Na sulasula (gannet) a e dua na manumanuvuka vulavula ni waitui. Ni dokoulu e dela ni wasawasa e rauta ni 190 na kilomita na kena totolo ena loma ga ni dua na aua. Ni tau i wai na kena kaukaua e sivia tale vaka20 na idre ni vuravura. E rawa vakacava ni dokoulu vakawasoma na sulasula?

 Vakasamataka mada: Ni bera ni tau i wai na sulasula ena vakadretaka rawa nona ivukavuka, qai dokoulu sobu me vaka na dakaititi. Ena vakadretaka tale ga e dua na iubi e tiko e matana me taqomaka nona rai, ena vuce tale ga na domona kei na serena me rawa ni tau vinaka e dela ni wai.

 Ena vaka na irairai ni matanimoto nona itoki, uluna kei na domona ni dokoulu e dela ni wasawasa. Qori ena vukea me wasea vakatautauvata nona igu me dodonu kina na masela ni domona. Gauna vata qori sa na rai vinaka kina e loma ni wai.

 E vakacava na titobu ni vanua e rawa ni nunuva na sulasula? Na igu ni nona dokoulu sobu e rawa ni yacova e 11 na mita na kena titobu. Ena vakayagataka na tabana kei na yavana ke via tosoya tale nona nunu. E laurai ni sivia na 25 na mita nodra dau nunu e loma ni wasawasa. Oti qori sa na qai vakanawanawa e dela ni wai me vakarau vuka tale.

 Sarava nodra dokoulu na sulasula

 Era bulia na dauvakadidike e dua na misini me vaka na sulasula me rawa ni vaqaqara qai veivueti. Na misini qori e rawa ni vuka, dokoulu i wai, qai vude cake tale me rawa ni vuka. Ia nira vakatovotovotaki tiko na misini qori, e dua vei ira e kamusu veitaravi ni sa rui tau vakaukaua e dela ni wai. Era vakadinadinataka na dauvakadidike, na misini era bulia e “sega sara ga ni tautauvata kei na nona dokoulu na sulasula e lomaniwai.”

 Cava o nanuma? E buli se bula vakaidewadewa nona dokoulu na sulasula?