara iyaloyalo vakasisila. E kaya e dua na yalewa vakawati o Stacey, “Sa biuta o watiqu na kana tavako, mariwana kei na gunu alakaolo. Ia e dredre ga vua me biuta na sara iyaloyalo vakasisila.”

 Ke o sotava tiko na ituvaki qori, qo eso na vakatutu ena rawa ni vukei iko mo muduka vakadua.

•   Vuna e ca kina na iyaloyalo vakasisila. Na ivakarau qori e uqeta na yalo ni nanumi koya ga. Ena sega kina na loloma, veinuitaki kei na yalodina me marautaki kina na vakawati. E sega ni dokai tale ga kina na Kalou o Jiova a tauyavutaka na vakawati.

   iVakavuvuli vakaivolatabu: ‘Me rokovi na vakawati.’—Iperiu 13:4.

•   Kua ni cakitaka na ka o cakava. Mo kua ni kaya, ‘Au na sega ni sara iyaloyalo vakasisila ke lomani au vakalevu o watiqu.’ E sega ni dodonu mo beitaki watimu, qori e vaka ga o vakaiulubale tiko mo sarava tiko ga na iyaloyalo vakasisila.

   iVakavuvuli vakaivolatabu: “E vakatovolei e dua ni bacani koya qai siwati koya na nona gagadre ca.”—Jemesa 1:14.

•   Veivosaki vakadodonu kei watimu. E kaya e dua na tagane vakawati o Kevin: “Au dau tarogi watiqu keu vakaraica tiko e dua na itaba veivagarogaroi se sega. E sega ni dua na ka e vunitaki ni keirau dau veivosaki vakadodonu.”

   iVakavuvuli vakaivolatabu: “Keitou vinakata me keitou dina ena ka kece.”—Iperiu 13:18.

•   Qaqarauni. Ena rawa ni o sarava tale na iyaloyalo vakasisila ke vakayabaki mada ga nomu sega tu ni sarava. E kaya o Kevin, sa cavuti oti mai: “E tini na yabaki noqu sega ni sara iyaloyalo vakasisila, au nanuma ga niu na sega ni sarava tale. Ia na gagadre ca qori e vaka ga e dua na manumanu kila e waraka tu na gauna veiganiti me vakayadrati kina.”

   iVakavuvuli vakaivolatabu: “O koya.  . . e nanuma ni sa tudei tu, me qarauna me kua ni bale.”—1 Korinica 10:12.

•   Ni o temaki, vakasama mada. De dua o na sega ni tarova na nomu gagadre, ia o rawa ni digia mo sarava se kua. Ena rawa ni seavu na gagadre qori ke o vakasamataka eso tale na ka.

   iVakavuvuli vakaivolatabu: “Moni kila yadua na sala moni lewa kina na yagomuni, me savasava qai rokovi, moni kua ni dau kocokoco se garogaro vakasisila.”—1 Cesalonaika 4:4, 5.

•   Qarauna na ituvaki o rawa ni temaki kina. E kaya na ivola na Willpower’s Not Enough, “na gauna o temaki kina, e vaka ga e waqa na masese. E vinakati na benisini . . . me rawa ni waqa.”

   iVakavuvuli vakaivolatabu: “Me kua ni dua na ka ca me lewai au.”—Same 119:133.

•   Kua ni soro. Ena taura toka e dua na gauna se vakayabaki me rawa ni nuitaki iko tale o watimu. Ia era sa rawata qori e levu na veiwatini.

   iVakavuvuli vakaivolatabu: “Na loloma e vosovoso.”—1 Korinica 13:4.