“Au sa tukuna rawa vei kemudou na ka kece qo mo dou vakacegu kina ena vukuqu. Dou na vakararawataki e vuravura, ia dou yaloqaqa! Au sa vakamalumalumutaki vuravura.”—Joni 16:33, iVakadewa ni Vuravura Vou.

 “A veika oqo ka’u sa tukuna vei kemudou, mo dou rawata na vakacegu e na vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura.”—Joni 16:33, New King James Version.

 Na vosa e cavuta qori o Jisu e vakadeitaka vei ratou nona imuri ni rawa ni ratou vakamarautaka na Kalou, se mani vacava na dredre kei na veivakacacani ratou na sotava.

 “Au sa tukuna rawa vei kemudou na ka kece qo mo dou vakacegu kina ena vukuqu. a” Na vo tale ni tikina e vakaraitaka ni vakacegu qo, e sega ni kena ibalebale ni na sega ni sotavi kina na ka dredre. Ia e vakaraitaka ga na vakacegu ena vakila e dua e lomana, kei na nona vakasama. Na lomavakacegu qo e rawati ena “vuku i” Jisu. E yalataka o koya ni na tala mai na yalo tabu. Na “dauveivuke” kaukaua qo ena uqeti ratou na tisaipeli i Jisu me ratou vosota tiko na dredre cava ga ratou na sotava.—Joni 14:16, 26, 27.

 “Dou na vakararawataki e vuravura, ia dou yaloqaqa!” E vakamatatataka o Jisu ni ratou na sotava nona yapositolo na dredre, me vaka na veika tawadodonu kei na veivakacacani. (Maciu 24:9; 2 Timoci 3:12) E tiko gona na vuna vinaka me ratou “yaloqaqa” se “kua ni yalolailai.”—Joni 16:33, New International Version.

 “Au sa vakamalumalumutaki vuravura.” Na vosa “vuravura” e vakaibalebaletaki vei ira na tawayalododonu ra qai yawaka na Kalou. b E kaya na 1 Joni 5:19: “e lewa tiko na vunica na vuravura taucoko,” se o Setani. O ira gona na tamata ni “vuravura” qo, e sega ni salavata kei na inaki ni Kalou na nodra rai kei na ka era cakava.—1 Joni 2:15-17.

 E saga o Setani kei na nona vuravura me kua ni cakava o Jisu na inaki ni Kalou, me vaka nona vakavulici ira eso tale me baleta na Kalou, kei na nona cabora na yagona uasivi me isoro. (Maciu 20:28; Luke 4:13; Joni 18:37) Ia e sega ni vakalaiva o Jisu na vuravura qo, me vakamua nona vakasama qai kua ni qarava na Kalou. E yalodina tiko ga me yacova na mate. Sa rauta me tukuna ni sa vakamalumalumutaki vuravura. O Setani tale ga “na turaga ni vuravura” qo e ‘sega ni dua nona kaukaua vua.’—Joni 14:30.

 E tukuna o Jisu na nona ivakaraitaki vei ratou na nona imuri me rawa ni ratou yalodina tiko ga vua na Kalou ke ratou mani vakatovolei. E vaka ga e kaya tiko o Jisu: “Keu sa rawa ni vakamalumalumutaki vuravura, kemudou tale ga dou rawa ni vakamalumalumutaka.”

 E cavuta o Jisu na vosa qo ena bogi ni bera nona mate. Ni kila ni sa vakarau vakamatei e vakayagataka na gauna qori me vakasalataki ratou kina nona yapositolo yalodina. E okati kina eso na itukutuku me ratou na vakasamataka vakabibi: Ratou sa na sega ni raici koya tale, ratou na rawa ni vakacacani, se vakamatei mada ga. (Joni 15:20; 16:2, 10) E rawa ni vakarerei ratou na yapositolo na ka e tukuni qori, ia sa qai tinia o Jisu na ka e kaya ena Joni 16:33 me rawa ni vakayaloqaqataki ratou, me ratou dei tale ga.

 Nikua e rawa ni vakayaloqaqataki ira na imuri i Jisu na veika e tukuna kei na nona ivakaraitaki. Se mani vakacava na dredre e sotavi, e se rawa tiko ga nira yalodina vua na Kalou o ira kece na lotu vaKarisito.