Dua na gauna balavu nodra sa vakadikeva tiko mai na saenitisi era dau vulica na veika me baleti ira na manumanu, na kena dau kabi dei toka na dio ena vatu, duru, kei na dago ni waqa. E tukuni ni drega e toka ena dio e sa bau kaukaua sara ga ni vakatauvatani kei na drega era bulia na tamata. Ia se vinakati tiko ga me kilai se rawa vakacava ni dau kabi na dio ena vanua suasua.

 Dikeva mada: E laurai ena vakadidike ni dau vakaraica matua sara na dio na vanua me na lai kabi toka kina. Ni sa kunea rawa e dua na vanua vinaka sa na qai buraka kina e rua na mataqali drega. Na kena imatai e vaka na waiwai, ena vakamamacataka na vanua suasua. Ena vakarautaka tale ga me rawa ni kabi vinaka kina na ikarua ni drega. Na kena ikarua qori e tiko kina e dua na mataqali protein e vakatokai na phosphoproteins.

 Ni rau biu vata na rua na drega qo, ena vodi mada ga na sasaga kece ni manumanu somidi me kaliraka tani. E bibi me kaukaua qai dei vinaka na drega qori, ni na vukea na kabi dei ni dio ena nona bula taucoko.

 Era sega ni bau vakasamataka tu va qori e liu na saenitisi na kaukaua ni drega ni dio. E kaya kina e dua na lewenitimi a vakaitavi ena vakadidike qo: “Vakasakiti dina na iwalewale qo ni rawa vakayagataki me vakamamacataki kina na vanua e dau suasua tiko ena wai.” Na vakadidike qo e rawa ni vukei ira na saenitisi mera bulia e dua na mataqali drega me vakayagataki e wai, me vaka na kena e kilai me synthetic bioadhesives me vakayagataki ena iyaya vakalivaliva se na kena era vakayagataka na vuniwai.

 Cava o nanuma? E vu mai na bula vakaidewadewa na drega ni dio se buli?