“Na [Kalou], ena vuku ni kaukaua e dau vakaraitaka ena noda bula, ena rawa ni cakava vei keda na ka e uasivia sara na ka eda kerea se bau vakasamataka . .  . me vakalagilagi mada ga o koya.”—Efeso 3:20, 21, Vakadewa ni Vuravura Vou.

 “Vei koya e rawata me cakava na ka e uasivi cake vakalevu sara ena ka kece ga eda kerea se vakasama kina, me vaka na kaukauwa sa cakacaka yaco ena lomada, me ia vei koya na vakarokoroko.”—Efeso 3:20, 21, King James Version.

 E vakamacalataka kina ena nuidei na yapositolo o Paula ni rawa vua na Kalou me sauma nodra masu nona dauveiqaravi, e vakarautaka tale ga na ka era vinakata ena sala era rairai sega ni namaka. De dua ena sala totoka era na rairai nanuma ni na sega ni rawa.

 “Ena vuku ni kaukaua e dau vakaraitaka ena noda bula.” Na tikina e 21 na matavosa “koya,” e vakaibalebaletaka na Kalou o Jiova. a E vola kina o Paula: “Ena vuku ni ivavakoso, ena vuku i Karisito tale ga, me vakalagilagi mada ga o koya.” E rawa gona ni vakaukauataki keda o Jiova meda vakayacora nona inaki.—Filipai 4:13.

 Ena tikina e 20 e tukuna na yapositolo o Paula e dua na ka bibi ena nona dau vukei ira nona dauveiqaravi o Jiova. E tukuni ena dua na ivola: “Na tikinivolatabu qori e sega ni kena ibalebale ni rawa vua na Kalou me cakava na ka ga e vinakata. Ia e tu sara ga vua na kaukaua me cakava kina.” E ka ni sasaga mera dau vukei keda na noda itokani. Ia o Jiova e tu vakarau me cakava na ka ga era vinakata na nona dauveiqaravi, e sauma tale ga nodra masu. E sega ni vakaiyalayala na kaukaua kei na lewa e tu vua.—Aisea 40:26.

 “Na [Kalou] ena rawa . . . ni cakava vei keda na ka e uasivia sara na ka eda kerea se bau vakasamataka.” O Jiova e rawa ni vakarautaka vakayauyau, se “uasivia sara” na ka era vinakata nona dauveiqaravi. De dua era na raica ni vinaka cake sara na sala e vukei ira kina o Jiova.

 E dua tale na ka eda vulica ena matavosa “na ka e uasivia sara na ka eda kerea se bau vakasamataka.” Nona tukuna na yapositolo o Paula “na ka e uasivia sara na ka eda kerea se bau vakasamataka,” e vinakata mera kila na lotu vaKarisito kece ni rawa vua na Kalou me vukei ira ena sala era sega ni namaka. E vakamacalataki ena imatai ni cegu ni tikina e 20 ena New International Version: “Ia vei koya ena rawa ni cakava vei keda na ka e uasivia sara na ka eda kerea se bau vakasamataka.” Eso na gauna era na nanuma na lotu vaKarisito ni sega ni rawa se dredre me wali na nodra leqa. De dua era sega sara ga ni kila na ka mera masulaka. Ia e kila vinaka o Jiova na kedra ituvaki, kei na sala me vukei ira kina. Ena rawa ni walia na nodra leqa ena kena gauna donu. Ena cakava qori ena sala era sega ni namaka se bau vakasamataka. (Jope 42:2; Jeremaia 32:17) Ia ena gauna qo e vakaukauataki ira tiko me rawa nira vosota ena marau!—Jemesa 1:2, 3.

 A vola na yapositolo o Paula na ivola na Efeso vei ira kece na lotu vaKarisito ena koro o Efeso mai Esia Lailai, kilai nikua me o Taki. E vakaraitaka ena ivola qori na nona masulaki ira. (Efeso 3:14-21) E masulaka mera kila vinaka na nona loloma o Jisu Karisito, ra qai saga mera vakatotomuria nona ivakarau ni rai kei na ka e cakava. E tinia o Paula na nona masu ni vakalagilagia na Kalou, qai cavuta na ka e volai ena Efeso 3:20, 21.

 Sarava na ivakamacala lekaleka ni ivola na Efeso.