E dau kilai levu na boto tagane na Japanese tree frog ena rorogo ni nona tagi, e dau veitaravi qai vaka e sega ni rogo matau. Ia ke ra tagi vata ena dua ga na gauna e vica vata na boto va qori, e rawarawa ni kilai na tagi ni boto yadua. Era kaya na dau dikeva na boto e Japani, ni rawati qori ena maqosa ni nodra tuvanaka na rorogo ni nodra tagi nira kaciva na boto yalewa.

 Vakasamataka mada: Era dau kaci na boto tagane qori mera rawai ira kina na ka yalewa. Na rorogo ni nodra tagi e vu mai ena nodra itagitagi, ena vakarogolevutaki ena loma ni domodra qai vaka tu na baluni.

 Ena kilai vakacava na nona tagi e dua na boto tagane mai vei ira na kena vo? Era raica na dauvakadidike ke ra tiko veivolekati mada ga, era na sega ni tagi vakaveitalia. Ia era na tagi yadudua qai caka vakamatau. Qori e sega kina ni veicoqacoqa na rorogo ni nodra tagi, e rogo vinaka qai sega ni vaka vu oca. E rawa tale ga nira cegu vakalekaleka ena maliwa ni nodra tagi yadua.

 Na iwalewale ni nodra tagi na boto qori e uqeti ira na dauvakadidike ni vakau itukutuku ena mona livaliva, mera vakavinakataka na totolo ni nodra vakau itukutuku (data), me kua tale ga ni veicoqacoqa. E yaga vakacava qori? E taladrodro vinaka na vakau itukutuku qai sega ni vakalusi livaliva.

 Cava o nanuma? E buli se bula vakaidewadewa na nona rawa ni tuvanaka vinaka na boto na Japanese tree frog na nona tagi?