“Oya na vuna au tukuna kina vei kemudou, ni ka kece dou masulaka se kerea, dou vakabauta ni na rawa, dou na qai rawata dina.”—Marika 11:24, Vakadewa ni Vuravura Vou.

 “Au tukuna gona vei kemudou, na ka kece dou masulaka, dou vakabauta ni na rawa, dou na qai rawata dina.”—Marika 11:24, English Standard Version.

 Na ka e tukuna qori o Jisu e vakaraitaka vei ira nona imuri na bibi ni nodra vakabauta na kaukaua ni masu. E vakadeitaka vei ira ni Kalou e sega wale ga ni rogoca na masu, ia e sauma tale ga. Ke dua e salavata kei na inaki ni Kalou na ka e masulaka, e nuidei ni na yaco na ka e masulaka. E vaka ga ni sa saumi oti tu nona masu.

 E vakabibitaka o Jisu na bibi ni noda masu ena vakabauta. E kaya ni o koya e masu e sega ni ‘dodonu me vakatitiqa na lomana,’ ia me vakabauta ni ka ‘e tukuna ena yaco dina.’ (Marika 11:23) Na vuna? O koya e vakatitiqa ena sega ni “solia vua o Jiova e dua na ka.” a—Jemesa 1:5-8.

 O koya e vakabauta, ena masu ena ituvaki cava ga. (Luke 11:9, 10; Roma 12:12) Na sala qori e vakaraitaka kina ni vinakata dina na ka e kerea ena masu. E vakabauta tale ga ni na sauma nona masu na Kalou. E kila ni Kalou e rawa ni sauma nona masu ena sala e sega ni namaka. Ena rawa ni duidui na gauna e sauma kina qori.—Efeso 3:20; Iperiu 11:6.

 Ia na ka e tukuna o Jisu e sega ni kena ibalebale ni na saumi na ka kece ga e masulaka vua na Kalou. E vosa tiko o Jisu vei ira nona imuri era tamata vakabauta, ra qai saga nodra vinaka kece mera qaravi Jiova ena sala e vakadonuya. E kaya na iVolatabu ni o Jiova ena rogoca ga noda masu ke salavata kei na lomana. (1 Joni 5:14) Ia ena sega ni rogoca nodra masu o ira era nakita mera beca nona ivakatagedegede, kei ira na sega ni veivutunitaka na ca era cakava. (Aisea 1:15; Maika 3:4; Joni 9:31) Meda kila e levu tale na ka me baleta na masu e rogoca na Kalou, sarava na vidio qo.

 Ni voleka ni oti nona cakacaka vakaitalatala o Jisu e vuravura, e veivosakitaka kei ratou nona tisaipeli ni bibi me dei nodratou vakabauta na Kalou. E vakayagataka e dua na vosa vakatautauvata me vakaraitaka kina na kena bibi. Ni gole tiko e Jerusalemi, e raica sara e dua na vunilolo e draudrau vinaka. Ia e sega tu ni vua, sa qai cudruva o Jisu. (Marika 11:12-14) Na veivakacalai ni drau ni vunilolo e vakaraitaka na ivakarau ni nodra sokalou e Isireli makawa. Era kaya nira qarava na Kalou, ia e lailai nodra vakabauta. (Maciu 21:43) Oti e malai na vunilolo, qori e vakaraitaka na veika ena yacovi ira na Isireli era sega ni vakabauta.—Marika 11:19-21.

 Ia e nuidei o Jisu nira na bucina nona imuri na vakabauta me rawa nira vosota na ituvaki dredre, mera cakava tale ga na ka veivakurabuitaki. (Marika 11:22, 23) E yaga dina vei ira na ivakasala i Jisu me baleta na masu ni na vakarau vakatovolei nodra vakabauta. E vinakati mera vosota nona mate o Jisu, kei na veitusaqati ena cakacaka vakaitalatala. (Luke 24:17-20; Cakacaka 5:17, 18, 40) Nikua, era rawa tale ga ni vosota na ituvaki dredre o ira na imuri i Jisu nira vakaraitaka nodra vakabauta na Kalou e dau rogo masu.—Jemesa 2:26.

 Sarava na ivakamacala lekaleka ni ivola na Marika.